Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Julio de 2015

¿Ikatúpa ñambovyʼa Ñandejárape?

¿Ikatúpa ñambovyʼa Ñandejárape?

La Bíbliape ningo oñeñeʼẽ heta persóna oservi vaʼekuére Ñandejárape haʼe oipotaháicha. ¿Mbaʼéichapa reñeñandu relee jave iñehemplokuéra? ¿Repensápa nde núnka ndaikatumoʼãiha reservi Ñandejárape haʼekuéraicha? Ikatu oime repensa: “Che ningo pekadór, ajavy meme ha ndacherekojojái”.

Job “ijerovia mbarete ha siémpre ojapo iporãva” (Job 1:1, NM)

La Biblia heʼi Job ‘ijerovia mbarete hague ha siémpre ojapo hague iporãva’ (Job 1:1, NM). Lot rehe heʼi avei ‘hekojoja’ hague (2 Pedro 2:8). Ha David rehe katu heʼi ojapo meme hague umi mbaʼe ogustáva Ñandejárape (1 Reyes 14:8). Péro haʼekuéra ningo ofallánte vaʼekue avei, upéicharõ jepe Ñandejára oguerohory chupekuéra. Ñaanalisa porãmína iñehemplokuéra ha jahecha mbaʼépa ikatu ñaaprende.

HAʼEKUÉRA OFALLÁNTE VAʼEKUE AVEI

“[Ñandejára] osalva Lótpe, peteĩ kuimbaʼe hekojojáva ha oñeñandu vaietereíva umi hénte aña notĩri haguére hembiapo vai hag̃ua” (2 Pedro 2:7)

Job ohasa vaʼekue heta mbaʼe ijetuʼuetereíva, ha nontendéi mbaʼérepa oiko hese umíva. Haʼe oaseguraite vaʼekue ndojapói hague mbaʼeve ivaíva, ha tuicha ojavy opensávo Ñandejárape nointeresaiha la haʼe ojapóva (Job 9:20-22). Umi ohendúva chupe heʼi voi haʼe ohechaukaseha ihustoveha Ñandejáragui (Job 32:1, 2; 35:1, 2).

Lot omakaneaiterei vaʼekue okumpli hag̃ua Ñandejára omandáva chupe. Haʼe ningo orrenegaiterei  ha ndovyʼaveietéma kuri ohechávo mbaʼeichaitépa hekovai umi hénte oikóva Sodoma ha Gomórrape (2 Pedro 2:8). Ñandejára oavisa ohundipataha umi hénte añáme ha heʼi Lótpe osẽ vaʼerãha ifamíliandi upégui ojesalva hag̃ua. Péro Lot ojereterei osẽ hag̃ua, upévare umi ánhel ojagarra chupe ha ifamíliape ipógui ha onohẽ chupekuéra upe siudágui (Génesis 19:15, 16).

David oservi Ñandejárape ipyʼaite guive ha ojapo meme umi mbaʼe ogustáva chupe (1 Reyes 14:8)

David katu iñakãrakuete vaʼekue peteĩ kuñakarai ahénore ha oñeno hendive. Hiʼarive ojukauka iménape pono ojepilla chupe (2 Samuel, kapítulo 11). La Biblia heʼi umi mbaʼe David ojapo vaʼekue ivaieterei hague Jehovápe g̃uarã (2 Samuel 11:27).

Koʼã mbohapy kuimbaʼe ofalla vaʼekue Ñandejára renondépe, ha algúno katu ivaieterei voi la ojapo vaʼekue. Péro, jahechataháicha ko artíkulope, haʼekuéra ohayhu Ñandejárape ha ojapose ivolunta ipyʼaite guive. Haʼekuéra ohechauka avei oñarrepentiha ha oñehaʼã okambia ha oñemoĩ porã jey Jehovándi. Upévare, ofalláramo jepe hikuái, la Biblia heʼi hesekuéra ojerovia hague Ñandejárare.

MBAʼÉICHAPA ÑANEPYTYVÕ IÑEHEMPLOKUÉRA

Ñande ningo ñaneimperfékto, ha upévare jajavýtante voi (Romanos 3:23). Péro jafalla jave, jahechauka vaʼerã ñambyasyha la jajapóva ha upéi jajapo ikatúva guive ñaime porã jey hag̃ua Ñandejárandi.

¿Mbaʼépa ojapo Job, Lot ha David oĩ porã jey hag̃ua Ñandejárandi? Job ningo ipyʼaporã vaʼekue. Upévare Ñandejára oipytyvõrõ guare chupe ohechakuaa hag̃ua ojavyha, haʼe oñarrepenti  la heʼi vaʼekuére (Job 42:6). Lot avei hekojoja vaʼekue, ha ohechakuaa ivaietereiha Ñandejára renondépe umi mbaʼe ojapóva umi hénte Sodoma ha Gomorrapegua. Ojavyʼimínte kuri ojeretereírõ guare ojapo hag̃ua Ñandejára omandáva chupe. Péro upéi ojapo, ha hiʼarive ni nomañái hapykue gotyo osérõ guare pe siudágui. David katu ofalla vaietereíramo jepe Ñandejára renondépe, ohechauka ombyasyha ipyʼaite guive la ojapóva, ha ojerure asy Ñandejárape operdonami hag̃ua chupe (Salmo 51).

Ñandejára ningo oikuaa ñaneimperfektoha. Upévare haʼe lomímonte oasepta vaʼekue Job, Lot ha Davídpe, ojavýramo jepe hikuái. La Biblia heʼi: “Haʼe oikuaa mbaʼéguipa ñandeapo rakaʼe, oikuaa porã yvynteha voi ñande” (Salmo 103:14). Ñandejára ndojeruremoʼãi ñandehegui umi mbaʼe ikatuʼỹva jajapo. ¿Mbaʼépa upéicharõ haʼe ohaʼarõ ñandehegui?

Ñandejára “oikuaa mbaʼéguipa ñandeapo rakaʼe, oikuaa porã yvynteha voi ñande” (Salmo 103:14)

¿MBAʼÉICHAPA IKATU ÑAMBOVYʼA ÑANDEJÁRAPE?

Jaikuaa hag̃ua la rrespuésta, jahechami mbaʼépa David heʼi vaʼekue itaʼýrape: “Ha nde che raʼy Salomón, ehayhúke [...] nde ru Járape ha ejapo haʼe heʼíva nde pyʼaite guive” (1 Crónicas 28:9). ¿Mbaʼépa heʼise jaservi Ñandejárape ñande pyʼaite guive? Ndeʼiséi ñandeperfékto vaʼerãha, síno heʼise jahayhu vaʼerãha chupe ha jadesidi ñaaprende imandamientokuéra ha ñakumpli. Umi oservíva Ñandejárape ipyʼaite guive oheja haʼe ogia ha okorrehi chupekuéra. Ha ojapo rupi koʼã mbaʼe, la Biblia heʼi Job rehe ‘siémpre ojapoha iporãva’, Lot rehe ‘hekojojaha’, ha David rehe ojapo memeha umi mbaʼe ogustáva Ñandejárape. Haʼekuéra ofalláramo jepe, ombovyʼa vaʼekue Ñandejárape.

Jaservi Ñandejárape ñande pyʼaite guive heʼise jahayhu vaʼerãha chupe ha jadesidi ñaaprende imandamientokuéra ha ñakumpli

Oúramo jepe sapyʼánte ñane akãme umi mbaʼe naiporãiva, ha jaʼe térã jajapóramo jepe umi mbaʼe ñambyasýva upe rire, aníkena ñañentrega. Ñanemanduʼa vaʼerã koʼã mbohapy ehémplo jahecha vaʼekuére. Ñandejára ningo oikuaa ndaikatuiha jajapo opa mbaʼe chupe ogustahaichaite. Haʼe la oipotáva jahayhu chupe ñande pyʼaite guive ha ñañehaʼãmbaite ñakumpli imandamientokuéra. Péicha jajapóramo, katuete ñambovyʼáta chupe.