Eksọdusi 5:1-23
5 Enẹgodo, Mose po Aalọn po yì Falo dè bo dọna ẹn dọmọ: “Nuhe Jehovah Jiwheyẹwhe Islaeli tọn dọ die, ‘Tún omẹ ṣie lẹ dote, na yé nido sọgan yì basi hùnwhẹ de hlan mi to danfafa ji.’”
2 Ṣigba, Falo dọmọ: “Mẹnu wẹ yin Jehovah+ bọ yẹn nado setonuna nuhe e dọ nado tún Islaeli dote?+ Yẹn ma yọ́n mẹhe nọ yin Jehovah, humọ yẹn ma na tún Islaeli dote.”+
3 Ṣigba, yé dọmọ: “Jiwheyẹwhe Heblu lẹ tọn ko dọho hẹ mí. Jaale, mí jlo na zingbejizọnlin azán atọ̀n tọn yì danfafa ji nado yì sanvọ́ hlan Jehovah Jiwheyẹwhe mítọn;+ eyin e ma yinmọ, ewọ na yí azọ̀nylankan do hò mí kavi yí ohí do hù mí.”
4 Ahọlu Egipti tọn sọ gblọnna yé dọmọ: “Mose po Aalọn po emi, naegbọn mì do to gbẹtọ lẹ desọn azọ́n yetọn kọ̀n? Mì lẹkọyi azọ́n sinsinyẹn* mìtọn kọ̀n!”+
5 Falo sọ yidogọ dọmọ: “Mì pọ́n lehe mẹlọ lẹ sù do to aigba lọ ji, ṣogan mì jlo na de yé sọn azọ́n yetọn kọ̀n.”
6 To azán enẹ dopolọ gbè, Falo degbena azọ́ngán* lẹ po nukọntọ* lẹ po dọmọ:
7 “Mì sọ nọ bẹ núyọ* pli na gbẹtọ lọ lẹ nado nọ mẹ̀ bliki ba blo.+ Mì gbọ yelọsu lẹ ni nọ yì bẹ núyọ pli na yede.
8 Ṣogan, mì gbẹsọ dona nọ hẹn yé nado nọ mẹ̀ bliki sọha dopolọ lẹ he yé ko nọ mẹ̀ dai. Mì de sọha lọ pò na yé blo, na yé to agbọ́ mọ.* Enẹwutu wẹ yé do to awhádo dọ, ‘Mí jlo na yì, mí jlo na yì sanvọ́ hlan Jiwheyẹwhe mítọn!’
9 Mì hẹn azọ́n yetọn sinyẹn dogọ bo hẹn alọnu yetọn ján, bọ yé ma nado na ayidonugo lalo lẹ.”
10 Enẹwutu, azọ́ngán*+ lẹ po nukọntọ lẹ po tọ́nyi bo dọna mẹlọ lẹ dọmọ: “Nuhe Falo dọ die, ‘Yẹn ma nasọ bẹ núyọ pli na mì ba.
11 Mìlọsu lẹ ni yì dín núyọ to fidepope he mì sọgan mọ te na mìde, ṣigba azọ́n mìtọn ma na depò to aliho depope mẹ.’”
12 Gbẹtọ lọ lẹ sọ gbàdo gbọn aigba Egipti tọn pete ji nado yì bẹ getin he yé na yí do basi núyọ lẹ pli.
13 Azọ́ngán lọ lẹ sọ to mizọnmizọn do na yé dọmọ: “Dopodopo mìtọn dona fó azọ́n etọn to azán dopodopo ji kẹdẹdile mì ko nọ wà do dai to whenue núyọ nọ yin nina mì.”
14 Nukọntọ he azọ́ngán Falo tọn lẹ de do Islaelivi lẹ ji lẹ sọ yin hihò.+ Azọ́ngán* lọ lẹ sọ kanse yé dọmọ: “Naegbọn mì ma do mẹ̀ bliki sọha he mì ko nọ mẹ̀ dai? Ehe jọ to osọ podọ to egbé.”
15 Enẹwutu, nukọntọ Islaelivi lẹ tọn lọ lẹ yì Falo dè bo wule na ẹn dọmọ: “Naegbọn a do to nuyiwa hẹ devizọnwatọ towe lẹ to aliho ehe mẹ?
16 Núyọ depope ma yin bibẹpli na devizọnwatọ towe lẹ, ṣogan yé nọ to didọna mí dọ, ‘Mì mẹ̀ bliki lẹ!’ Yè nọ to devizọnwatọ towe lẹ hò, dile etlẹ yindọ owhẹ̀ omẹ towe lẹ tọn ma whẹ́n.”
17 Ṣigba, Falo dọmọ: “Agbọ́ mọ* wẹ mì te, agbọ́ mọ* wẹ mì te!+ Enẹwutu wẹ mì do to didọ dọ, ‘Mí jlo na yì, mí jlo na yì sanvọ́ hlan Jehovah.’+
18 Enẹwutu, mì yì todin bo lẹkọyi azọ́n mìtọn kọ̀n! Núyọ depope ma na yin bibẹpli na mì, amọ́ bliki sọha dopolọ wẹ mì gbẹsọ dona nọ mẹ̀.”
19 Whenẹnu, nukọntọ Islaelivi lẹ tọn lọ lẹ mọdọ nuhahun sinsinyẹn mẹ wẹ yé tin te na gbedide lọ wutu he dọmọ: “Mì ma dona de bliki sọha he mì nọ mẹ̀ egbesọegbesọ pò to aliho depope mẹ.”
20 Enẹgodo, yé mọ Mose po Aalọn po, he to ote to finẹ nado pé yé dile yé lẹkọ sọn Falo dè.
21 To afọdopolọji, nukọntọ lọ lẹ dọna yé dọmọ: “Na Jehovah ni mọ nuhe mì wà bo dawhẹ, to whenue e yindọ mì ko hẹn Falo po devizọnwatọ etọn lẹ po nado gbẹwanna mí,* bọ mì ko sọ ze ohí do alọ yetọn mẹ nado hù mí.”+
22 Whenẹnu wẹ Mose lẹhlan Jehovah bo dọmọ: “Jehovah, naegbọn hiẹ do bianukunna omẹ ehelẹ? Etẹwutu wẹ a do dó mi hlan?
23 Sọn whenue gbọ́n yẹn ko yì Falo dè bo dọhona ẹn to oyín towe mẹ+ wẹ ewọ ko jẹ yasana omẹ ehelẹ ji,+ podọ e họnwun dọ hiẹ ma whlẹn omẹ towe lẹ.”+
Nudọnamẹ Odò Tọn
^ Kavi “agbàn pinpẹn.”
^ Kavi “kọgbidinamẹtọ”; enẹ wẹ, mẹhe nọ hẹn gbẹtọ lẹ gánnugánnu nado wazọ́n.
^ Omẹ ehelẹ yin dide sọn ovi Islaeli tọn lẹ mẹ.
^ “To ojlẹ Biblu tọn lẹ mẹ, núyọ kavi ogbé devo lẹ nọ saba yin yinyan dopọ po okò po kavi po okọ́ yinyan po nado mẹ̀ bliki.”
^ Kavi “to adidọ wà.”
^ Kavi “kọgbidinamẹtọ”; enẹ wẹ, mẹhe nọ hẹn gbẹtọ lẹ gánnugánnu nado wazọ́n.
^ Kavi “Kọgbidinamẹtọ”; enẹ wẹ, mẹhe nọ hẹn gbẹtọ lẹ gánnugánnu nado wazọ́n.
^ Kavi “Adidọ wà.”
^ Kavi “adidọ wà.”
^ Kavi “hẹn mí nado lunwán do Falo po devizọnwatọ etọn lẹ po.”
