Ehecha oĩva pype

Ehecha menú secundario

Testígo de Jehová

guarani

¿Mbaʼérepa umi testígo de Jehová ndofestehái umi kumpleáño?

Ore testígo de Jehová ningo ndorofestehái umi kumpleáño roime rupi segúro Ñandejárape ndogustaiha upéva. La Biblia ndeʼíriramo jepe derechoite ndovaleiha jafesteha umi kumpleáño, oĩ heta versíkulo ñanepytyvõva jaikuaa hag̃ua mbaʼépa Ñandejára opensa umívare. Jahechamína 4 ehémplo.

  1. Umi ndoadoráiva Ñandejárape omoñepyrũ vaʼekue upe kostúmbre. Peteĩ lívro heʼi ojefesteha hague umi kumpleáño pórke ojegueroviámi “umi espíritu ha fantásma ojaprovechaseha upe féchare oataka hag̃ua pe kumpleañérope”, ha oñepensa “oĩramo upépe iñamigokuéra ha ofelisitajoa chupe hikuái, ndojehumoʼãiha chupe mbaʼeve” (Funk & Wagnalls Standard Dictionary of Folklore, Mythology, and Legend). Ótro lívro omombeʼu yma oñeanota hague mbaʼe féchapepa onase umi persóna, ikatu hag̃uáicha ojepuru pe astrolohía ojejapo hag̃ua umi oróskopo. Pe lívro heʼive: “Ojeguerovia avei umi véla ojepurúva kumpleañohápe orekoha máhia, ikatúva omeʼẽ ndéve rejeruréva guive” (The Lore of Birthdays).

    ¿Ha mbaʼépa Ñandejára opensa pe máhiare? La Biblia heʼi porã chupe ndogustaieteha voi pe máhia, pe espiritísmo, umi ojapóva paje ni mbaʼeveichagua vruhería (Deuteronomio 18:14; Gálatas 5:19-21). Haʼe okastiga vaʼekue voi umi Babiloniaguápe oipuru haguére pe astrolohía oadivina hag̃ua mbaʼépa oikóta tenonderã (Isaías 47:11-15). Ore testígo de Jehová ningo ndoroikói roinvestiga mbaʼéichapa oñepyrũ raʼe káda kostúmbre oĩva ko múndope; péro la Biblia ohechauka porã pe espiritísmo ivaietereiha, upévare romboykete oimeraẽ kostúmbre orekóva ke ver pe espiritísmondi.

  2. Umi kristiáno yma guare ndofestehái vaʼekue ikumpleáño. Peteĩ ensiklopédia heʼi umi kristiáno ypykue “ohechakuaa hague umi kumpleáño ouha umi pagánogui”, térã umi rrelihión japúgui (The World Book Encyclopedia). Ha la Biblia ohechauka porã umi kristiáno tekotevẽha osegi pe ehémplo oheja vaʼekue umi apóstol ha umi ótro disípulo Jesús omboʼe vaʼekue (2 Tesalonicenses 3:6).

  3. Umi kristiánope noñemandái ogueromanduʼa hag̃ua ni peteĩ nasimiénto, síno Jesús omano hague día añoite (Lucas 22:17-20). La Biblia heʼi voi: “Pe ñemano ára iporãve pe nasimiénto áragui” (Eclesiastés 7:1, ÑÑB). Jesús omanórõ guare ohechauka Itúvape ikatuha ojapo ojeruréva guive chupe ijetuʼúramo jepe, ha Ñandejára omeʼẽ chupe “peteĩ téra iporãvéva umi ánhel réragui” jepe. Upévare jaʼekuaa pe día omano hague iñimportanteveha inasimiénto díagui (Hebreos 1:4).

  4. La Biblia ndeʼíri umi oadoráva Ñandejárape ofesteha hague ikumpleáño. ¿Ikatúpa jaʼe umi oskrivíva la Biblia hesaráinte hague ha upévare nomombeʼúi Ñandejára siervokuéra ofesteha hague ikumpleáño? Nahániri, pórke upépe oñemombeʼu mokõi kumpleáño ojapo vaʼekue umi ndoadoráiva Ñandejárape, ha jahechakuaa ivai hague umi mbaʼe oiko vaʼekue upérõ (Génesis 40:20-22; Marcos 6:21-29).

¿Opensápa umi mitã ojavyha hína heta mbaʼe porã ituvakuéra Testígo ndofestehái haguére umi kumpleáño?

Umi testígo de Jehová ohayhueterei ifamíliape, ojapoháicha entéro umi túva ipyʼaporãva. Upévare omeʼẽ chupekuéra rregálo oimeraẽ díante ha ojapo jepi chupekuéra fiestíta ojediverti hag̃ua. Koʼã túva oñehaʼãmbaite osegi Ñandejára ehémplo ha omeʼẽ heta mbaʼe porã ifamíliape (Mateo 7:11). Upévare umi mitã ovyʼa ha nopensái ojavyha hína álgo iporãva ndofestehái haguére ikumpleáño. Jahecha porã upéva koʼã mitã heʼívare:

  • “Igustoiteve jarresivi rregálo ñahaʼarõʼỹve jave.” (Tammy, orekóva 12 áño.)

  • “Che tuvakuéra nomeʼẽi chéve rregálo che kumpleáñope, péro omeʼẽ chéve oimeraẽ díante. Ha chéve chegusta voi la sorprésa.” (Gregory, orekóva 11 áño.)

  • “Umi kumpleañohápe umi mitã oñembyaty sapyʼaite, hoʼuʼimi tórta, opurahéi ha opáma. Chéve ndachegustái upéicha. Chegustaitereive umi fiestíta rojapóva jepi ógape.” (Eric, orekóva 6 áño.)