Ehecha oĩva pype

Ehecha menú secundario

Testígo de Jehová

guarani

¿Mbaʼéichapa umi testígo de Jehová opaga umi gástore?

Pe tembiapo rojapóva oreko heta gásto ha koʼã ojepaga umi testígo de Jehová kontrivusión voluntária rupive. Ore rreunionkuérape ndojejeruréi pláta ni oñemeʼẽ hag̃ua diésmo (Mateo 10:7, 8). Oĩramo omeʼẽséva peteĩ kontrivusión, ikatu omoĩ umi káha oĩva umi lugár roñembyatyhápe. Noñemombeʼúi mávapa omeʼẽ pe pláta.

Oĩ heta mbaʼe orepytyvõva ani hag̃ua oregastoiterei. Por ehémplo, ore apytépe ndaipóri avave isuéldova. Avei, ndorokovrái ni un guarani roho haguére ogahárupi, ha umi lugár roñembyatyhápe isensíllo.

Umi kontrivusión oñemondóva umi testígo de Jehová sukursálpe ojepuru koʼã mbaʼépe: oñepytyvõ hag̃ua umi lugár oikohápe yvyryrýi, ama guasu ha umícha, oñepytyvõ hag̃ua umi misionéro ha umi ermáno ovisita meméva kongregasionkuéra, oñemopuʼã hag̃ua umi Salón oñemombaʼeguasuhápe Ñandejárape ha avei oñeimprimi ha oñemondo hag̃ua Biblia ha ambue puvlikasión.

Káda uno odesidi omeʼẽtapa ikontrivusión osegi hag̃ua ojejapo pe tembiapo ko yvy tuichakuére térã ojepaga hag̃ua umi mbaʼe ojegastávare kongregasiónpe. Ha ikatu avei omeʼẽ mokõivévape g̃uarã. Káda kongregasiónpe ojejapo peteĩ infórme ojekuaa hag̃ua mboy plátapa oike ha osẽ. Oimérõ oĩ ohechaséva ikatu ohecha.