KONSÉHO OĨVA LA BÍBLIAPE: “Pesegíkena [...] peñoperdona pende pyʼaite guive, pejapo upéva oĩramo jepe penembopochýva. Jehová peneperdona haguéicha ipyʼaite guive, upéicha avei peẽ pejapo vaʼerã” (Colosenses 3:13).

¿Mbaʼépa heʼise? La Bíbliape oñekompara jepi peteĩ persóna opekáva peteĩ odevévare, ha ñaporoperdonáramo haʼete ñakanseláva upe déuda (Lucas 11:4). Peteĩ lívro heʼi pe palávra ojepurúva ojetradusi hag̃ua “ñaporoperdona” heʼiseha jepi “jaheja rei peteĩ déuda, ñanderesarái chugui ha ndajarrekerivéi upe odevévape ñandéve”. Upévare, jadesidíramo ñaperdona upe ofallávape heʼise hína ñañembyesaraimaha la oiko vaʼekuégui. Péro upéva ndeʼiséi avei oĩ porãha upe ojapo vaʼekue ha ndahasýi vaʼerãha ñandéve. Síno heʼise ñande jadesidiha ndajapytamoʼãiha ñandepyʼaro, jarekóramo jepe motívo ñandepochy hag̃ua.

¿Ideprovéchopa ko konsého? Ñande ningo ñaneimperfékto ha manterei jajavy (Romanos 3:23). Upévare ikuentave ñandéve ñaporoperdona, pórke peichaháguinte ñande avei ikatu jafalla ha jaipotáta ñande rapicha ñaneperdona. Avei, ñaporoperdonáramo ikatu jahupyty heta mbaʼe. ¿Mbaʼe mbaʼépa umíva?

Ñandepochýramo ñande rapichándi, nañaperdonái chupe ha japyta ñandepyʼaro, ñandénte la jajeperhudikátava. ¿Mbaʼérepa jaʼe upéva? Pórke nañaperdonáiramo ñapensa vaipáma voi ñande rapicháre ha jaju ndajavyʼavéi. Ha ikatu voi ñanderasy upéva káusa. Peteĩ infórme ojapo vaʼekue doktór Yoichi Chida ha pe profesór de psicología Andrew Steptoe heʼi: “Heta estúdio ohechauka umi persóna ipochy reíva ha ipyʼaróva ikatuha iprovléma ikorasõme” (Journal of the American College of Cardiology).

Péro, ¿mbaʼe iporãvapa ikatu jahupyty ñaporoperdonáramo? Primero, jaiko pyʼaguapýpe ñande rapichándi ha jajogueraha porãve hendive. Segundo, ha iñimportantevéva, péicha jasegi hína Ñandejára ehémplo. Haʼe ningo siémpre operdona umi opeka ha oñarrepentívape, ha oipota ñande avei jajapo upéicha (Marcos 11:25; Efesios 4:32; 5:1).