Ndahaʼéi ningo romboykéva umi ojevautisávape ha upéi nosẽvéiva opredika ni ndohovéiva ore rreunionhápe. Upéva rangue, romokyreʼỹ chupekuéra oremoirũ jey hag̃ua.

Peteĩ Testígo ojevautisámava hembiapo vaíramo, ikatu oñemosẽ kongregasióngui. Péro upéva ndoikói peteĩ tesapirĩme. Upe tapicha ojapo meméramo peteĩ mbaʼe la Biblia heʼi porãva oĩ vaiha ha nokambiaséi, oñemosẽmante chupe, ha pe kongregasión ndojeheʼavéima hese. La Biblia heʼi voi: “Pemosẽ pe kuimbaʼe aña pende apytégui” (1 Corintios 5:13).

¿Mbaʼépa oikóta peteĩ kuimbaʼe oñemosẽramo kongregasióngui, péro hembireko ha ifamília osegi gueteri pe rrelihiónpe? Ndaikatuvéiramo jepe omombaʼeguasu oñondivepa Ñandejárape upe rrelihiónpe, haʼekuéra peteĩ família gueteri ha upéva nokambiái. Haʼe, hembireko ha ifamiliakuéra ikatu gueteri ojotrata yma guaréicha.

Umi oñemosẽ vaʼekue ikatu gueteri oho roñembyatyhápe jepi ha, oipotáramo, umi ansiáno ikatu oipytyvõ chupe omombarete jey hag̃ua ijerovia. Ore ningo roipotánte haʼe oñehaʼã ojapo umi mbaʼe oñekotevẽva, oiko jey hag̃ua chugui testígo de Jehová. Umi oñemosẽ vaʼekue omboyketéramo tekovai ha oñehaʼãmbaite ojapo umi mbaʼe heʼíva la Biblia, ikatu oĩ jey orendive kongregasiónpe.