“¿MBAʼÉRE piko che? ¿Mbaʼére piko Ñandejára repermiti péicha oiko cherehe?”. Péicha oñelamenta vaʼekue peteĩ kuimbaʼe hérava Sidnei ha oikóva Brasílpe. Haʼe orekórõ guare 24 áño oñaksidenta vai vaʼekue peteĩ tovogán de águape ha opyta paralítiko.

Heta persóna opensa Ñandejára odesepsionaha chupekuéra oñaksidenta vaíramo, hasykatúramo, omanóramo chugui peteĩ persóna ohayhúva, oafektáramo chupe peteĩ desástre naturál térã oikóramo peteĩ gérra. Ymaite guive oĩ vaʼekue oñeñandúva péicha. Por ehémplo, Ñandejára siérvo hérava Job ohasa vaʼekue heta mbaʼe ijetuʼúva ha okulpa Ñandejárape umívare. Haʼe heʼi: “Che ajerure asy ndéve chepytyvõmi hag̃ua, péro nde nerepenái cherehe, apuʼã ahaʼarõ nde chepytyvõ, péro nde katu remañánte cherehe. Nde reñemoĩ cherehe ikuénta hag̃uáicha, nde py ha nde pópe reñorairõ che kóntrape” (Job 30:20, 21, NM).

Job ndoikuaái vaʼekue máva káusare la ohasa asyete. Péro la Biblia heʼi ñandéve mbaʼérepa koʼág̃a oiko hetaite mbaʼe vai ha mbaʼéichapa ñambohovái vaʼerã umíva.

¿OIPOTÁPA ÑANDEJÁRA JASUFRI?

La Biblia heʼi Ñandejára ojapo porãha opa mbaʼe ha ihustoha, ikatuha jajerovia hese ha ndojapoiha mbaʼeve hendapeʼỹ (Deuteronomio 32:4). Upéicharõ, ¿ikatúpa ñapensa Ñandejára ñanembohasa asyha térã ombouha ñandéve peteĩ desgrásia ñandekastiga hag̃ua? Naisentidomoʼãingo upéva, ¿ajépa?

La Biblia heʼi voi: “Ani avave heʼi ohasa asy jave: ‘Ñandejára ombou chéve ko jehasa asy chetantea hag̃ua’, avave ndaikatúigui ojapouka ivaíva Ñandejárape, ha haʼe nomoĩri avei ñane renondépe mbaʼeve ivaíva ñanetantea hag̃ua” (Santiago 1:13). La Biblia heʼi Ñandejára ojapo hague Adán ha Évape perfékto ha omeʼẽ chupekuéra peteĩ lugár neporãva oiko hag̃ua, peteĩ traváho ombovyʼáva chupekuéra ha opa mbaʼe oikotevẽva. Ñandejára heʼi avei chupekuéra: “Penefamília retákena ha peñemboheta hetave ha pemyenyhẽ ko yvy ha peipuru”. Añetehápe Adán ha Eva ndaikatúi vaʼekue ojekeha Ñandejáragui (Génesis 1:28, NM).

Péro koʼág̃a ñane situasión ni michĩmi ndojoguái Adán ha Eva situasiónpe. Ñande hetaiterei mbaʼe vaíma jahasa ha jasufri. La Biblia heʼi voi: ‘Entéro Ñandejára rembiapokue koʼag̃aite peve ipyahẽ ha ohasa asy oñondivepa’ (Romanos 8:22). ¿Mbaʼéicha rupípa ñag̃uahẽ ko situasión ivaietévape?

¿MBAʼÉREPA JASUFRI?

Yvyporakuéra oñepyrũ ohasa asy peteĩ ánhel opuʼãrõ guare Ñandejára kóntrape. Ko ánhelpe upe rire oñehenói Satanás, haʼe oity Adán ha Évape iñuhãme ha upévare haʼekuéra opuʼã avei Ñandejára kóntrape. ¿Mbaʼéichapa oiko vaʼekue upéva? Ñandejára heʼi chupekuéra ndoʼúi vaʼerãha “pe yva orekóva pe yvyramáta ohechaukáva mbaʼépa iporã ha mbaʼépa ivai”, pórke hoʼúramo omanóta. Satanás katu heʼi Évape hoʼúramo pe yva nomanomoʼãiha hikuái, ha péicha ontendeka Ñandejára ijapuha. Heʼi avei yvyporakuéra ikatuha odesidi ijeheguiete mbaʼépa oĩ porã ha mbaʼépa oĩ vai, péro Ñandejára oipeʼaha chuguikuéra upe derécho (Génesis 2:17; 3:1-6). Péicha Satanás ontendeka oho porãvetaha yvyporakuérape oñemomombyrýramo Ñandejáragui. Upéva káusare tekotevẽ kuri oñembohovái ko porandu iñimportantetéva: ¿Oho porãvénepa añete yvyporakuérape Ñandejára reheʼỹ?

Satanás heʼi avei yvyporakuéra oserviha Ñandejárape okonveníguinte chupekuéra. Haʼe heʼi voi Ñandejárape Job rehe: “Nde ningo haʼete voi remoĩva ijerére peteĩ murálla, péicha rekuida hese, ifamiliakuérare ha opa mbaʼe orekóvare. [...] Péro eipeʼamíntena chugui opaite mbaʼe orekóva ha rehecháta nemaldesitaha nde rovaitépe” (Job 1:10, 11, NM). Koʼápe Satanás oñeʼẽramo jepe Job rehe, haʼe ontendeka enterovéva jaserviha Ñandejárape jarresivíta rupi álgo upe haguére.

¿MBAʼÉPA ODESIDI OJAPO ÑANDEJÁRA?

¿Mbaʼéichapa oñesolusiona pe provléma omoñepyrũ vaʼekue Satanás? Ñandejára oheja umi yvypóra ogoverna peteĩ tiémpore ha péicha enterove okomprováta mávapa ñanegoverna porãve. Haʼe ningo iñarandueterei  ha ohechakuaa upéicha añoite ikatuha oñesolusiona upe provléma (Romanos 11:33).

Yvyporakuéra ogoverna ypy guive ko múndo oho vaive hese, ndaipóri pyʼaguapy ni vyʼa ha la hénte oiko kyhyjepópe. Ha ndahaʼéi upévante, síno haʼekuéra voi la ohundipapotaitéva ko yvy. Upéva ohechauka porãiterei haʼekuéra ndorekoiha pe kapasida ñanegoverna hag̃ua. Ajeve voi ningo la Biblia heʼi: “Yvypóra ndaikatúi ijehegui reínte oiporavo porã haperã” (Jeremías 10:23, NM). Ñandejára ogoverna vove añoite ikatúta javyʼa, ñandepyʼaguapy ha jaiko porã. Upéva ningo haʼe la oipotáva ñandéve g̃uarã (Isaías 45:18).

¿Mbaʼéichapa Ñandejára okumplíta ipromésa? Jesús omboʼe vaʼekue idisipulokuérape ojerure hag̃ua Ñandejárape: “Tou ne Rréino, tojejapo ne rembipota yvy ape ári yvagapeguáicha” (Mateo 6:10). Ha koʼẽrõitéma oñekumplíta upéva, Ñandejára Rréino oipeʼáta opa mbaʼe ñanembosufríva (Daniel 2:44). Upérõ g̃uarã ndaiporimoʼãvéima imboriahúva, hasýva ni omanóva. La Biblia heʼi voi: “Umi imboriahúva ningo ojerure asy ajúda, ha [Ñandejára] katuete osalváta chupekuéra” (Salmo 72:12-14, NM). Heʼi avei upe tiémpope ndaiporimoʼãveimaha heʼítava: “Cherasy hína” (Isaías 33:24). ¿Ha mbaʼépa oikóta umi persóna omanóma vaʼekuégui? Ñandejára Ñeʼẽ heʼi: “Ani pehecharamo ko mbaʼe, og̃uahẽtagui pe óra opavave umi oĩva pe sepultúrape ohendutaha [Jesús ñeʼẽ] ha osẽta” (Juan 5:28, 29). ¡Ajépa iporãite koʼã promésa!

Jajepyʼamongeta meméramo Ñandejára promésare, ñanepytyvõta jajerovia jey hag̃ua hese

MBAʼÉICHAPA IKATU JAJEROVIA JEY ÑANDEJÁRARE

Diecisiete áño haguépe, Sidnei, pe kuimbaʼe oñemensionáva oñepyrũvo ko artíkulo, heʼi: “Che núnka ndakulpái Ñandejárape pe aksidéntere, péro arrekonose apensa hague haʼe chedesepsionaha. Sapyʼánte añeñandu vaieterei ha cherasẽ apensávo che situasiónre. Péro la Biblia rupive ahechakuaa pe aksidénte ndahaʼeiha Ñandejára kastígo. Upépe ningo heʼi voi ‘umi mbaʼe ñahaʼarõʼỹva ha umi tiémpo ijetuʼúva ohupytyha enterovépe’. Ha ikatu hag̃uáicha chekyreʼỹ ha añemoag̃uive Jehováre, siémpre añemboʼe ha alee umi téxto de la Biblia chepytyvõtava” (Eclesiastés 9:11, NM; Salmo 145:18; 2 Corintios 4:8, 9, 16).

Ñaaprendévo mbaʼérepa Ñandejára oheja gueteri jasufri ha avei jaikuaávo koʼẽrõitéma koʼã mbaʼe opataha, ñanepytyvõ jajerovia jey hag̃ua Ñandejárare. Ikatu ñaime segúro haʼe “omyengovia porãha umi oñehaʼãvape ipyʼaite guive ojapo hembipota”. Upévare, jajeroviákena Ñandejára ha Itaʼýrare, haʼekuéra ningo núnka nañanedesepsionamoʼãi (Hebreos 11:6; Romanos 10:11).