Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Enero de 2015

 KO RREVÍSTAPE OÑEANALISA | ¿OĨNEPA PETEĨ GOVIÉRNO

Ñandejára Rréino: peteĩ goviérno ndaikorrúptoiva

Ñandejára Rréino: peteĩ goviérno ndaikorrúptoiva

Peteĩ kontadór ombaʼapóva goviérno de Nicaráguape g̃uarã, omombeʼu mbaʼérepa ijetuʼuete opa hag̃ua pe korrupsión, haʼe heʼi: “Ore rombaʼapóva goviérnope g̃uarã ningo siudadánonte avei. Rosẽ pe sosiedágui”.

Ñambyasýramo jepe, pe sosiedápe la majoría ikorrúpto, ha umi ombaʼapóva goviérnope g̃uarã ningo osẽ pe sosiedágui. ¡Mbaʼéicha voi piko upéicharõ ñahaʼarõta umi goviérno iñonrrádo, ajépa! Jaipotáramo peteĩ goviérno ndaikorrúptoiva nosẽi vaʼerã ko sosiedágui. La Biblia ohechauka Ñandejára Rréino haʼeha peteĩ goviérno peichagua, ha Jesús voi omanda idisipulokuérape ojerure hag̃ua upéva oñemboʼévo (Mateo 6:9, 10).

Ñandejára Rréino ningo peteĩ goviérno oĩva yvágape, ha koʼẽrõitéma oipeʼáta umi goviérno oĩva ko yvy ape ári omoĩ hag̃ua hendaguépe imbaʼéva (Salmo 2:8, 9; Apocalipsis 16:14; 19:19-21). Pe Rréino oipeʼaitéta pe korrupsión. Péro, ¿mbaʼérepa ikatu jajerovia upévare? ¿Mbaʼérepa yvypóra goviérno ndaikatúi ojapo upéva? Jahechamína.

1. PE PODÉR

PROVLÉMA: Umi goviérno ningo oñemantene umi hénte opaga rupi iñimpuésto. Ha umi ombaʼapóvape upépe ijetuʼu iñonrrádo hag̃ua, pórke ipórupi ohasa heta pláta. Avei oĩ heta hénte osovornáva umi funsionáriope opaga saʼive hag̃ua umi impuésto. Upéicha rupi pe goviérno ohupive umi impuésto, ikatu hag̃uáicha orrekupera umi funsionário omonda vaʼekue, ha upévare oĩ hetave korrupsión. Amo ipahápe umi hénte inosénte la osufríva umi korrúpto káusare.

SOLUSIÓN: Ñandejára Jehová haʼe hína upe orekóva podér ko Rréinope (Apocalipsis 11:15). * Haʼe noikotevẽi avave opaga chupe impuésto omantene  hag̃ua igoviérno. Ñandejára ningo ipyʼaporã ha oreko podér, upévare nombofaltamoʼãi mbaʼeve umi oñemoĩvape igoviérno poguýpe (Isaías 40:26; Salmo 145:16).

2. PE OGOVERNÁVA

PROVLÉMA: Profesóra Susan Rose-Ackerman, ñañeʼẽma hague pe ótro artíkulope, heʼi ke oñeeliminaite hag̃ua pe korrupsión “oñepyrũ vaʼerãha umi omanda guasuvévagui ha oguejy ohóvo pe sosieda peve”. Umi hénte ningo nokonfiavéi la goviérnore ohechávo haʼekuéra ojokoseha guaʼu la korrupsión oatakávo umi polisía ha aduanéropente, péro ndojapói mbaʼeve ohechávo ikorruptoha umi funsionário omanda guasúva. Ha umi persóna iñonrradovéva jepe ojavýnte avei, la Biblia heʼi voi: ‘Ndaipóri avave ko yvy apére siémpre ojapo porãva opa mbaʼe’ (Eclesiastés 7:20).

Jesús ndohejái vaʼekue Satanás osovorna chupe

SOLUSIÓN: Jesucristo ningo pe Rréi Ñandejára Rréinope ha haʼe ndohejamoʼãi avave osovorna chupe, ndojoguaiete umi governánte umánope. Upéichama voi ojapo vaʼekue oĩrõ guare ko yvy ape ári. Satanás, upe ogovernáva ko múndo, opromete kuri Jesúspe omeʼẽtaha chupe “umi goviérno oĩva ko yvy ape ári” oñesũramo henondépe ha oadora chupe. Péro haʼe ndoaseptái pe sovórno (Mateo 4:8-10; Juan 14:30). Ótra vuéltape katu hetaiterei ojetortura vaʼekue Jesúspe, ha upe situasiónpe jepe haʼe iñonrrádo ha ndoaseptái pe dróga ojeofreséva chupe. Hiʼarive upéva ikatúta kuri oipytyvõ Jesúspe anive hag̃ua osufrieterei, péro oikuaa avei ndaikatumoʼãiha otermina porã hembiapo (Mateo 27:34). Koʼág̃a Jesús oĩma yvágape, ha ojapo hetaiterei mbaʼe ohechaukáva oĩha kapasitádo ogoverna porã hag̃ua Ñandejára Rréinope (Filipenses 2:8-11).

3. MBOÝPA ODURA PE GOVIÉRNO

PROVLÉMA: Heta paíspe káda tánto ojejapo umi eleksión, ha péicha umi hénte ikatu oipeʼaite umi funsionário korrúptope, omoĩ hag̃ua hendaguépe iñonrradovéva guaʼu. Péro añetehápe umi eleksión ha kampáña polítika henyhẽ avei korrupsióngui, ha umi país iplatavévape jepe ojejapo upéicha. Por ehémplo, umi irríkova omoĩ heta pláta okontrivui hag̃ua umi polítikondi ojapo jave ikampáña, oikuaágui upéi okonsegitaha heta venefísio.

Pe hués John Paul Stevens, ombaʼapóva pe Tribunal Supremo de Estados Unídospe, heʼi ke umi irríkova ojapo rupi upéicha, “umi hénte ndojeroviavéi umi polítikore, pórke oñepyrũrema voi ohechauka naiñonrradoiha hikuái ha ndorrespetaiha umi léi”. Ajeve voi ningo hetaiterei hénte opensa umi polítiko ikorruptoha.

SOLUSIÓN: Ñandejára Rréino ningo opytáta opa ára g̃uarã, upévare umi kampáña polítika ha pe korrupsión oĩva umívape opaitéta (Daniel 7:13, 14). Avei ko goviérnope ndahaʼéi ojeporavóva vóto  rupive mávapa ogovernáta, síno Ñandejára voi oelehi pe Rréipe ha noñekambiamoʼãi arakaʼeve. Upéicha rupi umi mbaʼe ojedesidíva ou porãta enterovépe, ha ndahaʼemoʼãi sapyʼaiterãnte, síno opa ára g̃uarã.

4. UMI LÉI

Ñandejára Rréino ningo peteĩ goviérno oĩva yvágape

PROVLÉMA: Oĩ opensáva oñemoĩ vaʼerãha léi pyahu ikatu hag̃uáicha opa pe korrupsión. Péro umi expérto odeskuvri ke amáske oĩve umi léi, ijetuʼuve la héntepe okumplipa hag̃ua. Avei hetaiterei ojegasta vaʼerã oñemoĩ hag̃ua en práktika umi léi antikorrupsión, ha ipahápe ndojehupytýi mbaʼeve guasu.

SOLUSIÓN: Ñandejára Rréinope ningo umi léi tuichaiterei idiferénte yvypóra léigui. Por ehémplo, oñemoĩ rangue peteĩ lístape mbaʼe mbaʼépa ojeproivi térã nahániri, Jesús omeʼẽ peteĩ léi ifasiletereíva oñekumpli hag̃ua: “Opa mbaʼe peẽ peipotáva ojapo penderehe pende rapichakuéra, peẽ pejapo vaʼerã avei hesekuéra” (Mateo 7:12). Oĩ avei léi ojevasáva umi mbaʼe ñañandúvare, ndahaʼéi umi mbaʼe jajapóvarente. Jesús heʼi vaʼekue: “Rehayhu vaʼerã nde rapichápe nde rejehayhuháicha” (Mateo 22:39). Ñandejára añoite ningo ikatu ohecha umi mbaʼe jarekóva ñande pyʼapýpe, upévare haʼe voi oñenkargáta enterove okumpli hag̃ua umi léi omoĩva (1 Samuel 16:7).

5. UMI MBAʼE OMBOʼÉVA

PROVLÉMA: Umi funsionário ha umi siudadáno ikorrúpto, opensa rupi ijehe ha noñekontentáigui pe oguerekóvare. Pe ótro artíkulope jahecha kuri peteĩ edifísio tuicháva hoʼa hague umi konstruktór osovorna haguére umi funsionáriope. Haʼekuéra oipuru umi materiál ndoikoguasúiva ha nokumplíri umi mbaʼe ojeruréva pe léi de segurida, oikuaágui upéva osẽ varatovetaha chupekuéra.

Ikatu hag̃uáicha opaite pe korrupsión, tekotevẽ oñemboʼe la héntepe oñekontenta hag̃ua oguerekomívare ha ani hag̃ua opensa ijehénte. Péro umi goviérno koʼag̃agua ndaikatúi ha nomboʼeséi voínte la héntepe koʼã mbaʼe.

 SOLUSIÓN: Ñandejára Rréino ikatu osolusiona ko provléma, omboʼe rupi la héntepe hekoporã hag̃ua ha oreko hag̃ua heta kualida iporãva. * Ko goviérno omboʼe la héntepe ‘akóinte ombopyahu hag̃ua opensa lája’ (Efesios 4:23). Ha umi kualida ikatúta oipytyvõ umi héntepe ani hag̃ua itaryrýi ni opensa ijehénte, ovyʼa hag̃ua oguerekomívarente ha ojepyʼapy hag̃ua hapichakuérare (Filipenses 2:4; 1 Timoteo 6:6).

6. UMI SIUDADÁNO

PROVLÉMA: Sapyʼánte oĩramo jepe peteĩ lugár oĩháme heta iñonésto ha ijedukádova, lomímonte oĩ heta ikorrúptova. Umi expérto heʼi upévare ndaikatuiha oñeeliminaite la korrupsión. Hetaitérõngo ikatu oñekontrolave umi perhuísio oguerúva, péro ndaikatúi oñesolusiona ko provléma.

SOLUSIÓN: Pe Convención de las Naciones Unidas contra la Corrupción heʼi ke oñeelimina hag̃ua pe korrupsión, umi goviérno omokyreʼỹ vaʼerãha la héntepe “iñonrrádo, irresponsávle ha iñonésto hag̃ua”. Umi mbaʼe ojaposéva hikuái ningo iporã añete, péro Ñandejára Rréino ojapóta peteĩ mbaʼe iporãitevéva. Ndahaʼéi omokyreʼỹtanteva la héntepe oreko hag̃ua umi kualida, síno oexihíta voi chuguikuéra upéva. La Bíbliape heʼi voi Ñandejára Rréinope ndaiporimoʼãiha umi hénte itaryrýiva ni ijapúva (1 Corintios 6:9-11; Apocalipsis 21:8).

Entéronte ikatu ñakumpli umi mbaʼe Ñandejára ojeruréva ñaime hag̃ua Irréinope. Umi kristiáno ypykue ikatu vaʼekue ojapo. Por ehémplo, peteĩ disípulo hérava Simón, osovornamoʼã umi apóstolpe, péro haʼekuéra orrechasa upéva ha heʼi chupe: “Eñarrepentíke ko mbaʼe vaietégui”. Simón ohechakuaa ivaietereiha upe ojapomoʼã vaʼekue, upévare ojerure umi apóstolpe oñemboʼe hag̃ua hesehápe, ikatu hag̃uáicha Ñandejára operdona chupe (Hechos 8:18-24).

MBAʼÉICHAPA IKATU ÑAÑEMOĨ ÑANDEJÁRA RRÉINO POGUÝPE

Tahaʼe haʼéva nde país, nde ikatu reñemoĩ Ñandejára Rréino poguýpe (Hechos 10:34, 35). La Biblia ohechauka porã mbaʼéichapa ikatu rejapo upéva. Umi testígo de Jehová ovyʼáta ikatu haguére ohechauka ndéve mbaʼéichapa ojapo hikuái peteĩ estúdio de la Biblia. Reguerekoʼimíramo tiémpo káda semána, ikatúta reikuaa porãve “umi marandu porã oñeʼẽva Ñandejára Rréinore”. Reikuaáta heta mbaʼe, umíva apytépe mbaʼéichapa Ñandejára oelimináta pe korrupsión (Lucas 4:43). Eñekomunikamína umi testígo de Jehová oikóva nde reikoha gotyo, térã eike Internétpe ko direksiónpe: www.jw.org/gug.

¿Restudiasépa la Biblia gratiete?

^ párr. 8 La Biblia heʼi Ñandejára heraha Jehová.

^ párr. 22 Por ehémplo, ikatu relee pe artíkulo “¿Es posible ser honrado en un mundo corrupto?”, osẽ vaʼekue La Atalaya del 1 de octubre de 2012-pe.