Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Septiembre de 2015

 TEMBIASAKUE

Peteĩ mbaʼe chembovyʼavéva pe fámagui

Peteĩ mbaʼe chembovyʼavéva pe fámagui

Áño 1984-pe peteĩ pyharépe añepyrũ chefamosaiterei, upérõ ajelehi vaʼekue Miss Hong Kong. Che fóto osẽ umi diário ha rrevístape. Upe guive añepyrũ ameʼẽ diskúrso, asẽ télepe, amonde umi ao iporãvéva, apurahéi, ajeroky ha ajeheʼa meme umi persóna iñimportántevare, por ehémplo, pe governadór de Hong Kong.

Al áño sigiénte añepyrũ avei aaktua pelíkulape ha heta vése che haʼe vaʼekue la protagonísta. Ahahápente umi periodísta oho avei onohẽ hag̃ua chéve fóto térã chentrevista hag̃ua. Añeinvita inagurasionhápe, oñestrenatahápe umi pelíkula, umi séna iñimportántevape ha umícha. Chéntema voi la chefamósava.

Aaktua jave peteĩ pelíkula de aksiónpe

Che apensa vaʼekue chefamósaramo ndarekomoʼãiha voi provléma, péro kon el tiémpo ahechakuaa ndaupeichaiha. Che aaktua vaʼekue umi pelíkula de aksiónpe, ha pyʼỹi ajapeligrámi, pórke Hong Kóngpe ndojepuruguasúi vaʼekue ótra persónape ojapo hag̃ua umi párte ipeligrosovéva, ojejapoháicha Hóllywoodpe. Por ehémplo, peteĩ pelíkulape amaneha peteĩ móto ha ahasa peteĩ áuto ári. Avei heta umi pelíkula che ajapóva itieʼỹ ha iviolénto vaʼekue. Algúno katu satániko lénto voi.

Áño 1995-pe amenda peteĩ produktór de sínere. Haʼetévaicha arekopaitéva la aikotevẽva avyʼa hag̃ua: chefamósa, chepláta ha amenda porã. Upéicharõ jepe ndavyʼái ha añedeprimi, upévare adesidi ndajapomoʼãveimaha pelíkula.

CHEMANDUʼA AAPRENDE VAʼEKUÉRE CHEMITÃME

Upe tiémpope añepyrũ chemanduʼa umi mbaʼe aaprende vaʼekuére chemitãme ha ahechagaʼueterei. Che ermána ha che rohómi vaʼerã káda sábado rostudia hag̃ua la Biblia peteĩ família haʼévandi testígo de Jehová. Pe karai héra vaʼekue Joe McGrath, ha ore tío Jóente voi roʼe chupe, haʼe ostudia vaʼekue orendive ha umi mbohapy itajýrandi. Pe karai otrata porãiterei vaʼekue hembireko ha itajyrakuérape, ha pe famíliape entéronte ojoayhu ha ojogueraha porã. Chegustaiterei vaʼekue aha hendivekuéra irreunionhápe, ha ahámi avei sapyʼánte umi asambleahápe. Upe tiémpope avyʼa vaʼekue ha añeñandu porã umi testígo de Jehová apytépe.

 Péro ógape desástre vaʼekue. Che túva heta ombosufri che sýpe ha haʼe oñedeprimi vaieterei. Arekórõ guare 10 áñorupi, che sy ndohovéi umi testígo de Jehová rreunionhápe. Che akontinua ha ajevautisa arekórõ guare 17 áño. Péro upe riremínte ndaikovéi la Biblia heʼiháicha ha upévare ndahaʼevéi testígo de Jehová.

AÑEMOAG̃UI JEY UMI TESTÍGO DE JEHOVÁRE

Amenda riremi, chevisita mokõi Testígo odirihíva peteĩ kongregasión oĩva pe siuda che aikohápe. Haʼekuéra oexplika chéve mbaʼépa ajapo vaʼerã aime porã jey hag̃ua Ñandejára Jehovándi, ha ojerure peteĩ misionéra héravape Cindy chepytyvõ hag̃ua. Upe tiémpope, che ndajeroviavéima heta mbaʼére, upévare ajerure chupe ohechauka hag̃ua chéve la Biblia haʼeha Ñandejára Ñeʼẽ. Ha Cindy ohechauka chéve mbaʼéichapa oñekumpli umi profesía oĩva pype. Mbeguekatúpe oñoamigaitéma ore, ha adesidi astudia hendive la Biblia. Upépe ae ahechakuaa mbaʼeichaitépa Jehová cherayhu ha oipota avyʼa.

Añepyrũrõ guare aha jey umi rreunión ojapóvape umi Testígo, ahechakuaa avyʼaveha hendivekuéra ke umi famósondi. Péro che nakonfiái vaʼekue avavére ha ndajeroviái avei chejehe, pórke heta ahasa asy vaʼekue chemitãme. Upéinte álgien pe kongregasiónpe ohechauka chéve la Biblia rupive mbaʼéichapa ikatu ambohovái umichagua provléma. Ha aaprende avei mbaʼéichapa ikatu akonsegi amígo verdadéro.

PETEĨ MBAʼE CHEMBOVYʼAVÉVA PE FÁMAGUI

Áño 1997-pe rova che ménandi Hóllywoodpe (California, Estados Unidos). Upépe añepyrũ aipuruve che tiémpo amboʼe hag̃ua umi héntepe umi mbaʼe oĩva la Bíbliape. Upéva chembovyʼaiterei, ni chefamósa tiémpope ndavyʼáiva peichaite peve. Áño 2002-pe ajotopa peteĩ che konosída yma guaréndi hérava Cheri. Heta mbaʼépe ore rojojogua. Chupe ojelehi vaʼekue avei Miss Hong Kong un áño che ajelehi mboyve, ha haʼe voi omoĩ vaʼekue che akãre pe koróna aganárõ guare. Haʼe oaktua vaʼekue avei pelíkulape ha upéi oiko chugui produktóra de síne, ombaʼapo voi heta direktór famósondi. Ha amo ipahápe, haʼe ova avei Hóllywoodpe.

Cheri ningo omendáta hína kuri, péro imenarã ou iñinfárto ha omano. ¡Ambyasyeterei anga chupe! Haʼe vudísta vaʼekue, péro umi mbaʼe omboʼéva irrelihión nokonsolái chupe. Ojehu avei chupe la ojehu vaʼekue chéve, ifamósaramo jepe, ndovyʼái ha nokonfiái avavére. Che amboʼe chupe umi mbaʼe aaprendéva la Bíbliagui, péro haʼe oĩ rupi pe rrelihión vudístape ijetuʼu chupe oasepta hag̃ua.

Cheri, ojegravahápe peteĩ pelíkula

Áño 2003-pe, Cheri oĩ hína kuri Canadápe ograva hag̃ua peteĩ pelíkula. Peteĩ díape cherenói ha omombeʼu chéve mbaʼépa oikomi hese omaneha jave rrútare. Heʼi omaña jave pe paisáhere oñepyrũ hague oñemboʼe ha heʼi: “Eremína chéve Ñandejára, ¿máva piko nde? ¿Mbaʼéicha piko nde réra?”. Upe javete ohasa peteĩ Salón del Reino renondérupi ha ohecha pe téra Jehová. Haʼe opensa Ñandejára ohendu hague iñemboʼe ha upévare oñeʼẽséntema voi peteĩ testígo de Jehovándi. Omombeʼu rire chéve upéva ajapo arréglo ovisita hag̃ua chupe peteĩ Testígo, ha upe  riremínte, Cheri ohóma peteĩ rreunión ojapóvape umi testígo de Jehová idióma chínope.

Cheri heʼi chéve: “Umi Testígo añetehápe oñeinteresa cherehe. Ikatu amombeʼu chupekuéra mbaʼéichapa añeñandu”. Avyʼaiterei ahendúvo upéva pórke umi famóso apytépe haʼe núnka ndorekói vaʼekue amígo. Haʼe osegi oho umi rreunionhápe, péro áño 2005-pe oñekontrata chupe ombaʼapo hag̃ua de produktóra mokõi pelíkulape ha oho jeýmante Hong Kóngpe. Oĩ aja upépe, lomímonte osegi oñerreuni umi Testígondi ha áño 2006-pe odesidi oservitaha Jehovápe ha ojevautisa peteĩ asambléape. Péro haʼe ombaʼapoiterei vaʼekue ha ijetuʼu chupe oservi porã hag̃ua Ñandejárape, ha upéva omoñeñandu vai chupe.

ROVYʼAITEREI IKATU HAGUÉRE ROIPYTYVÕ ÓTROPE

Áño 2009-pe, Cheri odesidi nombaʼapomoʼãveimaha umi pelíkulape. Péicha rupi oservi porãve Jehovápe, hetave iñamígo kongregasiónpe ha itiempove opredika ha oipytyvõ hag̃ua la héntepe oaprende hag̃ua Ñandejáragui. Upéva ombovyʼaiterei chupe (Mateo 24:14).

Cheri odesidi avei oaprendetaha nepalí ikatu hag̃uáicha opredika umi oñeʼẽvape ko idióma. Hong Kóngpe ningo ojeapoʼi umi nepalípe, pórke haʼekuéra noñeʼẽguasúi inglés ni chino ha la ikostumbrekuéra idiferénte. Cheri omombeʼu omboʼesetereiha voi chupekuéra umi mbaʼe oĩva la Bíbliape. Peteĩ día, haʼe opredika peteĩ kuñakarai oikuaávape mávapa Jesús péro ni nohendúiva oñeñeʼẽrõ Jehováre. Cheri ohechauka chupe la Bíbliape Jesús oñemboʼe hague Itúvape oĩva yvágape. Ha pe kuñakarai ovyʼaiterei oikuaávo ikatuha oñemboʼe Ñandejára teépe, upéva oipytyvõ chupe oasepta hag̃ua umi mbaʼe oĩva Ñandejára Ñeʼẽme. Upe riremi iména ha imembykuña oñepyrũ avei ostudia la Biblia (Salmo 83:18; Lucas 22:41, 42).

Che amíga Cheri opredika jave

Cheri siémpre omombeʼu chéve mbaʼechaitépa ovyʼa oipuruvévo itiémpo opredika hag̃ua umi héntepe, upéva chemopensa ha añeporandu: “¿Mbaʼére piko che ndajapói avei upéicha?”. Upe tiémpope che aiko Hong Kóngpe. Upémarõ ajapo arréglo ikatu hag̃uáicha apredika hetave. Avyʼaiterei ikatu haguére aipytyvõ umi héntepe ha amboʼe chupekuéra la Biblia.

Avyʼaiterei ikatu haguére aipytyvõ umi héntepe ha amboʼe chupekuéra la Biblia

Por ehémplo, aipytyvõ vaʼekue peteĩ kuñakarai vietnamítape oñedeprimíva ha oikóva hesay hováre. Koʼág̃a haʼe ovyʼa ha heta iñamígo kongregasiónpe.

Cheri ha che rotopa peteĩ mbaʼe orembovyʼavéva pe fámagui. Rombaʼapoha tiémpope umi pelíkulape orefamósa vaʼekue, péro koʼág̃a rovyʼaitereive roñeʼẽvo umi héntepe Jehovágui, pórke upéicha romombaʼeguasu chupe. Ha rohechakuaa siertoiteha la Jesús heʼi vaʼekue: “Javyʼaiteve ñameʼẽvo, ñandéve oñemeʼẽ rangue” (Hechos 20:35).