Ehecha oĩva pype

Ehecha menú secundario

Testígo de Jehová

guarani

¿Mbaʼérepa umi testígo de Jehová noñentremetéi polítikape?

Ore testígo de Jehová ningo noroñentremetéi polítikape rosegígui umi konsého oĩva la Bíbliape. Avei ndorovotái peteĩ kandidátore, noroñehaʼãi rohupyty peteĩ kárgo polítiko ni ndorojapói manifestasión oñekambia hag̃ua peteĩ goviérno. Ore rotopa la Bíbliape heta prinsípio ohechauka porãva ndovaleiha roñentremete polítikape. Emañamína koʼã ehémplore:

  • Roñehaʼã rosegi Jesús ehémplo. Haʼe oĩrõ guare ko yvy ape ári ndoaseptái vaʼekue peteĩ kárgo polítiko (Juan 6:15). Haʼe voi heʼi vaʼekue isegidorkuéra ‘ndojeheʼái vaʼerãha ko múndore’, ha upévare haʼekuéra ndoapojái vaʼekue ni peteĩ partído polítiko (Juan 17:14, 16; 18:36; Marcos 12:13-17).

  • Ore rojerovia Ñandejára Rréinore añoite. Jesús voi oñeʼẽ vaʼekue ko goviérnore, heʼívo: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári” (Mateo 24:14). Ore testígo de Jehová ningo roapoja Ñandejára Rréinope añoite, tahaʼe haʼéva pe tetã roĩháme. Upéicha rupi noroñentremetéi polítikape, síno akóinte romombeʼu upe goviérno hiʼag̃uimbaitemaha (2 Corintios 5:20; Efesios 6:20).

  • Ndoroapojái rupi ni peteĩ partído polítiko, ikatu roñeʼẽ Ñandejára Rréinore opaichagua héntepe, tahaʼe haʼéva ipartído polítiko. Umi mbaʼe roʼéva ha rojapóva rupive, rohechauka rojeroviaha Ñandejára Rréino añoite osolusionataha umi provléma oĩva ko múndope (Salmo 56:11).

  • Ropartisipáramo polítikape, ndaikatumoʼãi rojogueraha porã ore ermanokuéra opa tetãygua ndive (Colosenses 3:14; 1 Pedro 2:17). Umi rrelihión oñentremetéva polítikape, pyʼỹinte oiko vai jepi oñondive (1 Corintios 1:10).

Rorrespeta umi goviérnope. Ndoropartisipáiramo jepe polítikape, rorrespeta umi autoridápe. Upéicha rokumpli hína pe mandáto oĩva Romanos 13:1-pe: “Opavave oñemoĩ vaʼerã mburuvichakuéra poguýpe”. Rokumpli umi léi, ropaga umi impuésto ha roipytyvõ ikatuha peve oĩ hag̃ua pyʼaguapy. Ore ningo arakaʼeve norombaʼapói umi goviérno kóntrape, síno rosegi pe konsého oĩva la Bíbliape ha ‘roñemboʼe umi rréi ha mburuvichakuéra rehehápe’, koʼýte odesidíta jave umi mbaʼe ikatúva oafekta umi rrelihiónpe (1 Timoteo 2:1, 2).

Upéicha avei, rorrespeta peteĩ persóna odesidíta jave oikétapa térã ndoikemoʼãi polítikape. Por ehémplo, ndorojokói umi ovotasévape ni noromolestái avavépe oiko jave eleksión.

¿Koʼág̃antepa ore testígo de Jehová rojedesidi ndoroikemoʼãiha polítikape? No, umi apóstol ha kristianokuéra síglo primérope guare ojedesidi vaʼekue avei upéicha. Peteĩ lívro oñeʼẽva umi kristiáno ypykuére heʼi: “Haʼekuéra ningo oikuaa orrespeta vaʼerãha umi autoridápe, péro oikuaa avei hikuái ndoikéi vaʼerãha polítikape” (Beyond Good Intentions—A Biblical View of Politics [Más que buenas intenciones. La visión bíblica de la política]). Avei peteĩ teólogo, hérava Orígenes ha oiko vaʼekue éntre síglo 2 ha 3, omombeʼu “umi kristiáno ypykue ndoaseptái hague ni peteĩ kárgo polítiko”.

¿Oipyʼapy vaʼerãpa umi goviérnope ore noroñentremetéi haguére polítikape? No, ore ningo roñehaʼã roiko pyʼaguapýpe enterovéndi, upévare umi autorida natekotevẽi okyhyje orehegui. Peteĩ infórme ojapo vaʼekue pe Academia Nacional de Ciencias de Ucrania áño 2001-pe, omombeʼu mbaʼérepa ore testígo de Jehová ndoroikéi polítikape, haʼekuéra heʼi: “Ikatu ningo koʼág̃a peve hetápe ndogustái umi testígo de Jehová odesidi haguére ndoikéi polítikape. Umi goviérno nási ha komunísta okondena voi katu chupekuéra upévare. [...] Péro upe situasiónpe jepe, haʼekuéra orrespeta umi léi ha iñonrrádo itravahohápe. Ha ombaʼapóramo jepe umi gránha guasúpe térã favrikaháre, haʼekuéra nopensái ijehénte, síno siémpre omotenonde hapichápe. Upévare umi goviérno komunístape ndoipyʼapýi vaʼekue umi testígo opuʼãrõ g̃uarã hesekuéra”. Pe infórme avei heʼi umi mbaʼe opraktikáva ha ogueroviáva umi testígo de Jehová koʼág̃a peve, “ndoapeligraiha ni peteĩ tetãme”.