Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Junio de 2015

 TEMBIASAKUE

Ojapóma siete henerasión ore família oservi hague Ñandejárape

Ojapóma siete henerasión ore família oservi hague Ñandejárape

Heta oĩ heʼíva che ajoguaitereiha che túvape. Por ehémplo, che resa kolór, che mólde ha cheakãhatã lája che tuvaichaite. Péro rojojogua avei ótra kósape: mokõivéva roservi Ñandejárape. Siete henerasiónrema ore família oservi Jehovápe, ha opavave romombaʼeterei upéva.

Che túva omombeʼu chéve ore família istória

Ore ningo Thomas Williams (1) * familiare, haʼe onase vaʼekue el 20 de enero de 1815 peteĩ siuda héravape Horncastle (Inglaterra). Haʼe oreko vaʼekue mokõi ermáno ha peteĩ ermána. Péro isy omano vaʼekue haʼe orekópe 2 áño, upévare itúva John omongakuaa chupekuéra. Haʼe omboʼe Thómaspe oiko hag̃ua chugui karpintéro, péro Thomas ojededikase vaʼekue ótra kósape.

Heta hénte oikóva Inglatérrape upe tiémpope oñepyrũ jey oñeinteresa rrelihiónre. Peteĩ predikadór hérava John Wesley osẽ irrelihióngui ha oforma pe Sociedad de Metodistas. Pe grúpo omboʼe vaʼekue iñimportanteha káda uno ostudia la Biblia ha opredika. Sapyʼaitépe, hetaiterei hénte oguerovia umi mbaʼe Wesley omboʼéva, umíva apytépe família Williams. Thomas oñepyrũ opredika umi héntepe umi mbaʼe oaprendéva ha oñekuaveʼẽ voi oho hag̃ua de misionéro Pacífico sur gotyo. Haʼe omenda peteĩ mitãkuña héravare Mary, (2) ha upe riremínte, julio de 1840-pe, oho hikuái peteĩ íslape oĩva Fíyipe, hérava Lakeba. * Upépe oĩ vaʼekue heta kaníval, haʼéva hína umi hoʼúva hapicha roʼo.

MBAʼÉICHAPA OJEIKO UMI KANÍVAL APYTÉPE

Thomas ha Márype ijetuʼueterei vaʼekue ova ramórõ guare Fíyipe. Un día pytã ombaʼapo hikuái, hiʼarive ndaiporiguasúi komodida ha hakueterei. Haʼekuéra ohecha umi hénte upepegua ojapoha heta mbaʼe ivaietereíva, por ehémplo, hoʼu hapicha roʼo, ojuka umi viúda ha umi mitãme, ha umi trívu pyʼỹi opuʼã ojuehe ha ojojukapa. Hiʼarive avave lénto nohenduséi chupekuéra opredika jave. Mary ha imemby ypykue hérava John ou hasyete ha haimete omano. Áño 1843-pe, Thomas oskrivi: “Añandu nameʼẽveimaha. [...] Ojere vaipaite voínteko oréve ha ndaikuaavéima mbaʼépa ajapóta”. Upéicharõ jepe, Thomas ha Mary oaguanta ha osegi ojerovia Ñandejára Jehováre.

Thomas peteĩ karpintéro vale vaʼekue, ha okonstrui Fíyipe hogarã ojapoháicha umi européo. Upe lugárpe ndaipóri vaʼekue peichagua óga. Oreko heta mbaʼe ipyahúva umi hénte upepegua ohecharamoitereíva, por ehémplo, ipíso yvate pe óga ipiroʼyve hag̃ua. Ojapopa mboyvemi pe óga, onase itaʼýra mokõiha ha ombohéra chupe hikuái Thomas Whitton, (3) haʼéva hína che túva tataravuélo.

Áño 1843-pe, Thomas Williams oipytyvõ ojetradusi hag̃ua idióma fiyiánope pe Evanhélio de Juan. Péro ijetuʼu chupe upéva. * Haʼe ivaleve vaʼekue kómo  antropólogo, haʼéva hína umi ostudiáva opa mbaʼe ojapóva la hénte. Oskrivi voi peteĩ lívro hérava Fiyi y los fiyianos (1858), omombeʼúva mbaʼéichapa oiko vaʼekue upe tiémpope umi hénte upepegua.

Thomas ha ifamília oiko Fíyipe 13 áñore, péro upéi haʼe ou hasy ha ovámante hikuái Austráliape. Upépe Thomas osegi opredika ha entéronte omombaʼe vaʼekue chupe. Haʼe omano áño 1891-pe, peteĩ siuda héravape Ballarat, oĩva estádo de Victóriape.

OTOPA HIKUÁI PETEĨ MBAʼE IVALIOSOITEREÍVA

Áño 1883-pe, Thomas Whitton, hembireko Phoebe, (4) ha ifamília, ova Australia Occidentálpe, peteĩ siuda héravape Perth. Itaʼýra mokõiha, hérava Arthur Bakewell, (5) oreko vaʼekue upérõ 9 áño, haʼe hína che tataravuélo.

Orekórõ guare 22 áño, Arthur ova éste gotyo, peteĩ puévlo héravape Kalgoorlie, opytáva 600 kilómetrorupi Pérthgui. Upe puévlo pyaʼeterei okakuaa vaʼekue oĩgui heta ombaʼapóva umi mína de órope. Oiko aja upépe, Arthur olee umi puvlikasión ojapóva umi testígo de Jehová (upe tiémpope oñehenói vaʼekue Estudiánte Internasionál de la Biblia). Haʼe ojerure vaʼekue voi oñemondo meme hag̃ua chupe umi rrevísta Ñemañaha osẽ ramovéva (upérõ hérava Zionʼs Watch Tower). Ogustaiterei chupe umi mbaʼe oleéva umi rrevístape, upévare oñepyrũ omombeʼu ótrope umi mbaʼe oaprendéva ha ojapo avei umi rreunión hógape ojestudia hag̃ua la Biblia. Péicha pe mensáhe opredikáva umi testígo de Jehová og̃uahẽ Australia Occidentálpe.

Arthur omombeʼu avei ifamíliape umi mbaʼe oaprende vaʼekue. Ha itúva oapoja chupe, péro upéi ou omano. Isy Phoebe ha iñermanakuéra Violet ha Mary, omoirũ avei chupe ha oiko chuguikuéra Estudiánte de la Biblia. Violet katu oservi kómo prekursóra, upéva heʼise oipuru meme hague itiémpo opredika hag̃ua Ñandejára Ñeʼẽ. Arthur heʼi vaʼekue voi “ndaipóri hague ótra prekursóra iguapavéva ha ikyreʼỹvéva chugui Australia Occidentálpe”. Chéverõ g̃uarã ja oexahera léntoma, péro la aikuaa porãva ke Violet ehémplo omokyreʼỹeterei hague família Wílliamspe.

Tiémpo rire, Arthur omenda ha oho oiko peteĩ puévlo héravape Donnybrook, opytáva suroéste gotyo Australia Occidentálpe. Upe lugárpe heta hénte ojededika vaʼekue frúta ñeñotỹme. Arthur kyreʼỹme omombeʼu meme vaʼekue la héntepe oĩha heta profesía oñekumplítava áño 1914-pe, ha upévare ivesinokuéra heʼími vaʼerã hese itavyraiha. * Péro upe áñope oñepyrũ pe Primera Gérra Mundiál, ha upéva ojurumbotyete chupekuéra. Arthur omoĩ vaʼekue inegósiope umi puvlikasión oñeʼẽva la Bíbliare ha opredika vaʼekue iklientekuérape. Omoĩ avei upépe peteĩ kartél heʼíva omeʼẽtaha 100 lívra umi ikatúvape okomprova la Biblia rupive pe trinida siertoha. Haʼe oikuaa porã vaʼekue upe enseñánsa noĩriha la Bíbliape ha omboykete voi. Amo ipahápe avave noganái umi 100 lívra.

Família Williams rógape ojejapo vaʼekue umi rreunión ojestudia hag̃ua la Biblia. Tiémpo rire, Arthur ojapo Donnybroókpe peteĩ salón oñembyaty hag̃ua upépe hikuái. Upérõ saʼi oĩ vaʼekue Salón del Reino Australia  Occidentálpe. Arthur orekórõ guare 80 áñorupi lomímonte osegi vaʼekue opredika; haʼe omondémi itráhe, omoĩ ikorváta, oensilla ikavaju ha oho opredika Donnybrook tuichakuére.

Arthur ningo itrankílo ha ivuenoiterei vaʼekue, ha osẽ jave opredika katu ikyreʼỹeterei, ha upéicha oheja ehémplo porã ifamiliakuérape. Itajýra Florence (6) oho vaʼekue kómo misionéra Índiape, ha itaʼyrakuéra Arthur Lindsay (7) ha Thomas katu oservi kongregasiónpe kómo ansiáno heta áñore, ojapo haguéicha avei ituvakuéra.

PE MANSÁNA LADY WILLIAMS

Che visavuélo, Arthur Lindsay Williams, iñamávle ha imbaʼeporãiterei vaʼekue. Haʼe siémpre oñemotiémpo ótrope g̃uarã ha irrespetuóso vaʼekue. Avei oipurukuaa vaʼekue la hácha. Upe lugárpe ojejapómi vaʼerã kampeonáto ojehechahápe mávapa oikytĩ pyaʼeve peteĩ yvyra, ha 12 áñope haʼe ogana vaʼekue 18 kampeonáto umichagua.

Peteĩ vuéltape, Arthur raʼy hérava Ronald, (8) ojagarra peteĩ hácha ha oikytĩ peteĩ mansána mataʼi oĩva hógape, upérõ haʼe oreko 2 áño ramo. Ronald sy osalva pe yvyramataʼi, kon el tiémpo okakuaa ha la hiʼa osẽ heʼẽterei. Koʼãichagua mansánape oñembohéra Lady Williams che visavuéla rehehápe. Ha ko frúta ojepuru vaʼekue oñeguenohẽ hag̃ua ótra varieda de mansána ikonosidoitereíva, hérava Cripps Pink.

Haʼetépe che avuélo Ronald okakuaa rire ojapo kósa iproduktivovéva. Omenda rire, haʼe ha che avuéla heta áñore oipytyvõ oñemopuʼã hag̃ua umi Salón del Reino de los testigos de Jehová, Australia ha islas Salomónpe. Koʼág̃a che avuélo orekóma 80 áñorupi ha oservi kongregasiónpe kómo ansiáno. Haʼe oipytyvõ gueteri oñemopuʼã ha oñemyatyrõ hag̃ua umi Salón del Reino oĩva Australia Occidentálpe.

CHE ADESIDI AVEI ASERVI JEHOVÁPE

Che ermána Katharine (11) ha che, (12) romombaʼeterei ore tuvakuéra Geoffrey (9) ha Janice (10) oñehaʼãmbaite haguére orehekomboʼe la Biblia heʼiháicha. Chemanduʼa arekórõ guare 13 áño opokoiterei hague cherehe umi mbaʼe ahendúva peteĩ aty guasu ojapóvape umi testígo de Jehová. Upérõ John Barr, oĩva pe húnta direktíva de los testigos de Jehovápe (oñehenóiva Kuérpo Governánte), ojapo peteĩ diskúrso omokyreʼỹva mitãrusukuérape. Peteĩ pártepe heʼi: “Peẽ ningo ikatu peikuaa ha pehayhu Jehovápe ha upéva tuichaiterei mbaʼe. ¡Aníkena pejavy ko oportunida!”. Upe pyharépe ag̃uahẽvo ógape, adesidi aservitaha Ñandejárape ha aikotaha la Biblia heʼiháicha, ha dos áño haguépe oikóma chehegui prekursór.

Koʼág̃a che rembireko Chloe ha che roiko peteĩ puévlo héravape Tom Price, opytáva Australia Occidentálpe. Ha rombaʼapo média hornáda roñemantene hag̃ua. Ore roipuru meme ore tiémpo ropredika hag̃ua Ñandejára Ñeʼẽ. Che tuvakuéra, che ermána ha iména Andrew, ojapo avei upéicha. Haʼekuéra oiko peteĩ siuda héravape Port Hedland, opytáva 420 kilómetrorupi nórte gotyo ore roikohágui. Che túva ha che roservi kómo ansiáno ore kongregasiónpe.

Ojapóma siete henerasión família Williams oservi hague Ñandejára Jehovápe. Omoñepyrũ vaʼekue Thomas Williams ha koʼág̃a peve ore, ifamiliare, rosegi rojapo upéva. Avyʼaiterei cherekomboʼe haguére hikuái aservi hag̃ua Ñandejárape.

^ párr. 5 Umi número oñemoĩva umi téra ykére ohechauka mávapa umi oĩva umi fótope.

^ párr. 6 Ko ísla héra vaʼekue yma Lakemba, ha oĩ peteĩ grúpo de ísla héravape Lau, opytáva éste de Fíyipe.

^ párr. 10 Áño 1847-pe, oñeimprimi pe Nuévo Testaménto en Fiyiano, ha heta párte ko traduksióngui ojapo peteĩ misionéro hérava John Hunt. Ko traduksión inotávle, pórke heta versíkulope oipuru Ñandejára réra idióma fiyiánope, “Jiova”, por ehémplo Marcos 12:36-pe, Lucas 20:42 ha Hechos 2:34-pe.

^ párr. 16 Ehecha pe lívro Mbaʼépa añetehápe omboʼe la Biblia?, pe párte heʼihápe “1914: Peteĩ áño iñimportánteva pe profesíape”. Ko lívro ojapo umi testígo de Jehová ha ikatu retopa Internétpe: www.jw.org/gug.