Eksọdusi 7:1-25
7 Jehovah sọ dọna Mose dọmọ: “Pọ́n, yẹn ko yí we do basi Jiwheyẹwhe nkọ* na Falo, Aalọn nọvisunnu towe nasọ yin yẹwhegán towe.+
2 Hiẹ nasọ vọ́ nuhe yẹn na degbe etọn na we lẹpo dọ, Aalọn nọvisunnu towe nasọ dọhona Falo, ewọ nasọ tún Islaelivi lẹ dote sọn aigba etọn ji.
3 Na yẹn tọn, yẹn na dike ahun Falo tọn ni sinyẹn+ bo nasọ hẹn ohia po azọ́njiawu ṣie lẹ po sudeji to aigba Egipti tọn ji.+
4 Ṣigba, Falo ma na dotoaina mì; yẹn nasọ dealọ ṣie tọ́njẹgbonu do Egipti ji bo hẹn gbẹtọgun* ṣie lẹ, akọta ṣie, yèdọ Islaelivi lẹ tọ́n sọn aigba Egipti tọn ji bo na sayana Egiptinu lẹ sinsinyẹn.+
5 Podọ e na họnwun na Egiptinu lẹ dọ yẹn wẹ Jehovah+ to whenue yẹn na dealọ ṣie tọ́njẹgbonu sọta Egipti bosọ de Islaelivi lẹ tọ́n sọn ṣẹnṣẹn yetọn.”
6 Mose po Aalọn po wà nuhe Jehovah ko degbe etọn na yé lẹ; yé wà domọ pẹpẹ.
7 Owhe 80 mẹvi wẹ Mose bọ Aalọn yin owhe 83 mẹvi to whenue yé dọho hẹ Falo.+
8 Jehovah sọ dọna Mose po Aalọn po dọmọ:
9 “Eyin Falo dọna mì dọ, ‘Mì wà azọ́njiawu de,’ to whenẹnu dọna Aalọn dọ, ‘Yí opò towe bo ze e dlan kọmẹ to Falo nukọn.’ E nasọ lẹzun odàn daho de.”+
10 Enẹwutu, Mose po Aalọn po yì Falo dè bo wà nuhe Jehovah ko degbe etọn na yé lọ pẹpẹ. Aalọn sọ ze opò etọn dlan kọmẹ to Falo po devizọnwatọ etọn lẹ po nukọn bọ opò lọ sọ lẹzun odàn daho de.
11 Ṣigba, Falo ylọ nuyọnẹntọ po owọ́ntọ lẹ po pli, yẹwhenọ nujlẹtọ Egipti tọn lẹ+ lọsu sọ wà nudopolọ gbọn nujijlẹ* yetọn dali.+
12 Dopodopo yetọn sọ ze opò yetọn dlan kọmẹ bọ opò lọ lẹ sọ lẹzun odàn daho lẹ; ṣigba opò Aalọn tọn ze opò yetọn lẹ mì.
13 Etomọṣo, Falo hẹn ahun etọn sinyẹn,+ e masọ dotoaina yé kẹdẹdile Jehovah ko dọ do.
14 Whenẹnu wẹ Jehovah dọna Mose dọmọ: “Ahun Falo tọn ko tliji.+ Ewọ ko gbẹ́ nado tún mẹlọ lẹ dote.
15 Yì Falo dè to afọnnu. Pọ́n! Ewọ jei tọ̀tó! Hiẹ ni nọtepọn ẹn to Tọ̀sisa Nile tọn tó; hiẹ nisọ hẹn opò he lẹzun odàn lọ to alọ towe mẹ.+
16 Dọna ẹn dọ, ‘Jehovah Jiwheyẹwhe Heblu lẹ tọn ko do mi hlan dè we,+ ewọ sọ dọmọ: “Tún omẹ ṣie lẹ dote, na yé nido yì sẹ̀n mi to danfafa ji,” ṣigba hiẹ ma setonu kakajẹ din.
17 Nuhe Jehovah dọ die: “Gbọn ehe dali wẹ hiẹ na yọnẹn dọ yẹn wẹ Jehovah.+ Yẹn na yí opò he to alọ ṣie mẹ do lì Tọ̀sisa Nile tọn, bọ e nasọ diọ zun ohùn.
18 Whèvi he tin to Nile mẹ lẹ nasọ kú, Nile nasọ lunwán, podọ osin Nile tọn ma nasọ yọ́n nù na Egiptinu lẹ ba.”’”
19 Jehovah sọ dọna Mose dọmọ: “Dọna Aalọn dọ, ‘Yí opò towe bo dlẹnalọ towe jẹgbonu do otọ̀ Egipti tọn lẹ ji,+ do tọ̀sisa etọn lẹ, osinwhín etọn lẹ,* tándo etọn lẹ+ podọ do osindò etọn lẹpo ji, na yé nido lẹzun ohùn.’ Ohùn nasọ tin to aigba Egipti tọn pete ji, etlẹ yin to sinhẹnnú owhlẹ tọn lẹ po zannu tọn lẹ po mẹ.”
20 To afọdopolọji, Mose po Aalọn po wà kẹdẹdile Jehovah ko degbe etọn na yé do. E sọ ze opò etọn daga bo lì Tọ̀sisa Nile tọn to nukun Falo po devizọnwatọ etọn lẹ po tọn mẹ, osin he to tọ̀sisa lọ mẹ lẹpo sọ diọ zun ohùn.+
21 Whèvi he to tọ̀sisa lọ mẹ lẹ kú+ bọ tọ̀sisa lọ sọ jẹ wánlùn ji, Egiptinu lẹ masọ penugo nado nù osin sọn Nile mẹ ba,+ podọ ohùn sọ gbọn aigba Egipti tọn pete ji.
22 Yẹwhenọ nujlẹtọ Egipti tọn lẹ sọ wà nudopolọ gbọn bojijlẹ yetọn dali,+ sọmọ bọ ahun Falo tọn sọ to sinsinyẹn deji, e masọ dotoaina yé kẹdẹdile Jehovah ko dọ do.+
23 Enẹgodo, Falo lẹkọyi whégbè bo masọ na ayidonugo nujijọ ehe.
24 Egiptinu lẹpo sọ to odò kùn pé lẹdo Nile nado mọ osin he yé na nù, na yé ma sọgan nù osin depope sọn Nile mẹ.
25 Azán ṣinawe pipé ko juwayi sọn whenue Jehovah ko diọ Tọ̀sisa Nile tọn zun ohùn.
Nudọnamẹ Odò Tọn
^ To paa mẹ, “do basi Jiwheyẹwhe.”
^ To paa mẹ, “awhànpa.”
^ Kavi “bojijlẹ.”
^ Enẹ wẹ, osinwhín etọn he tọ́n sọn Nile mẹ lẹ.
