Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Noviembre de 2014

 KO RREVÍSTAPE OÑEHESAʼỸIJO | ¿OEXISTÍPA SATANÁS?

¿Jakyhyje vaʼerãpa Satanásgui?

¿Jakyhyje vaʼerãpa Satanásgui?

Satanás ningo ojogua pe monóxido de karvónope: ndojekuaái ha ipeligrosoiterei

Pe monóxido de karvóno ningo peteĩ gas ndojehecháiva ni noñehetũiva, péro ikatu ojuka peteĩ persónape oñemeʼẽʼỹre enkuénta. Umi investigasión ohechauka umi persóna omanóva oñenvenena rupi, la mita rasa haʼeha ko gas káusare. Péro ipeligrósoramo jepe ko gas, natekotevẽi jakyhyje chugui. ¿Mbaʼérepa? Oñeinventa rupi heta método ñanepytyvõva japilla hag̃ua oĩpa pe gas ñande jerére, ikatu hag̃uáicha jajapo tekotevẽva ani hag̃ua ñandeperhudika. Oĩ voi katu omoĩkáva hógape peteĩ detektór de gas ha ipúre pe alárma pyaʼe voi ojapo tekotevẽva ojesalva hag̃ua.

Satanás ningo ojogua pe monóxido de karvónope: ndojekuaái, ipeligrosoiterei ha ijetuʼu japilla hag̃ua chupe. Upéicharõ jepe, ndajakyhyjéi vaʼerã chugui. ¿Mbaʼérepa? Ñandejára omeʼẽ rupi ñandéve heta mbaʼe ñanepytyvõtava jajeprotehe hag̃ua chugui. Jahechamína unos kuánto:

Ñande ikatu jadesidi. Santiago 4:7 heʼi: “Peñemoĩ mbaretéke pe Añáre ha haʼe odiparáta pendehegui”. Satanás ningo ipoderóso añete, péro ndaikatúi ñandeovliga jajapo hag̃ua peteĩ mbaʼe ndajajaposéiva. Jaʼe porãsérõ g̃uarã, ñande kárgope opyta upe desisión. Ñamombaretéramo ñande jerovia ha ñañemoĩramo Ñandejára ykére, pe aña ñanderejáta (1 Pedro 5:9). Jesús oñeplanta vaʼekue Satanáspe ha omboykete umi tentasión omoĩva chupe, “upémaramo pe Aña oheja chupe” (Mateo 4:11). Ñande avei ikatu jajapo upéicha.

Ñandejára amista. Santiago 4:8 heʼi: “Peñemoag̃uíkena Ñandejárare”. Péicha Jehová direktoite voi ñaneinvita jaiko hag̃ua iñamígoramo. ¿Mbaʼépa ñande ikatu jajapo ñakonsegi hag̃ua upéva? Upearã iñimportanteterei ñaaprende opa mbaʼe la Biblia omboʼéva chugui (Juan 17:3). Amáske jaikuaa Ñandejárape, jahayhuvéta chupe. Ha amáske jahayhu chupe, koʼýte jaserviséta chupe (1 Juan 5:3). ¿Ha mbaʼépa ojapóta ñande Ru yvagapegua ohechávo jaserviseha chupe? Santiago 4:8 osegi heʼi: “Haʼe oñemoag̃uíta penderehe”.

Jehová omeʼẽ ñandéve heta mbaʼe jajeprotehe hag̃ua Satanásgui

Ñandejára ogarantisa ñandéve iproteksión. Proverbios 18:10 heʼi: “Jehová réra ningo peteĩ tórre imbaretéva. Upépe oho pe hekojojáva ha haʼe oprotehe chupe” [NM]. ¿Heʼisépa ko téxto ikatuha jaipuru Ñandejára réra peteĩ amulétoicha? No, heʼise ke umi orrespetáva Ñandejárape, ikatuha ojerure chupe proteksión oikotevẽha óra, ha haʼe katuete oprotehetaha chupekuéra.

Ehémplo oĩva la Bíbliape. Hechos 19:19-pe oñemombeʼu peteĩ rreláto ikatúva ñanepytyvõ. Upépe ohechauka mbaʼépa ojapo vaʼekue umi oikóva  Éfesope, oiko ramoitérõ guare chuguikuéra kristiáno. Pe rreláto heʼi: “Heta umi ojapóva máhia ogueru ilivrokuéra, ombyaty ha ohapy opavave renondépe. Ha okalkulávo hikuái mboýpa ovale, otopa ohupytyha cincuenta mil monéda de pláta”. * Umi kristiáno ohapypaite oĩva guive rrelasionádo pe máhiandi, tove tahepy térã varáto raʼe umi mbaʼe. Ha upéva peteĩ ehémplo iporãitereíva ñandéve g̃uarã. Ko múndope ningo henyhẽte pe espiritísmo térã máhia. Oĩ heta mbaʼe ojejapóva jajediverti hag̃uánte guaʼu, péro añetehápe oĩ diréktamente rrelasionádo pe espiritísmondi ha upéva haʼete ku oinvitáva umi demoniokuérape ou hag̃ua. Upévare tekotevẽterei jajehekyiete voi koʼã mbaʼégui, toiko la oikóva (Deuteronomio 18:10-12).

Rogelio, pe kuimbaʼe ñañeʼẽma hague pe primer artíkulope, oñekonvense Satanás oexistiha, orekórõ guare 50 áño ae. ¿Mbaʼére piko okambia la opensa lája? Haʼe omombeʼu: “Primera ves arekomi peteĩ Biblia. Ha aleérõ guare, añekonvensete voi Satanás oexistiha. Ha aikuaa rupi upéva, ikatu ajeprotehe chugui”.

“Aleérõ guare [la Biblia], añekonvensete voi Satanás oexistiha. Ha aikuaa rupi upéva, ikatu ajeprotehe chugui”

¿Mbaʼépa nde ere, igústonepa jaiko peteĩ múndope ndaiporimoʼãveimahápe Satanás ni avave ñanemboligáva jajapo hag̃ua ivaíva? La Biblia ningo ogarantisa ñandéve koʼẽrõitéma oikotaha upéva. Ha anivéma hag̃ua pe Aña ombotavy umi héntepe, heʼi ojepoitaha chupe “pe lágo oĩháme tatarendy ha asúfre” (Apocalipsis 20:10). Upéva heʼise Satanás oñehunditaha opa árare. Omanoitéta voi. ¡Mbaʼeichaite piko ipiroʼýta opytávo Ñandejára siervokuéra oiko rire upéva!

Rehaʼarõ aja og̃uahẽ upe día, reaprendeve vaʼerã rehóvo Ñandejáragui ha umi mbaʼe haʼe opensáva. * Rejapóramo upéicha, nde ikatúta avei ere ág̃a Ñandejára siervokuéra iñeʼẽrendúvandi: “¡Satanás el Diablo ndoexistivéima!”.

^ párr. 8 Oiméramo umi monéda oñemensionáva koʼápe haʼe denário rrománo, hetaiterei ovale. Peteĩ persóna ombaʼapo vaʼerã kuri 50.000 día ogana hag̃ua upe kantida de pláta.

^ párr. 11 Reikuaasevéramo mbaʼépa Ñandejára opensa Satanásre ha pe espiritísmore, ikatu rehecha kapítulo 10-pe, lívro Mbaʼépa añetehápe omboʼe la Biblia? Ikatu rejerure peteĩ testígo de Jehovápe.