Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Diciembre de 2015

 OJEKUAASÉVA JEPI

¿Ivaípa umi mbaʼe ojejapóva Navidad tiémpope?

¿Ivaípa umi mbaʼe ojejapóva Navidad tiémpope?

Ymaite guive ojeʼe umi kristiáno ofestehaha pe Navidad ogueromanduʼa hag̃ua Jesús onase hague ára. Péro heta umi kostúmbre ojesegíva ojefesteha jave ko arete oñepyrũ ótra kosaitégui, ndahaʼéi ojegueromanduʼa hag̃ua Jesúspe.

Por ehémplo, oĩ heta omombaʼéva Papa Noélpe upe féchape. Haʼe ningo guaʼu peteĩ karai horýva, ivárva morotĩva, hova renyhẽ asýva ha omondéva peteĩ ao pytã. Peteĩ emprésa Estados Unidospegua ovendéva gaseósa oinventa vaʼekue ko personáhe áño 1931-pe ojapo hag̃ua propagánda Navidad tiémpope. Áño 1950 rire, Brasílpe oñetantea vaʼekue oñemyengovia Papa Noélpe ótro personáhe rupive, hérava Abuelo Indio, péro noñekonsegíri. Heʼiháicha peteĩ profesór hérava Carlos E. Fantinati, Papa Noel ndahaʼéi voi oganánteva pe Abuelo Índiope, síno avei “ogana pe níño Jesúspe ha oiko chugui pe rrepresentánte ofisiál pe fiésta ojejapóvape el 25 de diciembre”. Péro, ¿oĩvépa kostúmbre ivaíva ojesegíva Navidad tiémpope? Jaikuaa hag̃ua upéva, jahecha vaʼerã umi mbaʼe oiko vaʼekue oñepyrũrõ guare pe kongregasión kristiána.

Peteĩ ensiklopédia heʼi: “Oñepyrũ guive pe kongregasión umi kristiáno ndoipotaiete vaʼekue ojefesteha ikumpleáño umi ojejuka vaʼekuépe ojerovia rupi Jesúsre, ha ni Jesúspe voi. Ha osegi upéicha 200 áñorupi” (Encyclopedia Britannica). ¿Mbaʼérepa umi kristiáno opensa vaʼekue upéicha? Haʼekuéra ohechakuaa umi kumpleáño ouha umi pagánogui ha upévare oevitaite voi. Ha añetehápe ni peteĩ párte la Bíbliape nomombeʼúi arakaʼetépa onase raʼe Jesús.

Umi kristiáno ypykue oñemoĩ mbarete vaʼekue ani hag̃ua ojefesteha umi kumpleáño. Upéicharamo jepe, mas de 300 áño Jesús omano rire, pe iglésia katólika omoñepyrũ pe Navidad. ¿Mbaʼérepa ojapo hikuái upéva? Pórke haʼekuéra ohechakuaa hetaiterei hénte osegiha umi rrelihión pagána Romagua ha ojepokuaaiterei umi fiésta ojapóvare hikuái roʼy tiémpope. Peteĩ lívro omombeʼu mbaʼépa ojapo la majoría umi rrománo káda áño, 17 de diciembre guive 1 de enero peve: “[Haʼekuéra] ofarrea, ohuga, ojediverti, odesfila ha ojapo hetave fiésta omombaʼeguasu hag̃ua idioskuérape” (Christmas in America [La Navidad en América], oskrivíva Penne L. Restad). Ha 25 de diciémbrepe umi rrománo ofesteha onaseha pe Kuarahy Ijojahaʼỹva. Pe iglésia odesidívo ojefesteha Navidad upe díape okonvense heta rrománope ofesteha hag̃ua Jesús nasimiénto, ofesteha rangue pe kuarahy nasimiénto. Ótro lívro heʼi avei péicha umi rrománo “osegiha ojapo umi fiésta ojepokuaáva voi ojapo hikuái roʼy tiémpope” ha “ofestehaha umi arete pyahu yma guaréicha” (Santa Claus, a Biography [La biografía de Santa Claus], oskrivíva Gerry Bowler).

Upéicharõ, pe Navidad oñepyrũ umi kostúmbre pagánagui, ha upévare naiporãi ojefesteha. Peteĩ lívro heʼi voi pe Navidad haʼeha “peteĩ fiésta pagána, oñembohéra guaʼúva fiésta kristiána” (The Battle for Christmas [La batalla en pro de la Navidad], oskrivíva Stephen Nissenbaum). Upévare jaʼekuaa pe Navidad nomombaʼeiha Ñandejára ha Itaʼýra Jesucrístope. ¿Iñimportántepa upéva? La Biblia heʼi: “¿Mbaʼéicha piko ojoajúta tekoporã ha tekoaña? Térã, ¿mbaʼépe piko ojojogua ára ha pyhare?” (2 Corintios 6:14). Pe Navidad ojogua peteĩ yvyramáta okakuaa karẽmavape ha ndaikatuvéimava oñenderesa (Eclesiastés 1:15).