Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Agosto de 2015

 TEMBIASAKUE

Jehová ivuenoiterei rasa chendive

Jehová ivuenoiterei rasa chendive

Che arekórõ guare 17 áño chegusta vaʼekue umi mbaʼe ogustáva jepi umi mitãrusúpe. Ahugámi partído, ayta ha añembyaty che amigokuérandi. Péro peteĩ kaʼaru pytũme okambiaite che situasión. Añaksidenta vaieterei móto ári ha apyta paralisádo che ajúra guive; che akã añoite ikatu amonguʼe. Ojapóma 30 áñorupi añaksidenta hague, ha upe guive ndaikatuvéi apuʼã tupágui.

Akakuaa peteĩ siuda héravape Alicante, opytáva Espáñape, mar Mediterráneo ypýpe. Ógape provlémamante oĩ vaʼekue ha avave ndachetrataporãi, upévare che kállerente voi aikómi. Péro óga ypýpe oĩ vaʼekue peteĩ gomería ombaʼapohápe peteĩ karai hérava José María, ha che ajepokuaaiterei vaʼekue hese, pórke haʼe ikalidaiterei chendive. Haʼe 20 áño itujave chehegui, upéicharõ jepe koʼag̃aite peve haʼe cheamigoite ha akonsidera voi chupe che ermáno, pórke heta vése chepytyvõ aikotevẽve jave.

José María ostudia hína kuri la Biblia umi testígo de Jehovándi. Ha ojekuaa voi hese ogustaha chupe la oaprendéva, pórke pyʼỹinte omombeʼúmi chéve umíva. Che ahendu porãnte vaʼekue chupe, péro mitãrusu ipórtepe, nacheinteresái la heʼíva. Upéinte oiko cherehe álgo ha akambiaite apensa lája.

PETEĨ AKSIDÉNTE OKAMBIAITE CHE REKOVE

Che ni nachemanduʼaséi voi pe aksidéntere, péro la haʼekuaáva añembotavyeterei hague ha upéva káusare añaksidenta. Sapyʼaitépe okambiaite che rekove. Cheresãi porãitehágui aju apara peteĩ ospitálpe ha ndaikatuvéi apuʼã tupágui. Ni ndaroviaséi la oikóva cherehe, ha apensámi: “¿Mbaʼére piko namanóintema?”.

José María oho chevisita ha ojerure avei umi testígo de Jehovápe chevisita hag̃ua. Haʼekuéra pyʼỹi oho che rendápe ha upéva opokoiterei cherehe. Asẽmíre terápia intensívagui añepyrũ astudia la Biblia. Aaprende mbaʼérepa la hénte osufri ha omano ha mbaʼérepa Ñandejára oheja oiko umi mbaʼe vai. Aaprende avei umi mbaʼe porã Ñandejára oprometéva ñandéve g̃uarã. Por ehémplo, og̃uahẽtaha pe tiémpo umi oservíva chupe perfektotaha ha avave ndeʼimoʼãvéima: “Che rasy hína” (Isaías 33:24). Primera ves areko peteĩ esperánsa iporãitereíva.

Asẽ rire ospitálgui, chetiempovéma astudia hag̃ua la Biblia ha upévare heta mbaʼe aaprende. Añepyrũ aipuru peteĩ sílla de rruéda, ha péicha ikatu vaʼekue aha mimi umi rreunión ojapóvape umi testígo de Jehová ha asẽ avei apredika hendivekuéra. Ajevautisa el 5 de noviembre de 1988, arekópe 20 áño, ha ojeprepara chéve peteĩ mbaʼyru guasu upearã. Jehová chepytyvõ vaʼekue ahechakuaa hag̃ua ikatuha gueteri ahupyty heta mbaʼe porã che rekovépe. ¿Mbaʼéichapa ikatu kuri ahechauka aagradeseha chupe?

NDAHEJÁI CHEJOKO CHE SITUASIÓN

Che ajapose kuri ikatúva guive Jehová servísiope, upévare adesidi ndahejamoʼãiha chejoko che  situasión aprogresa hag̃ua (1 Timoteo 4:15). Ñepyrũrã ijetuʼu kuri chéve, pórke che hentekuéra oñemoĩ che kóntrape oiko haguére chehegui Testígo. Péro kongregasiónpe areko vaʼekue heta ermáno ha ermána chepytyvõva aha hag̃ua rreunionhápe ha asẽ meme hag̃ua apredika.

Péro kon el tiémpo ahechakuaa aikotevẽtaha oñeñangareko cherehe las 24 óra. Heta aheka rire, atopa siuda de Valénciape peteĩ lugár oñeñatendehápe umi orekóvare diskapasida (upe siuda opyta 160 km Alicántegui). Ha koʼag̃aite peve aime upépe.

Ndaikatúiramo jepe apuʼã che rupágui, lomímonte apredika che rapichakuérape

Ndaikatúiramo jepe apuʼã tupágui, che ajedesidíma aservi memetaha Jehovápe. Pe goviérno ombosuéldo umi orekóvape diskapasida, ha upéva rupive ajogua peteĩ selulár ha peteĩ komputadóra, ojekolokáva chéve che rupa ykére. Káda pyhareve, pe okuidáva cherehe omyendy pe komputadóra ha pe selulár. Areko peteĩ palankaʼi amaneháva che rañykãme aipuru hag̃ua pe komputadóra. Areko avei peteĩ palíto amoĩva che jurúpe askrivi hag̃ua pe tekládope térã amarka hag̃ua umi número che selulárpe.

Aipuru peteĩ palíto amarka hag̃ua umi número pe selulárpe

Koʼã teknolohía rupive ikatu aike pe páhina jw.org-pe, ha aipuru pe párte hérava VIVLIOTÉKA OĨVA INTERNÉTPE Watchtower. ¡Ideprovechoiterei ningo chéve koʼã erramiénta! Órare voi aipuru jepi pe komputadóra káda día astudia ha ainvestiga hag̃ua umi puvlikasión oñeʼẽva la Bíbliare, péicha aaprendeve Ñandejáragui. Ha añeñandu jave cheaño térã añedesanima jave katuete voi atopa upépe álgo chemokyreʼỹ jeýva.

Pe komputadóra rupive ikatu avei apartisipa umi rreunión rojapóvape ore testígo de Jehová. Péva rupive ndahaʼéi ahendúnteva umi rreunión, síno ikatu avei añemboʼe, akomenta, ajapo diskúrso ha alee rrevísta Ñemañaha oñasigna jave chéve. Ndaikatúiramo jepe aime personálmente umichagua rreuniónpe, ikatu apartisipa ha péicha añandu che aimeha avei pe kongregasiónpe.

Pe komputadóra ha pe selulár arekóva ideprovechoiterei avei chéve apredika hag̃ua che rapichakuérape. Che ndaikatúi apredika ogahárupi ojapoháicha umi ótro testígo de Jehová. Péro nañedesanimái upévare, síno aipuru umi erramiénta arekóva añemongeta hag̃ua che rapichakuérandi la Bíbliare. Che apredikaseterei voi por teléfono, upévare umi odirihíva pe kongregasión ojerure chéve aorganisa hag̃ua peteĩ grúpo ropredika hag̃ua upéicha. Pe grúpope oĩ avei umi ndaikatúiva osẽ hógagui opredika hag̃ua.

Amboʼe jave la Biblia

Péro ndahaʼéi komputadóra térã teléfono rupivénte añemongetáva la héntendi. Káda día che amigokuéra ou chevisita. Ha ogueru jepi hendivekuéra  ihénte ha ikonosidokuéra oñeinteresáva la Bíbliare. Péicha jave umi che amígo ojerure jepi chéve amboʼe hag̃ua umi oúvape hendivekuéra. A vése katu ou voi peteĩ família kompletoite rostudia hag̃ua oñondivepa la Biblia. Chegustaiterei ningo umi mitã oguapy jave che rupápe ha omombeʼu chéve mbaʼérepa ohayhu hikuái Jehovápe.

Avyʼaiterei umi família ou jave rostudia hag̃ua oñondivepa

Amombaʼeterei umi visíta arresivíva. Che kotýpe oike ha osẽ la hénte, pórke che amigokuéra oparupigua ou che rendápe. Ha upéva osorprendeterei umi ombaʼapóvape pe lugár aikohápe. Káda día aagradese Jehovápe areko haguére ko família tuichaite.

ASEGI ALUCHA

Umi hénte oporandu jave chéve mbaʼetekópa aime, haʼe jepi: “Ha... alucháko hína”. Péro ndahaʼéi che añónte la alucháva ha ahasáva heta provléma. Entéro oserviséva Ñandejárape, tahaʼe haʼéva isituasión, oñorairõ hína ‘pe ñorairõ iporãva odefende hag̃ua ijerovia’ (1 Timoteo 6:12). ¿Mbaʼépa chepytyvõ asegi hag̃ua alucha hetaite áñorema? Káda día aagradese Jehovápe chemboʼe haguére aipuru porã hag̃ua che rekove. Ha avei ajapo ikatúva guive Ñandejára servísiope, péicha añekonsentra meme pe esperánsa haʼe omeʼẽvare.

José María

Siémpre apensa jepi ha añeimahina mbaʼéichatapa ág̃a oiko vove ko múndogui peteĩ paraíso ha ikatu jey vove adipara ha apopo. Che amígo José María oreko vaʼekue poliomielitis ha upéva káusare ndaikatúi odipara. Che añembojaru jepi hendive ha aporandu chupe mávapa oganáne rohaʼãramo peteĩ karréra. Ha haʼe heʼi chéve: “Noimportái voi mávapa oganáne. La iñimportánteva hína ñaime pe paraísope, ñahaʼã hag̃ua pe karréra”.

Ijetuʼueterei kuri chéve aasepta hag̃ua che situasión. Aikuaa porã chemitãrusúpe ajapo hague peteĩ vyrorei ha upéva káusare koʼág̃a péicha aime. Péro Jehová ndacherejareíri ha aagradeseterei chupe upévare. Hetaiterei mbaʼe porã ningo ahupyty haʼe ivuenoiterei rupi chendive. Por ehémplo, areko heta amígo, avyʼa, amboʼe che rapichakuérape la Biblia ha areko peteĩ esperánsa iporãitereíva. ¡Añetehápe Jehová ivuenoiterei rasa chendive!