SƐLA N WAN SOŊƐ DEODOMA
Ya Puti’irɛ San Bɔna To’ore To’ore
Nɛreba la ba pɔɣeba n nɔŋɛ yelese’a boi la to’ore to’ore ti ba hala, la bamam n iti yɛla se’em me bɔna tɔka tɔka. Bala ta’an dɛna yeledaaŋɔ bɔ’ɔra ba. Ge yɛla ase’a, maɣesɛ wuu yelese’a n boi tiŋanɔɔrɛ wa ta’an kpe’em mɛ ti ba maalɛ:
Ya wan tara saŋa se’em sɔsa la ya yidoma
Ya wan tara ya ligeri tuna se’em
Ya wan dɔɣɛ kɔma bii ya kan dɔɣɛ?
Hon la ho luɣerɛ kpɛ’a san ka tara putɛyinɛ, ya wan eŋɛ la wani?
Hon nari ti ho mina sɛla
Ya ta’an naɛ taaba bɔna soŋa soŋa ge bala ka pa’alɛ ti ya sɛla woo dela buyina. Nɛra la a pɔɣa san puɣum bɔna la taaba soŋa soŋa, daɣɛ saŋa woo ti ba wan tara putɛyinɛ hali la ninmɔ’ɔrɛ yɛla poan.
“Mam yuun zo’e la yizuo sɛka poan n nɔŋɛ ba laɣesa taaba sɔsa. Bakwai ba’asegɔ poan tomam daa ni naɛ la n mayaaba la n sɔyaaba, la n asedoma, la n puɣeradoma, la n sɔ suurɔ kɔma sɔsera. Mam sira yizuodoma ni ka sɔsera bala. Bala basɛ ti mam la n sira ka tara putɛyinɛ doose la to wan tara saŋa se’em sɔsa la to yidoma bii sɔsera la to yire nɛreba sɛba n zaɛ la to.”—Tamara.
“Mam la n pɔɣa n zo’e yizuto seto poan la basɛ ti to ka tara putɛyinɛ doose la to wan tara to ligeri la ita sɛla. To daa naan pɔsɛ di taaba la ŋmaresi fii poan, to daa ni ŋmɛ nɔkpe’ene mɛ ligeri yɛla poan. To daa zi’ire la sugumnɔɔrɛ zo’e zo’e ge nyaa ta’an maalɛ yele la.”—Tyler.
Nɛreba bayi ta’an bisɛ sɛla ge ti bamam n bɔka de se’em la bɔna to’ore to’ore. Bala mea nɔɔ ti nɛra la a pɔɣa ni ka tara putɛyinɛ yele poan
Ho yeen sakɛ doose ho luɣerɛ kpɛ’a n boti sɛla la, kan ta’an maalɛ yeledaaŋɔ ase’a. Makerɛ dela ho dɛɛma san bɛ̃’ɛra ti la nara ti ya bisɛ en, ho wan eŋɛ la wani? Bii ho luɣerɛ kpɛ’a san bɔta kɔma ge ti ho ka bɔta kɔma, ho wan eŋɛ la wani? *
“Mam la n pɔɣa tabelɛ zi’ire sugumnɔɔrɛ zo’e zo’e sɔsɛ yue mɛ ti to bisɛ nyaa to dɔɣɛ kɔma bii to da dɔɣɛ. Mam pɔɣa kelum ti’isa de yele me saŋa woo ge to puti’ira ka makɛ dɛna buyina. Mam ka mi mam wan eŋɛ se’em yele wa poan.”—Alex.
Ya puti’irɛ n boi to’ore to’ore la ka nari ti la sa’am ya pɔɣedire la. Gɔnmi’ileba basɛba yeti, hon la ho luɣerɛ kpɛ’a san tara ninmɔ’ɔrɛ yele ti ya sɔsɛ ge ti ya puti’irɛ ka makɛ taaba, la nari ti ho eŋɛ homea n boti sɛla la, hali bala san puɣum wan sa’am ho pɔɣedire la. Ge “kaaŋɔ” kaŋa taaba basɛ ti nɛra ti’isa la amea ma’a yele. A me ka bisɛ ti la yele pakɛ mɛ ti a doose a nɔpɔrɛ la ti a daa pɔ Naayinɛ nɛŋai ti a wan ana tapilapi la a luɣerɛ kpɛ’a saŋa woo la.
Hon wan ta’an eŋɛ sɛla
La nari ti ho tara na’asegɔ bɔ’ɔra ho pɔɣedire nɔpɔrɛ la. Ya san tara putɛkana, la wan soŋɛ ya ti ya ta’an naɛ taaba maalɛ yele la ge da zabera.
Baabule naresum yele: “Sɛla ti Naayinɛ dekɛ laɣum taaba la, da basɛ ti asaala yelege.”—Matu 19:6.
Ti’isɛ yele la soŋa soŋa. Makerɛ dela, ho luɣerɛ kpɛ’a ta’an bɔta ti ya dɔɣɛ kɔma ge ti ho ka bɔta. Yɛla ase’a n boi ti ya nara ti ya ti’isɛ de yele, maɣesɛ wuu:
Ya tiŋasuka bɔŋa la n kpe’em se’em.
Ya pɔɣedire la n ani se’em la wan ta’an basɛ ti ya tum tuunkãtɛ wa n de ya uge bia?
Dɔɣereba zubgere tuuma n de sɛla.
Yɛla zo’e zo’e boi mɛ ti ya nara ti ya eŋɛ bo kɔma la gana ya wan da dia, ee lɔɣɔrɔ bii ga’aregɔ zɛ’an ma’a la.
Ya ligeri yɛla.
Ya wan ta’an tuna yamea tuuma, bisera yizuo la ge me le tuna ninmɔ’ɔrɛ tuuma ase’a pa’asɛ?
Baabule naresum yele: “Ani n boi ya poan n wan bɔta ti a mɛ yikãtɛ ge kan te’ele zi’ire kɛke sanɛ la bisɛ nyaa a tari paŋa n wan ta’an mɛ de ba’asɛ?”—Luke 14:28.
Ti’isɛ yele la za’a bisɛ soŋa. Ho ta’an maalɛ yɛla ase’a n basɛ ti nɔkpɛ’ɛma bɔna. Makerɛ dela, ya san ŋmɛ’ɛra nɔkpe’ene ti ya dɔɣɛ kɔma bii ya da dɔɣɛ, se’em n ka boti a dɔɣɛ la ta’an soke amea yeti:
‘Mam san yeti n ka boti n dɔɣɛ kɔma, n boti n yeti n kɔ’ɔn ka boti la n dɔɣɛ mɛ bii n nan ka boti la n dɔɣɛ?’
‘Mam ti’isɛ ti n ta’an kan dɛna dɔɣera sonkɔ n sɔi ti n gu’una ti n dɔɣɛ la?’
‘Dabeem n tari mam ti n luɣerɛ kpɛ’a kan nyɛta nɛŋa bɔ’ɔra mam?’
Se’em n boti a dɔɣɛ la me ta’an soke amea yeti:
‘Tomam maasum ya ti to tum dɔɣera zubgere tuuma la?’
‘To tari ligeri n wan ta’an bisɛ bia soŋa?’
Baabule naresum yele: “Yɛmsebo n ze’ele saazuo la . . . tari la bɔkerɛ.”—Yames 3:17.
Baŋɛ ho luɣerɛ kpɛ’a la puti’irɛ la n ani soŋa se’em yele la poan. Saŋa ase’a nɛreba bayi san bisera sɛla, bamam n ni bɔkɛ de se’em la ni bɔna la to’ore to’ore. Bala mea, nɛra la a pɔɣa ta’an laɣum ti’isɛ yele poan ge bɔkɛ yele la sore to’ore to’ore poan. Makerɛ dela, ba wan tara ba ligeri tuna se’em. Ya san maasum ti ya sɔsɛ yelese’ere ti nɔkpe’ene wa’ana, deŋɛ ya nɛŋa sɔsɛ sɛla ti ya za’a wan sakɛ bo.
Ya za’a laɣum bɔta ti ya eŋɛ la bem?
Ya za’a puti’ira laɣum ana soŋa la wani?
La wan eŋɛ se’em ti ya pɔɣedire la ana soŋa la, yamam yayi bii ayima ta’an tee a puti’irɛ ti la makɛ la a luɣerɛ kpɛ’a la denɛ?
Baabule naresum yele: “Basɛ ya ti nɛra woo ɛɛra a tadaana n boti sɛla ge daɣɛ amea ma’a n boti sɛla.”—1 Korint 10:24.
^ Ya nari ti ya sɔsɛ ninmɔ’ɔrɛ yɛla ba’asɛ ge ti ya nyaa di taaba. Ge bala za’a poan la, sɛla ti ya ka ti’iseri ni de yele ta’an eŋɛ bii ho luɣerɛ kpɛ’a la puti’irɛ ta’an tee.—Pa’ala 9:11.