Skip to content

Yehowa Sɛɛradoma

Loe Yetɔɣum Farefare

Nɔŋerɛ La Nɔyinɛ—Laɣesegɔ Ti Ba Eŋɛ Frankfurt, Germany Teŋa Poan

Nɔŋerɛ La Nɔyinɛ—Laɣesegɔ Ti Ba Eŋɛ Frankfurt, Germany Teŋa Poan

“La Kɔ’ɔn Ana Wuu Deodoma N Laɣesɛ La” Frankfurter Rundschau lasebaarɛ gɔŋɔ n yele bala. Sɛba woo n keŋɛ laɣesegɔ wa sakɛ ti la dela sira.

Karla n ze’ele Puerto Rico yeti: “Ba daa kɔ’ɔn to’e mam mɛ soŋa soŋa!”

Sara n ze’ele Australia yeti: “La daa kɔ’ɔn ana mam wuu n keŋɛ la teŋa kayima sa ta kaɛ en deodoma bisɛ la.”

Beni n daa basɛ ti ba yele bala? Yehowa Sɛɛradoma sateŋa laɣesegɔ la. Ba daa eŋɛ de la zɛ’ɛsi n de wuu Commerzbank-Arena n boi Frankfurt am Main, Germany, pɔsɛ July 18 ta paɛ 20, 2014. Nɛreba n paɛ wuu 37,000 n keŋɛ laɣesegɔ wa.

Sɛba woo n laɣesɛ la zamesɛ la sɛla Baabule la poan. Laɣesegɔ yeletigesego la za’a daa dela Baabule kaalegɔ, yuuma, zusega, Baabule de’eŋo sugumnɔɔrɛ buyi la Baabule yetɔɣum n kɛ̃’ɛri suure.

Mabiisi basɛba daa dela teŋa la poan nɛreba ge ti mabiisi basɛba me n gaŋɛ 3,000 ze’ele Australia, Britain, Greece, Lebanon, Serbia, South Africa la United States. Mabiisi 234 n ze’ele tisi 70 ge tuna tɛm woo na’am tuuma la sateŋa na’am yetɔɣum yalegerɛ tuuma daa laɣum keŋɛ mɛ.

Ba daa eŋɛ laɣesegɔ la yetɔɣum a se’a mɛ doose intanɛt poan ti zɛ’ɛsi 19 n boi Germany, Austria la Switzerland ti ba kelese. Nɛreba 204,046 n daa keŋɛ laɣesegɔ wa.

Ba Ka Bɔɣeseri Taaba

Ba daa bo sɔsega wa Frankfurt teŋa poan la Solemiine, German la Greek yetɔɣum poan. Ge zɛ’ɛsi a se’a poan, ba lerege yetɔɣum la mɛ 17 lebe Arabic, Chinese, Tamil, Turkish la gɔɔnɔ yetɔɣum sugumnɔɔrɛ buyi.

La nɔɔ boi bini ti mabiisi wa daa ze’ele la tisi zo’e zo’e la yetɔɣum buuri buuri poan ge bala ka basɛ ti ba bɔna tɔka tɔka—nɔŋerɛ n basɛ ti ba tara nɔyinɛ. (Yon 13:34, 35) Ba daa na’aseri taaba wuu ba dela suurɔ la.

Tobias n ze’ele Britain yeti: “Tomam  nyɛ ti to mabinɔɔrɛ nɔŋerɛ la ka bɔɣeseri taaba.”

Davianna n ze’ele Puerto Rico yeti: “Eŋa seke la Mabiisi n ze’ele tisi 20. To tari nɔŋerɛ bɔ’ɔra tomea la Naayinɛ la n basɛ ti to tara nɔyinɛ la.”

Malcom n ze’ele Australia la yeti: “Mam wa’ana dɛna Yehowa Sɛɛradoma ayima ti mam boi la teŋbila ayima poan. Mam kaalɛ to mabinɔɔrɛ la yɛla, hali bisɛ vidiyo pa’asɛ. Ge kalam ti mam mea nini kɔ’ɔn nyɛ sɛla wa, basɛ ti mam sirum bɔkɛ yele la mɛ soŋa. La dela giilekpeŋere bɔ’ɔra mam. Mam wa’an kalam na wa, basɛ ti mam sakerɛ n kpe’em pa’asɛ.”

To Tɛri Ba Itisoŋɔ La Mɛ

Mabiisi n ze’ele tansuga 58 Frankfurt teŋa la dekɛ la lɔɣɔrɔ bo saama la ge de’em de’eŋo zaanɔɔrɛ ti ba bisɛ.

Cynthia n daa ze’ele United States yeti: “ba daa to’e mam la soŋa. Mam kan malum tamɛ to mabiisi nɔŋerɛ, ba itisoŋɔ la ba daa bo’ori yɛri yɛri se’em la.”

Simon n ze’ele Germany daa yeti: “nɛra woo puurɛ daa pee mɛ, ti to la’ara ti la pa’alɛ ti to suure n kɛ̃ taaba. To nyɛ la yɛla zo’e zo’e taaba zɛ’an.”

Amy n ze’ele Australia yeti: “zaanɔɔrɛ de’eŋo la basɛ ti mam baŋɛ ti tomam n de Yehowa Sɛɛradoma la, to ka mɔbegeri tomea. To tã dɛ’ɛna mɛ—mina de’eŋo seko n tari pupeelum.”

To Ye Kula Ge Tɛra Yelese’a

Frankfurt laɣesegɔ la laɣum pa’asɛ la satisi laɣesegɔ la ti ba eŋɛ tisi sugumnɔɔrɛ buwai teŋgɔŋɔ wa poan la.

Ba soke mabia ayima sɛla ti a nyɛ Frankfurt laɣesegɔ la poan ti a yeti: “Makɛ bisɛ ti ho tari la ho suɔ ge ka mina en ge nyaa ta nyɛ en. Hon kɔ’ɔn nyɛ en la, a suure n sukɛ ti a ya’ɛ a nu’usi tu’usa hɔ. Ti ho puurɛ me kɔ’ɔn pee gaŋɛ. Dekɛ bala makɛ la nɛreba 37,000 ti ho tu’usa. La daa ani la bala bilam.”