Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Febrero de 2015

 JAJEROVIAVE HAG̃UA | JOSÉ

“Ñandejára ikatu omyesakã mbaʼépa heʼise umi suéño”

“Ñandejára ikatu omyesakã mbaʼépa heʼise umi suéño”

JOSÉ hyʼái hykue anga oúvo pe pasíllore. Upe díape Egíptope hakueterei ha haʼe katu ombaʼapo pohýi vaʼerã. Okápe ojajái pe kuarahy, péro pe kársel haʼe oĩháme ni michĩmi ndojopéi, haʼete peteĩ tatakua iñypytũmbáva. José ningo tódo el día anga oĩ upépe, upévare oime vaʼerã oikuaapáma káda detalleʼi orekóva pe koty haʼe oĩháme, umi kuaraʼi jepe oiméne oikuaapáma. Ha ojerrespetáramo jepe chupe pe kárselpe, lomímonte osufri umi mbaʼe osufríva peteĩ karseléro.

Idiferentete piko koʼág̃a la isituasión. Yma ningo haʼe oiko vaʼekue umi sérro de Hebrón ypýpe, oñangareko umi ovecha mimíre ha oiko trankílo porã ihentekuérandi. ¡Oiméne piko ohechagaʼuete umi mbaʼe! Orekórõ guare 17 áño itúva ojokuái chupe ha oguata kuri heta kilómetro upearã. Koʼág̃a katu pe kársel ryepýremante ikatu okorre, ojere jerénte ha ombeti jeýma parére. Péro, ¿mbaʼére piko José og̃uahẽ upéva upe situasiónpe? Iñermanokuéra ningo ndochaʼéi vaʼekue hese ha ojukase voi katu chupe, péro amo ipahápe odesidi hikuái ovendetaha chupe umi komersiántepe. Upéi ojegueraha chupe Egíptope ombaʼapo hag̃ua peteĩ funsionário rógape, hérava Potifar. Kon el tiémpo ipatrón okonfiavéma Josére ha omeʼẽ chupe heta rresponsavilida. Péro ipatróna, Potifar rembireko, heʼi guaʼu José oviolase hague chupe ha upéicha rupi koʼág̃a haʼe oĩ ko kársel ivaietévape (Génesis, kapítulo 37 ha 39). *

José koʼág̃a orekóma 28 áño, ha 10 áñore oiko kárselpe térã esklávoramo. Oiménengo haʼe ni noñeimahinái péicha oikotaha hese. Ha oñeporandúne: “¿Sera ke algún día asẽta koʼágui? ¿Ahecha jeýne piko che túvape ha che ermáno Benjamínpe? ¿Mboy tiémpore piko apytáta gueteri koʼápe?”.

¿Ndépa reñeñandúmava avei José oñeñandu haguéicha? Ñanemitãme ningo ñande ñaplanea jepi mbaʼéichapa jaikose jakakuaapa rire, péro upéinte ikatu ojere vaipaite ñandéve ha okambia ñane situasión, ha upéva ikatu ñanemoñeñandu vaieterei. ¿Mbaʼéichapa ikatu ñanepytyvõ José ehémplo? Jahechamína.

“JEHOVÁ OSEGI OIPYTYVÕ JOSÉPE”

José oikuaa porã Jehová ndohejareimoʼãiha chupe ha osegitaha omombarete chupe oaguanta hag̃ua. Oĩramo jepe peteĩ lugár ivai ha iñypytũvape, lomímonte Ñandejára ovendesi chupe. La Biblia heʼi voi: “Jehová osegi oipytyvõ Josépe”. Upéicha rupi pe guardiakársel imbaʼeporã José ndive (Génesis 39:21-23, NM). Péro José ojapo avei ipárte ha ombaʼapo jejopy, upévare Jehová amasdía ovendesive chupe. ¡Oiméne tuicha ipyʼaguapy José oikuaávo Ijára oĩha hendive!

José oime vaʼerã oikuaase opytátapa pe kárselpe tóda la vída, térãpa osẽta algún día. Katuete ningo oñeʼẽ meme upévare Jehovápe oñemboʼe jave chupe. Ha oikoháicha jepi voi, Jehová ombohovái iñorasión haʼe oimoʼãʼỹháicha. Peteĩ díape entéronte oñesorprende ojeguerahárõ guare préso mokõi kuimbaʼépe ombaʼapóva pe faraón de Egíptope g̃uarã, peteĩva haʼe umi panadéro héfe ha pe ótro umi kopéro héfe (Génesis 40:1-3).

 Pe guardiakársel heʼi Josépe oñangareko hag̃ua koʼã mokõi kuimbaʼére. * Peteĩ pyharépe, káda uno osoña peteĩ mbaʼe ha oipyʼapyeterei chupekuéra. Koʼẽ rire, José ohechakuaa hesekuéra ojepyʼapyha hikuái, ha oporandu chupekuéra: “¿Mbaʼéreiko la penderovasyete koestedía?” (Génesis 40:3-7, NM). Oime vaʼerã ningo oporandu porãitereígui chupekuéra, umi kuimbaʼe omombeʼu Josépe la osoña vaʼekue. José ni ndoikuaái upe ojapóva okambiaitetaha isituasión. Haʼe ndohechaukáirire ojepyʼapyha koʼã kuimbaʼére, ¿ajépa nomombeʼumoʼãi asy kuri chupe umi mbaʼe osoña vaʼekue hikuái? Upévare iporã ñañeporandumi: ¿Ahechaukápa avei che ajepyʼapy añeteha che rapichakuérare? Jajapóramo upéicha jahechaukáta jajeroviaha Ñandejárare.

José otrata porã ha iñamávle vaʼekue umi présondi

Upéi umi kuimbaʼe heʼi Josépe káda uno osoña hague peteĩ mbaʼe ha ndoikuaaiha mbaʼépa osiknifika. Umi ehípsio ningo omombaʼeterei umi mbaʼe ohecháva iképe, upévare oheka voi hikuái máva ikatu oexplika chupekuéra isuéño. Umi panadéro héfe ha umi kopéro héfe ndoikuaái Jehová voi ombou hague chupekuéra upe suéño, péro José oikuaa. Upévare ombopyʼaguapy hag̃ua chupekuéra heʼi: “Ñandejára ikatu omyesakã mbaʼépa heʼise umi suéño. Pemombeʼumína chéve” (Génesis 40:8, NM). ¡Ajépa iporãite José ehémplo! Koʼág̃a avei ñande jastudiáta jave la Biblia tekotevẽ jajapo avei haʼe ojapo haguéicha, ha jajerure ñande pyʼaite guive Ñandejárape tañanepytyvõ ñantende hag̃ua Iñeʼẽ la Biblia, jaiko rangue jajerovia ñandejehe (1 Tesalonicenses 2:13; Santiago 4:6).

Pe kopéro raẽ omombeʼu Josépe la osoña vaʼekue, ha heʼi: “Che képe ahecha peteĩ parrál máta. Ko parrál máta mbohapy hakã, upéi hoky, ipoty, hiʼa ha hiʼajupa umi parrál. Ha che areko che pópe faraón kópa, ha ajagarra umi parrál ha añami pype. Upe rire ambohasa faraónpe pe kópa”. Jehová oipytyvõ Josépe ontende hag̃ua pe suéño, ha heʼi chupe tres día haguépe faraón omoĩ jeytaha chupe ipuestokuépe. Oikuaávo upéva pe kopéro ovyʼaiterei. Upéi José ojerure chupe: “Nemanduʼákena cherehe faraónpe, péicha nembaʼeporãta chendive ha cheguenohẽta ko lugárgui” (Génesis 40:9-15, NM).

Pe panadéro héfe ohechakuaámarõ iporãha umi mbaʼe heʼi vaʼekue José, pyaʼe voi omombeʼu chupe la osoña vaʼekue. Haʼe ohecha iképe mbohapy ajaka iñakã ári ha umívape henyhẽte la pan, péro upéi ou umi guyra ha hoʼupa umi pan. Jehová oipytyvõ jey Josépe ontende hag̃ua pe suéño, ha ndahaʼéi la iporãmbáva umi notísia. José heʼi pe panadérope: “Umi tres ajaka heʼise hína tres día. Koʼágui tres día haguépe faraón neakãʼóta ha upe rire omosaingóta nde retekue peteĩ póstere, ha umi guyra hoʼúta nde roʼo” (Génesis 40:16-19, NM). José pyʼaguasúpe omombeʼu Ñandejára mensáhe, tove taiporã térã  ivai upe notísia, ojapoháicha jepi voi Ñandejára siervokuéra (Isaías 61:2).

Ohasa rire tres día, oñekumplipaite José heʼíva guive. Upe tiémpo guivéma umi ndahaʼéiva Ñandejára siervokuéra ofestehámi vaʼekue ikumpleáño, ha upéva la ojapóva kuri upérõ faraón. Ha ofestehakuévo ikumpleáño ohusga avei pe panadéro ha pe kopérope. José heʼíma haguéicha ojejuka pe panadérope, ha pe kopérope katu oñeperdona ha oñemeʼẽ jey chupe ipuestokue. Ñambyasýramo jepe, ko kuimbaʼe imalagradesído ha naimanduʼái faraónpe Josére (Génesis 40:20-23).

“NDAHAʼÉI NINGO CHE LA IKATÚVA AMYESAKÃ NDÉVE”

Dos áñoma ohasa, ha ndoikói mbaʼeve (Génesis 41:1). Oime vaʼerã José okairóma anga. Jehová ningo oipytyvõ kuri chupe omyesakã hag̃ua umi kuimbaʼépe la osoña vaʼekue hikuái, ha katuete opensáne raʼe ensegídama osẽtaha pe kárselgui upéva rire. Oiméne anga káda koʼẽnte opensa jeýma upe díape osẽtamaha. Péro upéi pytũ jeýma ha mbaʼevete ndoikói. Katuete ningo umi dos áño ipukueterei chupe g̃uarã, ndopamoʼãi voi. Péro ndahaʼéi upe haguére haʼe ojedesesperáva, síno osegi ojerovia Jehováre. Haʼe ojedesidíma osegitaha oaguanta toiko la oikóva. Ha amo ipahápe upe situasión omombareteve ijerovia (Santiago 1:4).

Koʼág̃arupi avei ñande ñambohovái jepi heta situasión ijetuʼúva ha ñaaguantámante vaʼerã umíva. Upévare ñaikotevẽ Ñandejárare, pórke haʼe añoite ikatu omeʼẽ ñandéve pe pasiénsia ha pyʼaguapy. Haʼe oipytyvõ vaʼekue Josépe ha ñandéve avei ikatu ñanepytyvõ ani hag̃ua ñañedesanima ni japerde la esperánsa (Romanos 12:12; 15:13).

Ikatu pe kopéro mbaʼe hesarái Joségui, péro Jehová arakaʼeve ndahesaráiri chugui. Upévare peteĩ pyharépe ombou faraónpe mokõi suéño iñextráñova. Primero ohecha osẽha pe rrío Nílogui siete vaka ikyra ha iporãva, ha upéi ohecha osẽha avei siete vaka ipiru ha ivaietereíva. Ha umi vaka ipirúva oñepyrũ hoʼu umi vaka ikyrávape. Pe segundo suéñope ohecha osẽha peteĩ trígo mátare siete espíga tuicha ha iporãva, ha upéi ohecha osẽha avei siete espíga michĩ ha ivaíva, ha umi espíga michĩ ha ivaíva oñepyrũ hoʼu umi ótra espígape. Upéi faraón opáy ha ojepyʼapyeterei osoña rupi umi mbaʼe, upémarõ ohenoika umi saserdóte ojapóvape máhia ha entéro umi kuimbaʼe iñarandúvape, péro ni peteĩva ndaikatúi heʼi chupe mbaʼépa osiknifika umi mbaʼe osoña vaʼekue (Génesis 41:1-8). ¿Mbaʼépa oiméne heʼi raʼe chupe hikuái? ¿Oime piko okirirĩeténte chugui térã oñepyrũ heʼi chupe oimeraẽ vyrorei? Ndajaikuaái mbaʼéichapa raʼe, péro jaikuaa nokonvenséi hague hikuái faraónpe. Upévare haʼe oimehápe rei otopase álgien ikatúva oexplikami chupe umi mbaʼe osoña vaʼekue.

Hasypeve pe kopéro imanduʼa Josére. Ha ikonsiénsia omolestágui chupe, oho omombeʼu faraónpe ojapoha dos áño peteĩ kariaʼy oexplika hague chupe ha pe panadérope umi mbaʼe osoña vaʼekue hikuái ha oñekumpli hague la heʼíva guive. Upémarõ faraón pyaʼe porã ohenoika Josépe (Génesis 41:9-13).

¡Oime vaʼerã ovyʼaite raʼe José ohechávo ouha faraón rembiguaikuéra! Pyaʼe porã oho okambia ijao ha ojevarvea. Ha posívlemente oñemoakãperõ avei, pórke upéicha vaʼekue la kostúmbre Egíptope. ¡Oiménengo hetaite oñemboʼe raʼe Jehovápe oho porã hag̃ua chupe oñeʼẽ vove faraóndi! Sapyʼaitépe haʼe ja oĩma pe palásiope faraón renondépe. La Biblia omombeʼu ñandéve pe rréi heʼi hague Josépe: “Asoña kuri peteĩ mbaʼe, ha avave ndaikatúi heʼi chéve mbaʼépa heʼise. Péro ojeʼe chéve oñemombeʼúramo ndéve peteĩ suéño nde ikatuha remyesakã mbaʼépa heʼise”. José katu ohechauka iñumildeha ha ojeroviaha Ñandejárare, heʼívo: “Faraón, ndahaʼéi ningo che la ikatúva amyesakã ndéve upe resoña vaʼekue. Ñandejára hína upe omyesakã porãtava ndéve” (Génesis 41:14-16, NM).

José iñumílde vaʼekue, upévare heʼi faraónpe: ‘Ndahaʼéi ningo che la ikatúva amyesakã ndéve, síno Ñandejára’

Jehová ningo omombaʼeterei umi hénte iñumílde ha iñeʼẽrendúvape, upévare oikuaauka Josépe umi saserdóte de máhia ha iñarandúva oikuaasete vaʼekue. José oexplika faraónpe umi mokõi mbaʼe osoña vaʼekue heʼiseha peteĩ mbaʼénte. Ha heʼi chupe osoña hague dos vése pórke Ñandejára odesidimaha oikotaha upéva ha oñekumplitaha katuete. José heʼi faraónpe umi vaka ikyráva ha umi espíga iporãva orrepresentaha siete áño oĩtahápe hetaiterei hiʼupy Egíptope. Péro upéi heʼi outaha peteĩ ñembyahýi guasu siete áño pukukuére, ha umi vaka piru ha umi espíga michĩ ha ivaíva orrepresentaha upéva. Heʼi avei chupe avave naimanduʼamoʼãveimaha Egíptope  ojeiko porã hague, pórke tuichaitereíta pe ñembyahýi oútava (Génesis 41:25-32).

Faraón oguerovia umi mbaʼe José heʼíva. Péro, ¿mbaʼe piko la ojapótava osolusiona hag̃ua? José orrekomenda chupe oheka hag̃ua peteĩ kuimbaʼe ivale ha iñarandúva, oñenkarga hag̃ua toñembyaty umi hiʼupy umi siete áño iporãtahápe la pórte, ikatu hag̃uáicha ohupytypa porã umi ótro siete áño oĩtahápe ñembyahýi guasu (Génesis 41:33-36). José ningo ivakeánoma oñenkarga hag̃ua umi mbaʼére, péro haʼe ndojeruréi oñemeʼẽ hag̃ua chupe upe puésto ni ndoikói oñehenduka faraónpe haʼe ivaleha upévape. José ningo iñumildeterei ha ojerovia Ñandejárare, upévare ni nopensái voi ojapóvo upéva. Ñande avei jajerovia mbaretéramo Jehováre ndajaikomoʼãi jajechauka ni jaiko jaʼe ñandevaletereiha, jajaposégui peteĩ mbaʼe. Síno jahejáta Jehová pópe upe situasión ha ñahaʼarõta trankílo porã haʼe tosolusiona oikuaahaichaite.

“¿OĨNEPA ÓTRO KUIMBAʼE PÉICHA OREKÓVA ÑANDEJÁRA ESPÍRITU?”

Faraón ha isiervokuérape g̃uarã oĩ porãiterei la José heʼíva. Faraón orrekonose Ñandejára oipytyvõha Josépe, upévare heʼi isiervokuérape: “¿Oĩnepa ótro kuimbaʼe péicha orekóva Ñandejára espíritu?”. Upéi heʼi Josépe: “Ñandejára ningo oikuaauka ndéve koʼã mbaʼe, ha upévare ndaiporichéne ótro ndéicha ivale ha iñarandúva. Nde kárgope opytáta che róga, ha umi che retãygua ojapóta opa mbaʼe nde eréva. Ha che haʼe rupi rréi, che añoite amanda guasuvéta ndehegui” (Génesis 41:38-41, NM).

Faraón okumpli heʼi vaʼekue, ha omanda oñemeʼẽ hag̃ua Josépe ao iporãitereíva omonde hag̃ua, oipeʼa ikuãirũ oipurúva osella hag̃ua ha omeʼẽ chupe. Omoĩ avei ijajúrare peteĩ kollár de óro ha omeʼẽ chupe peteĩ kárro iporãitereíva, ikatu hag̃uáicha oviaha Egipto tuichakuére ha okumpli oñenkarga vaʼekue chupe (Génesis 41:42-44). ¡Máva piko oimoʼãta peichaite peve okambiataha isituasión! José ningo ikoʼẽ kuri pe kárselpe peteĩ prisionéroicha, ha koʼág̃a katu oĩ pe palásiope ha haʼe pe segunda persóna omanda guasuvéva Egíptope. Upe díape oiko vaʼekue, ohechauka José ojapo porã hague ojeroviávo Jehováre. Ñandejára ningo ohechapaite umi inhustísia ohasa vaʼekue isiérvo heta áñore ha osolusiona haʼe oikuaahaichaite ha itiempoitépe. Ha ndahaʼéi okorrehínteva umi inhustísia, síno ojapo kuri oñekotevẽtava oprotehe hag̃ua ipuévlo Israélpe amo gotyove. Upévagui ñañeʼẽvéta ág̃a osẽ vove ótro artíkulo koichagua.

Oiméramo nde avei heta tiémporema rehasa peteĩ situasión nembohasa asýva, ani rejedesespera. Nemanduʼákena José ehémplore, haʼe ningo siémpre iñumílde, iñamávle ha ojerovia mbarete Jehováre. Ha oaguanta rupi ipahaite peve Jehová ovendesi chupe.

^ párr. 4 Ehecha umi artíkulo “Jajeroviave hag̃ua”, osẽva rrevísta Ñemañaháme, 1 de agosto ha 1 de noviembre de 2014.

^ párr. 10 Yma Egíptope oĩ vaʼekue mas de 90 kláse de pan, upévare jaʼekuaa umi panadéro héfe ipuésto porã hague. Upérõ faraón oreko vaʼekue avei peteĩ grúpo oñenkargáva omeʼẽ hag̃ua chupe umi víno iporãvéva, ha ja ke upérõ oĩ vaʼekue heta ojukaséva pe rréipe, orrevisa vaʼerã avei hikuái ani hag̃ua oñemoĩ pe víno térã servésape venéno. Ha umi kopéro héfe oñenkarga upéva upe grúpore. Upévare jaʼekuaa avei haʼeha peteĩ persóna de konfiánsa ha ikatu voi oiko chugui pe rréi konsehéro.