Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Junio de 2015

Mbaʼéichapa ikatu ovyʼa umi ijedáva

Mbaʼéichapa ikatu ovyʼa umi ijedáva

¿MBAʼÉICHAPA reñeñandu repensávo ndeedamaha rehóvo? Hetápe oipyʼapyeterei upéva, ha oĩ algúno ndoipotaietéva voi og̃uahẽ upe moménto. ¿Mbaʼérepa? Pórke la majoría opensa ivaívare meme, por ehémplo, opensa oñepyrũtamaha iñakãrague morotĩ, hova chaʼĩ, ikaneʼõmba rei, hesarái heta mbaʼégui ha hasypa rei.

Péro ñanemanduʼa vaʼerã naentéroi oñeñanduha peteĩchapa ijedávo ohóvo. Algúno osegi imbarete ha hesãi. Ótro katu hasykatu, péro oĩ rupi heta tratamiénto pyahu ikatu ogueropuʼaka porã imbaʼasy. Upévare oĩ país hetavehápe ohóvo umi hénte oikove pukúva ha hesãiva.

Añetehápe ningo avavépe nahiʼãi osufri ijeda vove, upéva rangue entéronte jasegise javyʼa og̃uahẽ vove upe moménto. Péro tuicha odependéta hína ñande aktitúre, pórke tekotevẽta jajeadapta umi kámbio og̃uahẽvare. Oiméramo nde ndeedáma, koʼápe retopáta seis konsého oĩva la Bíbliape ikatúva nepytyvõ.

NEUMÍLDE VAʼERÃ. “Umi iñumíldeva ohechauka iñaranduha.” (Proverbios 11:2, NM.) Umi ijedáva ningo tekotevẽ iñumílde ha orrekonose oĩha heta mbaʼe ndaikatuvéimava ojapo. Peteĩ karai Brasilpegua, hérava Charles ha orekóva 93 áño, heʼi: “Reikove pukúramo ningo ndetujátante voi. Ndaikatúi ñamboguevi mbaʼe pe tiémpo”.

Péro upéva ndeʼiséi avei reñentregatanteha ha ere: “Chéngo chetujaitereíma voi ha ndavalevéima mbaʼeverã”. Repensáramo upéicha ningo ikatu reñamarga. Proverbios 24:10 heʼi voi: “Nekangýramo ivai jave, nanembaretemoʼãi reikotevẽ vove” (NM). Umi iñarandu ha iñumíldeva oñehaʼã ojapo ikatumívante.

Peteĩ karai Italiagua, hérava Corrado ha orekóva 77 áño, heʼi voi ñandetuja vove haʼeteha jaháva áutope peteĩ arrivádape, ha ñamboguejýmante vaʼerã un kámbio pono opyta rei ñandehegui la ñande veíkulo. Ha upeichaite ningo, amáske ñandeeda jahávo ñakambia mimímante vaʼerã heta mbaʼe. Don Corrado ha hembireko oaprende ojapo vaʼerãha mbeguekatu asýnte umi tembiapo hogapypegua. Ohechakuaa avei ndoikói vaʼerãha ojapose hetaiterei mbaʼe un díape ani hag̃ua ikaneʼõiterei upe rire. Marian, oikóva Brasílpe ha orekóva 81 áño, orrekonose avei heta mbaʼe ndahaʼeveimaha yma guaréicha. Haʼe heʼi: “Ahechakuaa tekotevẽha trankilomiénte aha hese. Upévare añeno térã aguapyʼimi jepi chupe, ha upekuévo  alee algúna kósa térã ahendu músika. Oĩ voínte heta mbaʼe ndaikatuvéimava ajapo koʼág̃a ha ndaikói ajepyʼapy umívare”.

Reñemonde porã vaʼerã

REÑEMONDE PORÃ VAʼERÃ. “Aipota umi kuña oñemoporã jave, toñemonde hekópe ha taiñakãguapy.” (1 Timoteo 2:9.) Jahechaháicha, iñimportánte ñañemonde porã. Bárbara, oikóva Canadápe ha orekóva 74 áño, heʼi: “Che siémpre añemonde porãse, ndaikomoʼãi amonde ndéve oimeraẽ mbaʼe. Oĩ jepi heʼíva: ‘Nambréna, cheg̃uaig̃uíma ningo che, ¿mbaʼe piko ajearreglavéta koʼã edápe?’. Péro che ndaikoséi upéicha”. Peteĩ kuñakarai Brasilpegua, hérava Fern ha orekóva 91 áño, heʼi avei: “Ajogua jepi che ao pyahurã añembochúka hag̃ua, ha upéva chemoñeñandu porãiterei”. Péro, ¿kuñanguérante piko la ojepyʼapy vaʼerã ipíntare? Nahániri. Antonio, oikóva Brasílpe ha orekóva 73 áño, omombeʼu: “Káda día ajahu ha ajevarvea. Añehaʼãmbaite añemonde porã ha che ao siémpre ipotĩ”.

Péro ndovaléi avei jajepyʼapyeterei rasa ñane píntare, síno ñaneakãguapy vaʼerã. Peteĩ kuñakarai Corea del Surpegua, hérava Bok-im ha orekóva 69 áño, heʼi: “Aikuaa ningo ndaikatuveimaha aipuru umi ao aipuru vaʼekue che mitãkuñáme”.

Revyʼakuaa vaʼerã

REVYʼAKUAA VAʼERÃ. “Akóintekena pesegi pevyʼa.” (1 Tesalonicenses 5:16.) Oiméne reñeñandu vaise jepi nemanduʼávo umi mbaʼe rejapo vaʼekuére nemitãvépe ha koʼág̃a ndaikatuvéimava. Péro aníkena emboguapyeterei upéva ndejehe. Repensaitereíramo umi mbaʼe yma guarére, reñeñandu vaíta. Nemanduʼa vaʼerã oĩha heta mbaʼe nde ikatúva gueteri rejapo. Joseph, oikóva Canadápe ha orekóva 79 áño, heʼi: “Aiko rangue añelamenta umi mbaʼe ndaikatúivare ajapo, avyʼa umi mbaʼe si ikatúvare ajapo”.

¿Mbaʼépa nepytyvõta avei reñeñandu porãve hag̃ua? Por ehémplo, ikatu releeve ha reñehaʼã reaprende kósa ipyahúva. Ernesto, oikóva Filipínaspe ha orekóva 74 áño, oho jepi vivliotékape ha ogueraha hógape umi lívro ointeresáva chupe. Haʼe olee jave oñeimahinamba voi oviahárõ ko múndo tuichakuére, ha igustoiterei chupe upéva. Peteĩ karai Sueciagua hérava Lennart omombeʼu avei oñehaʼãha hína oaprende ótro idióma, orekóramo jepe 75 áño.

Nembaʼeporã vaʼerã

NEMBAʼEPORÃ VAʼERÃ. “Pendepojera memékena pende rapichándi ha oñemyengoviáta peẽme.” (Lucas 6:38.) Rekompartíramo la reguerekomíva ha rehasa tiémpo nde rapichakuérandi katuete revyʼáta, reikuaágui rejapoha álgo iporãva hesehapekuéra. Hosa, peteĩ kuñakarai orekóva 85 áño ha oikóva Brasílpe, oñehaʼã oipytyvõ hapichakuérape hasypamíramo jepe. Haʼe omombeʼu: “Che amigokuéra hasy térã oñedesanima jave, ahenói chupekuéra por teléfono térã askrivi chupekuéra peteĩ kárta. Sapyʼánte katu aguerahauka chupekuéra rregalíto, aprepara álgo hoʼumiʼarã térã algún póstre oñembojuruheʼẽ hag̃ua”.

 Nde nembaʼeporãramo nde rapichakuérandi, haʼekuéra avei imbaʼeporãta ótrondi. Peteĩ karai Sueciagua, hérava Jan ha orekóva 66 áño, heʼi voi: “Rehayhu ha retrata porãramo nde rapichakuérape, haʼekuéra avei nderayhu ha ndetrata porãta”. Añetehápe ningo ndekalidáramo ha reñehaʼãramo nembaʼeporã, entéronte ovyʼáta oĩ jave nendive.

NDEKALIDA VAʼERÃ. “Umi oñemomombyrýva hapichakuéragui opensa ijehénte, péicha ohechauka naiñaranduiha.” (Proverbios 18:1, NM.) Sapyʼánte ningo reimesétante voi neaño, péro ojapo vaíta nderehe reñemomombyrýramo ne amigokuéragui ha ni neresẽsevéi nde rógagui. Peteĩ karai Nigeriagua, hérava Innocent ha orekóva 72 áño, heʼi: “Che ajeheʼa opavavéndi, tahaʼe imitãva térã ijedáva, ha upéva chembovyʼaiterei”. Börje, peteĩ karai Sueciagua orekóva 85 áño, heʼi avei: “Umi mitãrusu ningo ikyreʼỹeterei, upévare añehaʼã ahasave tiémpo hendivekuéra. Haʼete voi ku chemitã jeýva mbaʼe péicha jave”. Nde voi ikatu reñemotenonde ha reinvita mimi ne amigokuérape nde rógape. Han-sik, peteĩ karai oikóva Corea del Súrpe ha orekóva 72 áño, heʼi: “Che rembireko ha che rovyʼaiterei roinvita jave ore amigokuérape ógape rosena térã rohasa porã hag̃ua oñondive; roinvita imitãvape ha ijedávape avei”.

Ndekalida vaʼerã

Umi persóna ikalidáva oñemongetakuaa hapichakuérandi. Upévare, rejapysaka porã vaʼerã umi ótrore oñeʼẽ jave, ha ehechauka reñeinteresaha hesekuéra. Peteĩ kuñakarai Mozambiquegua, hérava Helena ha orekóva 71 áño, heʼi: “Añehaʼã chekalida ha atrata porã enterovépe. Añemongeta jave che rapichándi, ajapysaka porã hese, aikuaa hag̃ua mbaʼépa opensa térã ogusta chupe”. José, orekóva 73 áño ha oikóva Brasílpe, heʼi avei: “Igustoiterei ningo jahasa tiémpo umi persóna ovyʼakuaávandi, ñanerendukuaáva, ñanentendéva ha oñeinteresáva ñanderehe. Umichagua persóna tuichaiterei ñanemokyreʼỹ”.

Nemanduʼa vaʼerã avei ne “ñeʼẽ akóinte iporã ha ijuky” vaʼerãha (Colosenses 4:6). Eñehaʼãkena etrata porã ha emokyreʼỹ nde rapichakuérape.

NDEAGRADESÍDO VAʼERÃ. “Pehechaukákena pendeagradesidoha.” (Colosenses 3:15.) Oĩ jave ojapóva ndéve peteĩ favór, aníkena nderesarái reagradese hag̃ua chupe. Upéva nepytyvõta rejogueraha porãve hag̃ua nde rapichakuérandi. Peteĩ kuñakarai hérava Marie-Paule, oikóva Canadápe ha orekóva 74 áño, heʼi: “Ndaʼareiete che ména ha che rova peteĩ departaméntope. Ore amigokuéra heta orepytyvõ rojapo hag̃ua la ore mudánsa. ¡Romombaʼeterei ningo upéva! Upévare rojapo voi káda únope peteĩ notíta de agradesimiénto ha algúnope roinvita okaru hag̃ua orendive ógape”. Jae-won, peteĩ kuñakarai orekóva 76 áño ha oikóva Corea del Súrpe, oagradeseterei avei oĩ rupi ogueraháva chupe umi rreunión ojapóvape umi testígo de Jehová. Haʼe heʼi: “Aagradeseterei ningo péicha chepytyvõ haguére hikuái. Katuete voi ameʼẽ jepi chupekuéra plataʼimi ikombustívle repyrã. Sapyʼánte katu aprepara peteĩ rregaloʼi ha amoĩ hendive peteĩ nóta aagradese hag̃ua chupekuéra”.

Opa mbaʼe ári, jaagradese vaʼerã jaikove haguére, upéva ningo tuichaiterei mbaʼe. Rréi Salomón heʼi voi: “Peteĩ jagua oikovéva iporãve peteĩ león omanóma vaʼekuégui” (Eclesiastés 9:4, ÑÑB). Ñandeaktitu porãrõ ha ñañehaʼãmbaitéramo jajeadapta umi kámbio og̃uahẽvare ñandetuja térã ñaneg̃uaig̃ui vove, lomímonte javyʼáta ñandeedáramo jepe.

Ndeagradesído vaʼerã