2 Kọlintinu lẹ 3:1-18
-
Wekanhlanmẹ mẹpipa tọn (1-3)
-
Lizọnyizọnwatọ alẹnu yọyọ lọ tọn (4-6)
-
Alẹnu yọyọ lọ tindo gigo hugan (7-18)
3 Be mí nasọ vọ́ jẹ mídelẹ pà ji wẹ ya? Kavi, taidi mẹdelẹ, be míwlẹ tindo nuhudo wekanhlanmẹ mẹpipa tọn lẹ tọn hlan mì kavi sọn mì dè wẹ?
2 Mìwlẹ lọsu wẹ yin wekanhlanmẹ mítọn,+ he yin kinkan do ahun mítọn mẹ, bọ gbẹtọvi lẹpo yọnẹn bosọ nọ hia.
3 Na mì dohia dọ mìwlẹ wẹ yin wekanhlanmẹ Klisti tọn de he míwlẹ he yin lizọnyizọnwatọ lẹ kàn,+ e ma yin kinkan po wesin po gba, ṣigba po gbigbọ Jiwheyẹwhe ogbẹ̀nọ tọn po, e ma yin do zannu paa lẹ ji gba,+ ṣigba do zannu he yè yí agbasalan do basi lẹ ji, yèdọ do ahun lẹ ji.+
4 Mí tindo jidide wunmẹ ehe to Jiwheyẹwhe mẹ gbọn Klisti gblamẹ.
5 E ma yindọ mílọsu lẹ pegan mlẹnmlẹn nado pọ́n nudepope hlan taidi nuhe nọ wá sọn mídetiti dè wẹ gba, ṣigba Jiwheyẹwhe wẹ nọ hẹn mí pegan,+
6 mẹhe, na nugbo tọn, ko hẹn mí pegan mlẹnmlẹn nado yin lizọnyizọnwatọ alẹnu yọyọ de tọn lẹ,+ e ma yin kandai osẹ́n tọn de tọn gba,+ ṣigba gbigbọ tọn; na kandai osẹ́n tọn lọ nọ gblewhẹ okú tọn do omẹ,+ ṣigba gbigbọ nọ hẹnmẹ wá ogbẹ̀.+
7 Todin, eyin todohukanji osẹ́n tọn he nọ hẹn okú wá podọ he yin kinkan po wekun lẹ po do zannu lẹ ji+ wá aimẹ to gigo mọnkọtọn mẹ, sọmọ bọ ovi Islaeli tọn lẹ ma sọgan pọ́n nukunmẹ Mose tọn tlintlin, na gigo nukunmẹ etọn tọn wutu,+ yèdọ gigo de he na busẹ,
8 naegbọn lizọnyizọn gbigbọ tọn+ ma nado tindo gigo humọ?+
9 Na eyin todohukanji osẹ́n tọn he nọ hẹn whẹgbledomẹ wá+ yin gigonọ,+ nẹmunẹmu wẹ dehe nọ hẹn dodowiwa wá ma nado sù to gigo mẹ humọ!+
10 Na nugbo tọn, yèdọ nuhe ko yin hinhẹn zun gigonọ wayi ko yin gigo desọn e go, na gigo he yiaga hugan ẹn lọ wutu.+
11 Na eyin nuhe na busẹ lọ wá to gigo mẹ,+ nẹmunẹmu wẹ gigo nuhe na gbọṣi aimẹ lọ tọn!+
12 To whenuena e yindọ mí tindo todido mọnkọtọn,+ mí to awuvivo hodidọ tọn daho de yizan,
13 podọ e ma yin nado nọ yinuwa dile Mose wà do to whenue e nọ yí nukunmẹṣinyọnnu de ṣinyọ́n nukunmẹ,+ bọ ovi Islaeli tọn lẹ ma nado sọgan pọ́n opodo nuhe na busẹ lọ tọn tlintlin.
14 Ṣigba, ayiha yetọn ko yin súsú.+ Na kakajẹ azán ehe gbè, nukunmẹṣinyọnnu dopolọ gbọṣi aimẹ to alẹnu hoho lọ hihia whenu,+ na e ko busẹ gbọn Klisti kẹdẹ gblamẹ wutu.+
15 Na nugbo tọn, kakajẹ egbé, whedepopenu he kandai Mose tọn lẹ yin hihia,+ nukunmẹṣinyọnnu de nọ ṣinyọ́n ahun yetọn lẹ ji.+
16 Ṣigba, to whenue yè lẹhlan Jehovah* dè, nukunmẹṣinyọnnu lọ nọ yin didesẹ.+
17 Todin, Jehovah* wẹ Gbigbọ lọ,+ podọ fie gbigbọ Jehovah* tọn te, mẹdekannujẹ nọ tin to finẹ.+
18 Podọ mímẹpo, to whenue nukunmẹ mítọn he ma tindo nukunmẹṣinyọnnu do gigo Jehovah* tọn hia taidi mẹpọ́nnu lẹ, mí nọ yin adàdiọna nado yin apajlẹ dopolọ sọn gigo de mẹ jẹ gigo he klohu mẹ,* yèdọ pẹpẹ dile Jehovah,* Gbigbọ lọ* nọ hẹn ẹn yọnbasi do.+
