Ehecha oĩva pype

Ehecha menú secundario

Testígo de Jehová

guarani

¿Mbaʼépa opensa umi testígo de Jehová umi funerál rehe?

Umi mbaʼe roguerovia ha rojapóva umi funerálpe, oñemopyenda la Biblia heʼívape. Por ehémplo:

  • Rombyasyeterei omano jave peteĩ rohayhúva. Jesús disipulokuéra hasẽ vaʼekue omanórõ guare chuguikuéra ihénte térã iñamígo ohayhúva (Juan 11:33-35, 38; Hechos 8:2; 9:39). Upévare oréve g̃uarã noĩporãi ojejapóramo fiésta ha umícha oĩramo omanóva (Eclesiastés 3:1, 4; 7:1-4). Upéva rangue, roaprovecha umícha jave rohechauka hag̃ua ore rapichakuérape rombyasyha hendivekuéra (Romanos 12:15).

  • Umi omano vaʼekue noñandúi ni ndoikuaavéima mbaʼevete. Tahaʼe haʼéva ore país térã ore kultúra, ore romboyke oimehaichagua kostúmbre térã tradisión ojejapóva oñeimoʼãgui umi omano vaʼekue osegiha oikove ótro ládo, o ikatuha ñanepytyvõ térã ojapo ñanderehe mbaʼe vai. Ore romboyke koʼã mbaʼe roikuaágui umíva nomboʼeiha la Biblia (Eclesiastés 9:5, 6, 10). Upévare umi funerálpe ore ndorojapói peteĩ karu guasu, novenário, ndoroikói romboarete káda áño umi omano vaʼekue ára, ndoroguerahái rregálo umi omano vaʼekuépe, ndoroikói rombaʼeporandu térã roñeʼẽ chupekuéra ni noroñembolútoi umi omanóva rehehápe. Ore rosegi ko konsého omeʼẽva la Biblia: “Pejeíke chuguikuéra [...] ha anivéke pepoko pe mbaʼe kyʼa rehe” (2 Corintios 6:17).

  • Umi omano vaʼekue oikove jeýta. La Biblia omboʼe koʼẽrõitéma umi omano vaʼekue oikove jeytaha ha avave nomanomoʼãveimaha (Hechos 24:15; Apocalipsis 21:4). Ojapo haguéicha umi kristiáno ypykue, ore ndoroikói roñembyasyháre heta tiémpore, ku ndororekoiramoguáicha esperánsa (1 Tesalonicenses 4:13).

  • La Biblia heʼi ani hag̃ua ñañemombaʼeguasu. (Proverbios 11:2). Rojapo jave peteĩ funerál ore ndoroaprovechái ko oportunida rojechauka hag̃ua (1 Juan 2:16). Oĩ algúno ojapóva fiésta voi pe funerál aja, péro ore ndorojapói upéva. Ndoroikói avei rojogua peteĩ atau hepyeterei rasáva ni ndoroipurúi umícha jave umi ao hepyetereíva rojechauka hag̃ua.

  • Ndoroovligái ótrope ojapo hag̃ua ore rojapoháicha. Upéva rangue roreko enkuénta la Biblia heʼíva: “Káda únope Ñandejára ñandehusgáta umi mbaʼe jajapóvare” (Romanos 14:12). Ha oĩramo oporandúva oréve ore kreénsiare roaprovecha roexplika hag̃ua upéva, péro rojapo pyʼaporãme ha rohechauka rorrespetaha ore rapichakuérape (1 Pedro 3:15).

¿Mbaʼéichapa umi testígo de Jehová ojapo umi funerál?

Moõpa ojejapo: Pe omano vaʼekue hentekuéra odesidíramo ojejapotaha peteĩ funerál, haʼekueraite oiporavo pe lugár ojejapotaha. Ikatu peteĩ Salón del Réinope, salón velatóriope, hógape, sementériope térã ojejapotahápe pe kremasión.

Mbaʼéichapa ojejapo: Ikatu hag̃uáicha oñekonsola umi ihentemanóvape, ojejapo peteĩ diskúrso oñemombeʼuhápe mbaʼépa heʼi la Biblia umi omano vaʼekuére ha avei oñeñeʼẽ pe rresurreksiónre (Juan 11:25; Romanos 5:12; 2 Pedro 3:13). Pe diskúrsope oñemombeʼu umi kualida porã oreko vaʼekue upe omanóva ha avei ojeʼe mbaʼéichapa ikatu ñandefiél avei haʼe ifiél haguéicha (2 Samuel 1:17-27).

Ikatu avei ojepurahéi peteĩ músika oñemopyendáva la Biblia heʼívare (Colosenses 3:16). Ha oñemohuʼã hag̃ua ojejapo peteĩ orasión (Filipenses 4:6, 7).

Mboýpa ojekovra. Ore ndorokovrái mbaʼevete rojapo haguére peteĩ diskúrso ni mbaʼeveichagua servísio rrelihióso. Ha núnka ndorojapói kolékta ni peteĩ ore rreuniónpe (Mateo 10:8).

Mávapa ikatu oho. Oimeraẽva ikatu oho. Ojejapo jave pe Salón del Réinope peteĩ funerál térã oimehaichagua rreunión, ndojekovrái entráda. Upévare umi ndahaʼéiva testígo de Jehová ikatu oho avei.

¿Ikatúpa umi testígo de Jehová oho umi funerál ojapóvape ótra rrelihión?

Upéva káda Testígo odesidi vaʼerã, asegún la ikonsiénsia heʼi chupe (1 Timoteo 1:19). Péro ndoropartisipái oiméramo upépe ojejapo peteĩ mbaʼe oñemoĩva la Bíbliare (2 Corintios 6:14-17).