Nahániri, ore ni mbaʼevéicharõ norokambiái la Biblia heʼíva. Upéva rangue, rohechakuaáramo ore kreénsia noĩporãiha la Biblia heʼíva ndive, rokambia umi mbaʼe rogueroviáva.

Opa mbaʼe rogueroviáva oĩmbaite la Bíbliape. Heta tiémpore, roguereko mboyve pe Traducción del Nuevo Mundo de las Santas Escrituras osẽ vaʼekue 1950-pe, rohesaʼỹijóma vaʼekue voi la Biblia. Ha roipuru vaʼekue umi traduksión oĩmava upe tiémpope ha roguerovia umi mbaʼe oĩva pype. Ehechamínte umi mbaʼe ogueroviáva umi testígo de Jehová ymaite guive, ha ndete voi ehecha oĩ porãpa umíva la Biblia omboʼévandi.

  1. Ore kreénsia: Ñandejára ndahaʼéi peteĩ trinida. Peteĩ artíkulo osẽ vaʼekue Zionʼs Watch Tówerpe (koʼág̃a oñehenóiva Ñemañaha), julio de 1882-pe heʼi: “Enterove oleéva ko rrevísta oikuaa mávapa Jehová ha Jesús, avei mbaʼépa pe espíritu sánto, upéicha rupi ndorogueroviaiete voi pe enseñánsa heʼíva Túva, Taʼýra ha espíritu sánto peteĩnteha. Upéva noĩri la Bíbliape”.

    Mbaʼépa heʼi la Biblia: “Jahve, nde Ruete, peteĩnte hína haʼe” (Deuteronomio 6:4, Ñande Ruete Ñeʼẽ Bíblia [ÑÑB]). “Ñandéve g̃uarã katu oĩ peteĩnte ñande Apohare, ñande Ruete voi; haʼe opaite mbaʼe Jára, ha ñande imbaʼe voi; ha oĩ peteĩnte Jesucrísto añeteguáva, ha haʼe rupi oiko hína opa mbaʼe, ha ñande jaiko avei haʼe rupi.” (1 Corintios 8:6, ÑÑB.) Jesús voi heʼi: “Pe Túva ningo mbaʼe guasuve chehegui” (Juan 14:28, ÑÑB).

  2. Ore kreénsia: Infiérno ndahaʼéi peteĩ tatarendy jahatahápe jasufri opa árare. Pe Zionʼs Watch Tower oguenohẽ vaʼekue peteĩ artíkulo junio de 1882-pe, hérava “El salario que el pecado paga es muerte” (oñeguenohẽva Romanos 6:23-gui, Versión Reina Valera). Upe artíkulope heʼi: “Hesakã porãiterei ko téxto heʼíva. Jaikuaase voi mbaʼérepa heta persóna heʼíva ijehe ojeroviaha la Bíbliare, haʼete ndogueroviáiva ko téxto heʼíva ha opensa jeýnte oĩha peteĩ infiérno, jahatahápe jasufri opa árare japeka haguére”.

    Mbaʼépa heʼi la Biblia: “Pe ánga hembiapo vaívante omano vaʼerã” (Ezequiel 18:4, 20, ÑÑB). Añetehápe Ñandejára okastigáta umi ndojaposéivape hembipota. Péro ndahaʼemoʼãi omondótava chupekuéra osufri hag̃ua opa árare infiérnope, síno okondenáma chupekuéra “oñehundi hag̃ua opa ára g̃uarã” (2 Tesalonicenses 1:9, Sociedad Bíblica Paraguaya [SBP]).

  3. Ore kreénsia: Ñandejára Rréino haʼe peteĩ goviérno, ndahaʼéi peteĩ mbaʼe jarekóva ñane korasõme. Oñeʼẽvo Ñandejára Rréino rehe, pe rrevísta Zionʼs Watch Tower osẽ vaʼekue diciembre 1881-pe heʼi: “Ñandejára Rréino ogoverna hag̃ua oipeʼáta umi goviérno oĩva ko yvy ape ári”.

    Mbaʼépa heʼi la Biblia: “Ipokatu opa árape g̃uarã, ha haʼe oporosãmbyhyhápe noñehundimoʼãi arakaʼeve” (Daniel 7:14, SBP). “Ñande Ruete [...] ohundipaitéta umi tetã ruvichakuérape ipochyha árape.” (Salmo 110:5, ÑÑB.)

¿Pe Traducción del Nuevo Mundo añoiténte piko oapoja umi mbaʼe ogueroviáva umi testígo de Jehová?

Nahániri. Koʼag̃aite peve ore roipuru avei umi ótra traduksión ropredika jave ore rapichakuérape. Romeʼẽramo jepe gratiete pe Traducción del Nuevo Mundo, upéva ndeʼiséi umi ogajára ndaikatuiha oipuru ibibliaite voi ostudia hag̃ua orendive. Ore roipurúnte avei upe traduksión haʼekuéra orekóva.