Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Octubre de 2015

 LA BIBLIA OKAMBIA CHUPEKUÉRA

Avyʼa ikatu haguére aipytyvõ ótrope

Avyʼa ikatu haguére aipytyvõ ótrope
  • ONASE: 1981-PE

  • PAÍS: GUATEMALA

  • ÓTRA INFORMASIÓN: HETA OSUFRI VAʼEKUE IMITÃME

CHE REMBIASAKUE:

Anase peteĩ puevloʼi héravape Acul, opytáva oéste de Guatemálape, oĩháme heta montáña. Che família ha che ropertenese peteĩ trívu indíhenape oúva umi Máyagui, hérava Ixil. Upévare che añeʼẽ español ha ixil avei. Che akakuaa vaʼekue gérra sivíl tiémpope, upe gérra ipuku vaʼekue 36 áño, ha upérõ heta che trivugua omano.

Che ermáno orekórõ guare 7 áño ohuga hína kuri peteĩ granádare ha okapumi hese. Che aĩ kuri hendive upérõ ha apyta siégo upe aksidénte káusa ha haʼe katu omanoite voi. Upérõ che areko kuri 4 áño ramo. Upe guive aha aiko peteĩ lugár ojekuidahápe umi mitã siégore, oĩva Ciudad de Guatemálape, ha upépe aaprende vaʼekue alee hag̃ua braille. Ndaikuaái mbaʼérepa, péro umi ombaʼapóva upépe oproivi chehegui añeʼẽ umi ótro mitãndi ha che kompañerokuéra katu chemboyke voi. Cheañohárente voi aikómi ha dos mése al áñonte ikatu vaʼekue aha ógape, upépe avyʼaiterei pórke che sy cherayhu ha chetrata porãiterei vaʼekue. Péro lastimósamente haʼe ou omano che arekópe 10 áño. Upéva chereja vaieterei, pórke aperde pe únika persóna cherayhu vaʼekue.

Arekópe 11 áño aha jey che vállepe ha ava che médio ermáno ha ifamília rógape. Haʼekuéra nombofaltái vaʼekue chéve mbaʼeve, péro avave nachepytyvõi avyʼa ha añeñandu porã hag̃ua. Sapyʼánte asapukáimi ha haʼe Ñandejárape: “¿Mbaʼére piko che sy omano? ¿Mbaʼéreiko che apyta siégo?”. Umi hénte heʼími chéve koʼã mbaʼe haʼeha Ñandejára volunta, upévare apensámi Ñandejára iñinhústo ha iñañaha. Upe tiémpope ikatúrire, ajesuisida vaʼerãmoʼã.

Oĩ vaʼekue ojaprovecháva chesiégo haguére ha che ndaikatúi ajapo mbaʼeve añedefende hag̃ua. Chemitãme heta vése ojeavusa cherehe, péro namombeʼúi umíva pórke apensa vaʼekue avavépe noimportamoʼãiha. La hénte noñeʼẽguasúi vaʼekue chendive ha che ndajeheʼaséi voi kuri hesekuéra pórke nakonfiái avavére. Añedeprimiete vaʼekue voi upe tiémpope.

LA BIBLIA CHEPYTYVÕ AKAMBIA HAG̃UA

: Arekórõ guare 13 áño, mokõi testígo de Jehová oho pe lugár che aikohápe ha oñeʼẽ chendive rrekréo aja. Peteĩ profesóra cheporiahuverekoiterei ha upévare ojerure chupekuéra chevisitami hag̃ua. Haʼekuéra ohechauka  chéve la Biblia rupive umi siégo ohecha jeytaha ha umi omanóva oikove jeytaha (Isaías 35:5; Juan 5:28, 29). Chéve chegusta vaʼekue la chemboʼéva hikuái, péro saʼi añemongeta hendivekuéra pórke ndajepokuaái añeʼẽ avavéndi. Haʼekuéra katu ipasiénsia ha ivuéno chendive, upévare osegi chevisita chemboʼe hag̃ua la Biblia. Ko matrimónio oguatámi 10 kilómetro umi montáñare og̃uahẽ hag̃ua pe lugár che aikohápe.

Che médio ermáno oñeʼẽvo chéve hesekuéra heʼi imboriahuha hikuái, péro lomímonte oñemonde porã. Haʼekuéra ndorekóiramo jepe heta mbaʼe, oguerúmi chéve rregaloʼi, ha che ahecharamoiterei upéva pórke ahechakuaa mbaʼeichaitépa oñeinteresa cherehe hikuái. Koʼã mbaʼe chekonvense haʼekuéra haʼeha kristiáno verdadéro, upévarente peichaite imbaʼeporã ha ojesakrifika hapichakuérare.

Che aipuru vaʼekue umi puvlikasión en braille astudia hag̃ua la Biblia. Ha antendepáramo jepe la aaprendéva, heta mbaʼe ijetuʼu chéve aasepta hag̃ua. Por ehémplo, ndaroviapái vaʼekue Ñandejára oñeinteresaha cherehe, ha oĩha avei persóna cherayhúva haʼéicha. Aaprende mbaʼérepa Ñandejára oheja gueteri oiko heta mbaʼe vai, péro ijetuʼu chéve ahecha hag̃ua chupe peteĩ túvaicha. *

Aaprendevévo la Biblia omboʼéva, mbeguekatúpe akambia apensa lája. Por ehémplo, aaprende Ñandejára ombyasyetereiha umi héntepe osufri jave. La Biblia omombeʼu haʼe heʼi hague umi isiérvo oñemaltratávare: “Ahecha mbaʼeichaitépa ohasa asy che puévlo [...]. Ahechapaite hína mbaʼéichapa ohasa asy hikuái” (Éxodo 3:7, NM). Ahechakuaávo Jehová ivuenoitereiha, adesidi aservitaha chupe. Upévare áño 1998-pe ajevautisa ha oiko chehegui testígo de Jehová.

Che ha pe ermáno cherresivi vaʼekue hógape

Un áñorupi ajevautisa rire, aha sapyʼaite peteĩ siuda héravape Escuintla arresivi hag̃ua peteĩ kúrso oñemeʼẽva umi siégope g̃uarã. Upe lugárpe oĩ vaʼekue peteĩ kongregasión, ha aĩ aja upépe peteĩva umi omoakãva pe kongregasión oñentera ijetuʼuetereiha chéve aha hag̃ua umi rreunión ojejapóvape Acúlpe, pórke ahasa vaʼerã umi montáña ojapo haguéicha pe matrimónio chemboʼe vaʼekue la Biblia. Upémarõ haʼe oñemongeta peteĩ família de Testígondi ikatu hag̃uáicha che ava hogapekuéra ha aha umi rreunión ojejapóvape Escuíntlape. Koʼag̃aite peve, haʼekuéra okuida cherehe haʼeramoguáicha ifamiliapegua.

Hetaiterei vésema ahechakuaa mbaʼeichaitépa cherayhu umi ermáno oĩva kongregasiónpe. Entéro umi mbaʼe ahasáva chekonvense umi testígo de Jehová haʼeha kristiáno verdadéro (Juan 13:34, 35).

UMI MBAʼE PORÃ AHUPYTÝVA:

Yma che apensa vaʼekue ndavaleiha mbaʼeverã, péro koʼág̃a napensavéima upéicha, areko voi peteĩ esperánsa iporãitereíva. Ha amboguapy rangue chejehe che situasión, aipuru che tiémpo amboʼe hag̃ua la héntepe umi mbaʼe porã oĩva la Bíbliape. Aservi avei kómo ansiáno pe kongregasiónpe ha ajapo jepi diskúrso umi kongregasión oĩvape pe che aikohárupi. Areko avei pe priviléhio ameʼẽvo diskúrso umi asambleahápe, ohohápe jepi hetaiterei hénte.

Aipuru jave pe Biblia en braille ajapo hag̃ua peteĩ diskúrso

Áño 2010-pe, aha vaʼekue El Salvadórpe pe Eskuéla de Entrenamiénto Ministeriálpe (koʼág̃a hérava Eskuéla Oñembokatupyryve hag̃ua umi Opredikávape). Umi mbaʼe aaprendéva upépe tuichaiterei chepytyvõ aservi porãve hag̃ua kongregasiónpe. Pe eskuéla rupive ahechakuaa avei mbaʼeichaitépa Jehová cherayhu ha chemombaʼe, haʼe ningo ikatu ombokatupyry oimeraẽvape ojapo hag̃ua ivolunta.

Jesús heʼi vaʼekue: “Javyʼaiteve ñameʼẽvo, ñandéve oñemeʼẽ rangue” (Hechos 20:35). Koʼág̃a ahechakuaa ikatuha aipytyvõ che rapichakuérape, ha upéva chembovyʼaiterei. Núnka napensáiva peichaite peve añeñandu porãtaha.

^ párr. 13 Reikuaasevéramo mbaʼérepa Ñandejára oheja oiko heta mbaʼe vai, ikatu rehecha kapítulo 11-pe, lívro Mbaʼépa añetehápe omboʼe la Biblia?, ojapóva testígo de Jehová.