¿Mbaʼépepa ideprovécho raʼe apóstol Páblope oreko pe siudadanía rromána?

PABLO HEʼI: “¡AJERURE AJEHUSGA HAG̃UA CÉSAR RENONDÉPE!”

Umi siudadáno rrománo ningo oreko vaʼekue heta derécho ha priviléhio, ha umíva oservi vaʼekue chupekuéra oĩ aja pe império de Rómape. Haʼekuéra okumpli vaʼerã umi léi Romapegua, ndahaʼéi pe provínsia oĩhamegua léi. Ojeakusáramo peteĩ rrománope ojapoha peteĩ mbaʼe vai, ikatu ojehusga chupe según umi léi oĩva upe provínsiape, péro orekóiti pe derécho ohendúvo chupe peteĩ trivunál rrománo. Ha oñekondenáramo chupe a muérte, ikatu ojerure ohecha hag̃ua ikáso pe emperadór.

Pe polítiko rrománo Cicerón, oiko vaʼekue síglo primérope Jesús ou mboyve, heʼi vaʼekue: “Avave ni mbaʼevéicharõ ndaikatúi oñapytĩ ni ombyepoti peteĩ siudadáno rrománope. Ha peteĩ persóna ojukáramo chupe katu haʼete voi ojukáva itúvape mbaʼe”.

Apóstol Pablo heta opredika vaʼekue Roma tuichakuére. Ha la Biblia omensiona oipuru hague pe derécho orekóva kómo siudadáno rrománo tres vése: 1) Oĩrõ guare Filípospe heʼi umi mburuvicha ndorrespetaiha chupe kómo rrománo, oñembyepoti haguére chupe. 2) Jerusalénpe heʼi peteĩ ofisiálpe haʼe rromanoha, pono oñenupã chupe. 3) Ojerure ojehusga hag̃ua chupe César renondépe (Hechos 16:37-39; 22:25-28; 25:10-12).

¿Mbaʼéichapa ojepaga vaʼekue yma umi ovecharerekuápe?

PETEĨ TÁVLA OJEJAPÓVA ÑAIʼŨGUI OĨHÁME PETEĨ KONTRÁTO OJAPÓVA UMI OVECHA JÁRA UMI OVECHAREREKUÁNDI (ÁÑO 2050-RUPI, JESÚS OU MBOYVE)

La Biblia omombeʼu Jacob oñangareko hague itio Labán ovechakuérare 20 áño pukukuére. Primero ombaʼapo 14 áñore ikatu hag̃uáicha omenda Labán rajykuérare, ha umi ótro 6 áño ombaʼapo okonsegi hag̃ua hymbakuerarã (Génesis 30:25-33). Peteĩ rrevísta heʼi: “Umi eskritór yma guare ha umi oleévape g̃uarã la Biblia, ikonosído vaʼekue pe tráto ojapóva Labán ha Jacob, pórke ojejapómi vaʼerã voínte peichagua tráto” (Biblical Archaeology Review).

Umi siuda Nuzi ha Lársape, opytáva Irákpe, ojetopa umi távla ojejapóva ñaiʼũgui, oĩháme umi kontráto ojapo vaʼekue umi ovecha jára umi ovecharerekuándi. Umi kontráto odurámi un áño, oñepyrũ oñeñapĩ vove umi ovecha ha opa el ótro áño upe fécharupi jey. Pe pastór oñatendémi vaʼerã unos kuánto ovecháre, ha oanota mboy tiémpopa oreko káda animál ha avei haʼépa mácho térã émbra. Ha un áño haguépe pe ovecha jára orresivi peteĩ kantida pe ovecha raguekuégui, unos kuánto ikriakuéra, kamby, kesu ha umícha. Hembýva katu opytáma pe ovecharerekuápe.

Amáske heta umi ovecha émbra, tuichave la rreváño. Por ehémplo, oĩramo 100 émbra oñehaʼarõ onase 80 ovecharaʼýrupi. Ha omanóramo peteĩ ovecha, pe ovecharerekua opaga vaʼerã hese. Upévare haʼekuéra oñehaʼã oñangareko porã umi ovecháre.