Ehecha oĩva pype

Ehecha menú secundario

Testígo de Jehová

guarani

¿Umi testígo de Jehová piko oovliga la héntepe okambia hag̃ua de rrelihión?

Nahániri, ore ndorojopýi avavépe okambia hag̃ua de rrelihión. Pe rrevísta ore voi rojapóva, hérava La Atalaya (guaraníme Ñemañaha), heʼi vaʼekue: “Ivai ningo ojeovligase la héntepe okambia hag̃ua irrelihión”. * ¿Mbaʼérepa ndorojapói upéva?

  • Jesús núnka ndoovligái avavépe oasepta hag̃ua umi mbaʼe omboʼéva. Haʼe oikuaa porã vaʼekue naentéroi ohendusetaha chupe (Mateo 7:13, 14). Peteĩ vuéltape, unos kuánto idisípulo ipochy pórke ndogustái chupekuéra peteĩ mbaʼe haʼe omboʼéva ha upévare oheja rei chupe. Ha upérõ Jesús ndoovligái chupekuéra opyta hag̃ua (Juan 6:60-62, 66-68).

  • Jesús ndeʼíri vaʼekue idisipulokuérape oovliga hag̃ua la héntepe okambia hag̃ua umi mbaʼe ogueroviáva. Síno heʼi chupekuéra oñehaʼã hag̃ua oheka umi hénte ohendusévape pe mensáhe opredikáva hikuái (Mateo 10:7, 11-14).

  • Ndaideprovechomoʼãi peteĩ persónape okambiárõ irrelihión ojeovligáguinte chupe. Ñandejára ndoipotái jaadora chupe oĩ rupi ñandeovligáva, síno oipota jaservi chupe ñande pyʼaite guive (Deuteronomio 6:4, 5; Mateo 22:37, 38).

¿Ojapópa umi testígo de Jehová oimeraẽ mbaʼe umi hénte oike hag̃ua irrelihiónpe?

Nahániri. Añetehápe ore roñehaʼã ropredika “mombyryvehápe [jepe] ko yvy tuichakuére”, ha rojapo upéva “opavave renondépe ha ogahárupi”, heʼiháicha la Biblia (Hechos 1:8; 10:42; 20:20). Péro roikuaa avei káda uno odesidi vaʼerãha mbaʼe rrelihiónpepa ohóta ha upévare ndorojopýi avavépe oguerovia hag̃ua la romboʼéva. Umi kristiáno yma guarépe ojeakusa vaʼekue omboligaha la héntepe okambia hag̃ua irrelihión ha péicha oñemoĩha pe léi kóntrape. Ha koʼã tiémpope oĩ avei heʼíva upéicha orerehe (Hechos 18:12, 13). Péro umi heʼíva koʼã mbaʼe ijapu. Ore ningo roipotánte la hénte oreko oportunida oikuaávo mbaʼépa omboʼe la Biblia ikatu hag̃uáicha odesidi porã.

Oĩ rrelihión heʼíva ijehe kristianoha ha ojapóva oimeraẽ mbaʼe ihénte hetave hag̃ua. Por ehémplo, ombojeheʼa pe rrelihión polítikare, térã opromete umi héntepe omeʼẽtaha pláta térã hetave mbaʼe oikéramo irrelihiónpe. Péro ore ndorojapói upéicha roikuaágui ndahaʼéi hague upéva la Jesús omboʼe vaʼekue. *

¿Orekópa derécho peteĩ persóna okambiávo irrelihión?

Abrahán oheja vaʼekue ituvakuéra rrelihión

Si, la Biblia ohechauka káda uno ikatuha odesidi mbaʼe rrelihiónpa osegíta, ha natekotevẽi katuete osegi ituvakuéra rrelihión. Por ehémplo, Ñandejára Ñeʼẽ omombeʼu Abrahán, Rut, apóstol Pablo ha algúno oiko vaʼekue Aténaspe okambia hague irrelihión oservi porã hag̃ua Ñandejárape (Josué 24:2; Rut 1:14-16; Hechos 17:22, 30-34; Gálatas 1:14, 23). La Biblia heʼi avei peteĩ persóna ojeiséramo pe rrelihión Ñandejára oguerohorývagui, orekoha derécho odesidi hag̃ua upéva, noĩporãiramo jepe la ojaposéva (1 Juan 2:19).

Pe Declaración Universal de Derechos Humanos heʼi “enterovéva ikatuha okambia de rrelihión térã ikreénsia”. Heʼi avei opavave orekoha derécho “oinvestiga, orresivi térã omombeʼu hag̃ua informasión ha idéa”. * Pe ONU heʼi voi umi léi internasionál odefendéva umi hénte derécho oñemopyendaha ko Declaraciónpe. Ha koʼã mbaʼe ohechauka porã avei tekotevẽha jarrespeta ñande rapichakuérape odesidi jave orrechasa umi kreénsia ndogustáiva chupekuéra.

¿Omotĩpa ifamíliape peteĩ persóna okambiáva irrelihión?

Ndahaʼéi katuete upéicha. La Biblia ñanemokyreʼỹ jarrespeta hag̃ua opavavépe, tahaʼe haʼéva irrelihión (1 Pedro 2:17). Heʼi avei ñamombaʼe vaʼerãha ñande tuvakuérape. Upévare ore testígo de Jehová rokumpli ko mandáto, ore tuvakuéra oĩramo jepe ótro rrelihiónpe (Efesios 6:2, 3).

Péro lomímonte oĩ opensáva ivaiha peteĩ persóna okambia irrelihión. Por ehémplo, peteĩ kuñakarai okakuaa vaʼekue Zámbiape heʼi: “Pe lugár che akakuaa haguépe, oñepensa voi umi okambiáva irrelihión [...] otraisionaha ifamília ha ikomunidápe”. Upéicharõ jepe, haʼe ostudia vaʼekue la Biblia umi testígo de Jehovándi ikuñataĩme ha odesidi okambia irrelihión. ¿Mbaʼéichapa orreaksiona ihentekuéra? Haʼe heʼive: “Che túva ha che sy heta vése heʼi chéve ipochyetereiha chendive ha adesepsionaha chupekuéra. Upéva ijetuʼueterei chéve pórke che ndapytavaiséi hendivekuéra [...]. Adesidi hague aservi Jehovápe asegi rangue umi tradisión rrelihiósa ningo ndeʼiséi che atraisionaha che famíliape”. *

^ párr. 2 Ehecha La Atalaya 1 de enero de 2002, páhina 12, párrafo 15.

^ párr. 8 Por ehémplo, áño 785 rupi pe rréi Carlomagno omoĩ peteĩ léi umi oikóvape g̃uarã pe sóna héravape Sajonia, upe léi heʼi ojejuka vaʼerãha umi ndojevautisaséivape kómo kristiáno. Ótro ehémplo jatopa pe akuérdo ofirma vaʼekuépe mokõi grúpo oĩva pe Sacro Imperio Románope áño 1555-pe, hérava Paz de Augsburgo. Ko akuérdo heʼi umi prínsipe oĩva káda sónape olehi vaʼerãha oikótapa chugui katóliko térã luteráno, ha entéro umi oĩva ipoguýpe ojapo vaʼerã haʼéicha. Ndoikeséiva guive upe rrelihiónpe, oñemosẽ upe lugárgui.

^ párr. 11 Koʼãichagua derécho oĩ avei koʼã dokuméntope: pe Carta Africana de Derechos Humanos y de los Pueblos, pe Declaración Americana de los Derechos y Deberes del Hombre, pe Carta Árabe de Derechos Humanos de 2004, pe Declaración de Derechos Humanos de la Asociación de Naciones del Sudeste Asiático, pe Convenio Europeo de Derechos Humanos ha pe Pacto Internacional de Derechos Civiles y Políticos. Péro naentéroi umi país okumpli peteĩchapa koʼã mbaʼe.

^ párr. 14 La Biblia heʼi Ñandejára tee heraha Jehová.