Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Junio de 2015

¿Mávapa pe anticristo?

¿Mávapa pe anticristo?

Ndaʼaréi osẽ hague peteĩ pelíkula de terrór hérava Anticristo.

Peteĩ filósofo hérava Friedrich Nietzsche, oskrivi vaʼekue áño 1900 mboyvemi peteĩ lívro hérava El anticristo.

Umi rréi ha emperadór Edad Mediapegua ohenóimi vaʼerã iñenemigokuérape anticristo.

Martín Lutero, peteĩ alemán ojerrevela vaʼekue pe rrelihión katólika kóntrape, ohenói vaʼekue umi pápa oĩvape Rómape anticristo.

¿MBAʼÉPA ou ndéve ne akãme rehendu vove pe palávra anticristo? Ymaite guive opaichagua hénterema oñemboja haʼeha pe anticristo, por ehémplo, umi rréi, umi pápa, umi oñemoĩva pe iglésiare ha umícha. Péro, ¿mávapa añetehápe pe anticristo? ¿Iñimportántepa jaikuaa upéva? La Bíbliape oñeñeʼẽ avei pe anticrístore unas kuánta vése, jahechamína mbaʼépa heʼi hese.

OJEPILLA MÁVAPA PE ANTICRISTO

Apóstol Juan añoite oipuru la Bíbliape pe palávra anticristo. ¿Mbaʼépa heʼi hese? Pe primera kárta oskrivi vaʼekuépe heʼi: “Pe tiémpo og̃uahẽmbotaitéma huʼãme ha peẽ pehendúma haguéicha pe anticristo ou hína, añetehápe koʼág̃ama voi oĩ heta oñemoĩva Crístore. Ha upéva rupive ñande jahechakuaa koʼág̃a pe tiémpo og̃uahẽmbotaitemaha huʼãme. Haʼekuéra oĩ vaʼekue ñande apytépe, péro osẽ oho hikuái ndahaʼéigui ñandeichagua. [...] ¿Máva piko pe ijapúva, ndahaʼéiramo upe onegáva Jesús haʼeha pe Cristo? Kóva haʼe hína [pe anticristo], upe onegáva pe Túvape ha Itaʼýrape” (1 Juan 2:18, 19, 22, nóta).

Apóstol Juan ohechauka porã vaʼekue pe anticristo haʼeha umi persóna okambiapáva la Jesús omboʼe vaʼekue ha ijapúva ikóntrape oheja vai hag̃ua chupe

¿Mbaʼépa ikatu ñaaprende apóstol Juan heʼi vaʼekuégui? Haʼe ningo heʼi oĩha “heta oñemoĩva Crístore”, upéva ohechauka porã pe anticristo ndahaʼeiha peteĩ persónante, síno heta. Heʼi avei haʼekuéra onegaha Jesús haʼeha pe Cristo térã Mesías, ha nomombeʼuporãiha mávapa añetehápe Jesucristo ha Itúva. Upéicharõ pe anticristo haʼe hína umi persóna heʼíva ijehe haʼeha pe Cristo térã umi grúpo heʼi guaʼúva orrepresentaha chupe. Apóstol Juan heʼi vaʼekue avei “haʼekuéra oĩ [hague] ñande apytépe”, upéva heʼise orrechasa hague hikuái umi mbaʼe Jesús omboʼe vaʼekue. Koʼãichagua hénte ningo ja oĩma vaʼekue Juan oskrivírõ guare ipriméra kárta. Upe tiémpope peteĩ apóstol añoiténtema hemby kuri, ha oiméne upévare haʼe heʼi vaʼekue “pe tiémpo og̃uahẽmbotaitemaha huʼãme”.

Apóstol Juan heʼi vaʼekue avei pe anticristo omboʼetaha umi mbaʼe ndoúiva Ñandejáragui. Haʼe oskrivi: “Entéro profesía heʼíva Jesucristo ou hague yvypóraicha, ou hína Ñandejáragui. Péro entéro profesía heʼíva Jesús ndoúi hague yvypóraicha, ndoúi Ñandejáragui. Avei kóva hína pe profesía omombeʼúva pe anticristo, peẽ pehendu kuri haʼe omombeʼúta hague umi mbaʼe, ha koʼág̃a oñeñeʼẽma upévare ko múndope” (1 Juan 4:2, 3, nóta). Upe rire, isegúnda kártape heʼi jey: “Heta oporombotavyséva osẽ ko múndope, umi ndogueroviáiva Jesucristo ou hague yvypóraicha. Upéva haʼe hína pe oporombotavyséva ha oñemoĩva Crístore” (2 Juan 7). Upéicharõ, Juan ohechauka porã vaʼekue pe anticristo haʼeha umi persóna okambiapáva la Jesús omboʼe vaʼekue ha ijapúva ikóntrape oheja vai hag̃ua chupe.

UMI “PROFÉTA JAPU” HA UMI “OÑEMOĨVA ÑANDEJÁRARE”

Jesús heʼíma vaʼekue oĩtaha proféta japu oúva ‘ovecharamoguáicha, péro añetehápe haʼéva hína lóvo ñembyahýi’

Heta áño apóstol Juan oñeʼẽ mboyve pe anticrístore, Jesús heʼíma vaʼekue idisipulokuérape: “Peñangarekóke pendejehe, cháke oĩta proféta japu oúva pene rendápe ovecharamoguáicha, péro añetehápe  haʼekuéra hína lóvo ñembyahýi” (Mateo 7:15). Avei apóstol Pablo heʼi vaʼekue umi kristiáno Tesalonicaguápe: “Aníke avave pendegueraha tape vaíre, cháke [Jehová] ára ou mboyve ou raẽ vaʼerã pe oñemoĩva Ñandejárare, pe kuimbaʼe aña, pe kuimbaʼe oñehundítava” (2 Tesalonicenses 2:3).

Koʼã versíkulo ohechauka porã umi apóstol tiémpope oĩma hague umi proféta japu ha umi oñemoĩva Ñandejárare, oñehaʼãva omokangy umi kristiáno jerovia. Koʼã hénte ijapu Jesús kóntrape ha okambiapa iñenseñánsa, ha umívare opensa kuri apóstol Juan oñeʼẽrõ guare pe anticrístore. Ha Pablo heʼívo ‘pe kuimbaʼe oñehunditaha’, ohechauka porã mbaʼépa Jehová opensa hesekuéra.

ANÍKENA JAHEJA PE ANTICRISTO ÑANEMBOTAVY

Pe anticristo koʼag̃aite peve ombotavy oikóvo umi héntepe. Oĩ heta persóna ha grúpo oñemoĩva Jesús rehe ha umi mbaʼe haʼe omboʼe vaʼekuére. Haʼekuéra apropósito ijapu ha okambiapa umi mbaʼe oĩva la Bíbliape la hénte oguerovia hag̃ua Ñandejára ha Jesús peteĩnteha. Ñande ñañatende vaʼerã ani hag̃ua ñanembotavy hikuái. Jahechamína mokõi enseñánsa japu haʼekuéra oipurúva oporombotavy hag̃ua.

Ymaiterei guivéma heta rrelihión heʼíva ijehe kristianoha omboʼe pe trinida. Heʼi hikuái pe Túva ha pe Taʼýra peteĩnteha. Ha ko enseñánsa káusare heta persóna ipyʼaporãva ndoikuaái Ñandejárape ha ndaikatúi osegi Jesús ehémplo, la Biblia omboʼeháicha (1 Corintios 11:1; Santiago 4:8). Koʼã rrelihión nomboʼeporãi mávapa añetehápe Ñandejára ha Jesús, ha okonfundipa umi héntepe, upévare jaʼekuaa haʼekuéra haʼeha avei pe anticristo.

Koʼã rrelihión ombotavy avei la héntepe heʼívo chupekuéra oipuru hag̃ua umi Biblia ndorekóiva Ñandejára réra, Jehová. Hiʼarive ojeskrivi ypýrõ guare la Biblia ojepuru 7.000 véserupi voi. ¿Mbaʼépa oiko péicha oporombotavy rupi hikuái? Heta persóna upéva káusare ndaikatúi oikuaa porã Ñandejárape.

¿Mbaʼérepa iñimportanteterei jaikuaa Ñandejára réra? Upéva oipytyvõ umi hénte ipyʼaporãvape oñemoag̃ui hag̃ua hese. Péicha oiko vaʼekue Richard rehe, haʼe omombeʼu mbaʼépa oiko vaʼekue oñemongetárõ guare mokõi testígo de Jehovándi. Haʼe heʼi: “Ohechauka chéve hikuái la Bíbliape Ñandejára heraha Jehová. Ha chesorprendeterei upéva, pórke che núnka ni napensáiva Ñandejára orekoha avei héra”. Upe guive Richard oñepyrũ ojapo umi mbaʼe oĩva la Bíbliape ha okambia heta mbaʼépe oĩ porã hag̃ua Jehovándi. Haʼe heʼive: “Aaprende rire Ñandejára réra aikuaa porãve chupe ha añemoag̃uive hese”.

Ymaiterei guivéma pe anticristo oporombotavy oikóvo ha hetápema ogueraha tape vaíre. Péro jastudiávo la Biblia, jaikuaa porã mávapa hína pe anticristo ha ndajahejamoʼãi ñanembotavy (Juan 17:17).