Skip to content

Zɔɛ keŋɛ yelese'a n boi

Yehowa Sɛɛradoma

Loe Yetɔɣum Farefare

 ZASEŊƆ 13

Pu’usegɔ Yelesoma La Dela Bem?

Pu’usegɔ Yelesoma La Dela Bem?

1. Pu’usegɔ woo ani soŋa?

Nɛresondoma boi pu’usegɔ woo mɛ. Yelesonɛ la dela Naayinɛ nyɛti nɛrebana taaba mɛ ge ti’isa ba yele. Ge ninbaalega la dela, nɛreba doli la pu’usegɔ poan tuna tuunbe’ero. (2 Korint 4:3, 4; 11:13-15) Lasebaarɛ yetɔɣum pa’alɛ ti pu’usegɔdoma basɛba laɣum pa’asɛ sɛba n tari kɔma ga’a, kɛ̃’ɛ̃ra zaba poan, kuura sɛba n ka nam bo ba hali ni ta siisum kuura basɛba. Bisɛ la de yeledaaŋɔ se’em bɔ’ɔra sɛba n na’asi Naayinɛ!​—Kaalɛ Matu 24:3-5, 11, 12.

Yelemɛŋɛrɛ pu’usegɔ n pɛɣere Naayinɛ ti pumpɔreŋɔ pu’usegɔ me zɛregere en. Ba ka pa’alɛ Baabule la poan Naayinɛ n de mina la kum me n ani se’em. Ge Yehowa boti nɛreba baŋɛ yelemɛŋɛrɛ la.​—Kaalɛ Ezekiel 18:4; 1 Timoti 2:3-5.

2. Pu’usegɔ yelesoma la dela bem?

Yelesonɛ la dela, Naayinɛ puurɛ ka pee la pumpɔreŋɔ pu’usegɔ n parum ti ba pu’usɛ la eŋa ge tuɣum tuna Sitaana dunia wa tuuma. (Yames 4:4) Naayinɛ Yetɔɣum la yeti “Babilon Teŋkantɛ” ze’ele bo la pumpɔreŋɔ pu’usegɔ woo. Babilon ze’ele bo la daami teŋsɛka ti pumpɔreŋɔ pu’usegɔ yun pɔsɛ Noah Kokemɔ pooren la. La kan yue, Naayinɛ wan sa’am pu’usegɔ woo n pareni ge mukera nɛreba.​—Kaalɛ Liligere 17:1, 2, 5, 16, 17; 18:8.

Yelesoma kelum bɔna. Yehowa ka tamɛ nɛresondoma woo n yiregɛ teŋgɔŋɔ wa zuo bɔna pumpɔreŋɔ pu’usegɔ poan la. A pa’alɛ nɛrebana yelemɛŋɛrɛ la ti ba tara nɔyinɛ la taaba.​—Kaalɛ Mikah 4:2, 5.

 3. Bem ti nɛresondoma nara ti ba eŋɛ?

Yelemɛŋɛrɛ pu’usegɔ basɛ ti nɛreba tara la nɔyinɛ

Yehowa nɔŋɛ nɛresɛba n boti yelemɛŋɛrɛ ge ita som la. A ka’ani ba ti, ba dekɛ pumpɔreŋɔ pu’usegɔ basɛ. Nɛresɛba n nɔŋɛ Naayinɛ mɔɔre mɛ ti ba tee ba bɔŋa wuu en boti se’em la.​—Kaalɛ Liligere 18:4.

Yuun kɔbesɛka n deŋɛ nɛŋa la, nɛresondoma n yun wum yelesoma la yese tuntuneba la ze’an la, ba puurɛ yun pee mɛ. Ba yun zamesɛ la yele paalɛ Yehowa ze’an tara pupeelum ba vom poan ti la tara beere puti’irɛ bɔ’ɔra ba. Ba dela makesonɛ bo tomam zina wa sɛla n sɔi la ba yun to’e yelesoma la nu’usi siyi ge eŋɛ pa’alɛ ti Yehowa n de yia ba vom poan.​—Kaalɛ 1 Tesalonika 1:8, 9; 2:13.

Se’em woo n basɛ pumpɔreŋɔ pu’usegɔ ge lebe Yehowa ze’an na, a ni to’e en mɛ pa’asɛ a nɛreba poan. Ho san sakɛ Yehowa yi’a, ho wan dɛna a zɔ, laɣum bɔna la nɛresɛba n pu’usere Yehowa ge wan nyɛ daarewoo nyɔvore.​—Kaalɛ Mark 10:29, 30; 2 Korint 6:17, 18.

4. Naayinɛ wan eŋɛ la wani ti teŋa woo tara nyɛɛma?

Sa’aŋɔ n wan wa’an pumpɔreŋɔ pu’usegɔ zuo na la dela yelesonɛ. La wan basɛ ti teŋgɔŋɔ wa za’a nyɛ faarɛ yese mugesego poan. Pumpɔreŋɔ pu’usegɔ kanle malum pã’ãsɛ nɛreba bii yelese ba. Sɛba woo n wan vɔna la wan tara nɔyinɛ pu’usa yelemɛŋɛrɛ Naayinɛ la ma’a.​—Kaalɛ Liligere 18:20, 21; 21:3, 4.