Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Octubre de 2014

 LA BIBLIA OKAMBIA CHUPEKUÉRA

Che apensa vaʼekue chejehénte voi

Che apensa vaʼekue chejehénte voi
  • ONASE: 1951-PE

  • PAÍS: ALEMANIA

  • ÓTRA INFORMASIÓN: OIKO VAʼEKUE IÑAKÃRE HA OPENSA IJEHÉNTE

CHE REMBIASAKUE:

Che mitãʼípe aiko vaʼekue Leipzig ypýpe, oĩva yma oñehenói vaʼekuépe República Democrática Alemana, opytáva Polonia ha República Checa ypýpe. Ha arekórõ guare 6 áño, che túva ombaʼapo vaʼerã kuri Brasílpe, upémarõ rohopaite roiko upépe ha upe rire rova Ecuadorpeháma.

Arekópe 14 áño, che túva ha che sy chemondo jey Alemániape astudia hag̃ua peteĩ koléhio privádope, ha aiko voi upépe. Apyta cheaño peteĩ ha chéma ajecha vaʼerã chejeheve. Che aiko cheakãre ha ajapo ajaposéva, nacheinteresái omolestápa ótrope umi mbaʼe ajapóva.

Upéi che tuvakuéra ou jey Alemániape che arekópe 17 áño. Primerorã aiko hendivekuéra, péro kómo ke che aikose cheakãre ha ndajaposéi haʼekuéra heʼíva chéve, aha ógagui arekórõ guare 18 áño.

Péro káda día ohasávante ndavyʼavéi, ndaigústoi chéve mbaʼeve. Upévare aaverigua umi grúpo ha organisasión ikatu vaʼerã chepytyvõ, péro ndajuhúi mbaʼeve. Upémarõ adesidi ikuentaveha arrekorre ko planéta porãite, oñehundipa mboyve.

Ajogua che motorã ha aha África gotyo. Péro tiémpo riremínte oñaprovlema chehegui che móto, ha aha jeýmante vaʼerã Európape. Aarregla rire che móto, aha peteĩ plájape oĩva Portugálpe. Ha upépe ahechakuaa iporãvetaha ajedehántema che mótogui ha aviaha várkope ko múndo tuichakuére.

Upépe atopa peteĩ grúpope ojepreparáva hína okrusa hag̃ua pe oséano Atlántico, ha imitãmitã gueteri hikuái. Che aviaha hendivekuéra ha roho ísla del Caribe peve, upéi ropyta sapyʼami Puerto Rícope ha upe rire roho jey Európape. Upe grúpope ajuhu che rembirekorãme, hérava Laurie. Haʼe ha che rojoguase vaʼekue peteĩ várko veléro roiko hag̃ua pype. Tres mése aja roheka roikóvo upéva, ha rojuhumírõ g̃uarã peteĩ, pe ehérsito alemán cherrekluta ha opyta rei la ore projékto.

Apyta pe Marínape 15 mése, ha upéva upe interínpe amenda Laurie rehe ha rokontinuase rorrekorre ko múndo. Ajerrekluta  mboyvemi rojogua vaʼekue peteĩ láncha, ha aĩ aja pe ehérsitope, rokambia mimi rohóvo chugui algúna kósa, rojapo peve chugui peteĩ várko veléro. Ore ningo roikose vaʼekue upépe ha péicha rosegi hag̃ua rorrekorre ko planéta porãitére. Asẽmíre pe Marínagui ha rotermina mboyve ore várko, umi testígo de Jehová oñeʼẽ orendive ha roñepyrũ rostudia hendivekuéra.

LA BIBLIA CHEPYTYVÕ AKAMBIA HAG̃UA:

Yma ningo roiko vaʼekue Láuriendi romendaʼỹre ha apitámi vaʼekue, péro umíva umi mbaʼe asolusionáma astudia mboyve jepe, upévare che apensa ndahaʼemoʼãiha tuichaitereíva umi kámbio ajapo vaʼerã (Efesios 5:5). Avei apensámi aipuru porãha che rekove arrekorrévo ko múndore, ahecha hag̃ua umi mbaʼe porãita Ñandejára ojapóva.

Péro upéi ahechakuaa heta mbaʼe gueteri akambia vaʼerãha, koʼýte che personalidápe. Che asegi vaʼekue apensa chejehénte ha aikose cheakãre, ha ndaipotái voi avave heʼi chéve mbaʼépa ajapo vaʼerã. Hiʼarive chejejapo vaʼekue, ha ajechaukaseterei voi umi mbaʼe arekóvare ha ajapokuaávare. Che apensa vaʼekue chejehénte voi.

Peteĩ díape alee pe Sermón del Mónte (Mateo, kapítulo 5-7), ha chesorprende aleérõ guare Jesús heʼiha ovyʼaha ‘umi iñembyahýiva ha ijyʼuhéiva’ (Mateo 5:6, nóta). Che apensámi: “Péro, ¿mbaʼéicha piko aipo iñembyahýi ha ijyʼuhéiva ikatu ovyʼa?”. Ha amáske alee la Biblia, antendeve umi mbaʼe oĩva pype. Ahechakuaa entéronte ñaikotevẽha Ñandejárare, ha ikatu hag̃uáicha ñañemoag̃ui hese, tekotevẽha jahechakuaa raẽ ndaikatuiha jaiko heseʼỹ. Jesús voi ningo heʼi vaʼekue: “Ovyʼa umi ohechakuaáva oikotevẽha Ñandejárare” (Mateo 5:3).

Laurie ha che roñepyrũ rostudia la Biblia Alemániape, péro upéi rova Fránciape ha upe rire Itáliape. Ha rohohápente oĩ umi Testígo. Ha ahecharamoiterei mbaʼeichaitépa ojoayhu hikuái ha ojogueraha porã. Entéronte ojoayhu oñoermánoicha, ndahaʼéiramo jepe ojopaisgua (Juan 13:34, 35). Upéi, kon el tiémpo rojevautisa.

Oikóramo jepe chehegui testígo de Jehová, asegi vaʼerã gueteri akambia che personalida. Laurie ha che roho ore várko velérope umi kósta oĩvare Áfricape, ha upéi rokrusa pe oséano Atlántico rog̃uahẽ hag̃ua Estados Unídospe. Ha rohokuévo, aaprende peteĩ mbaʼe iñimportantetereíva. Pe oséano mbytére rei, roime oreaño peteĩ ha ýmante rohecha ore jerére, upépe ahechakuaa che ndahaʼeiha mbaʼevete voi añekomparávo ñande Apoharére. Ha kómo ke ndarekói mbaʼeve guasu ajapo vaʼerã pe oséanope, chetiémpo heta ha aaprovecha alee hag̃ua la Biblia. Chegustaiterei umi rreláto oñeʼẽva Jesús rekovekuére. Haʼe ningo perfékto vaʼekue ha oreko umi kualida iporãitereíva, upéicharõ jepe haʼe noñemombaʼeguasúi ni nopensái vaʼekue ijehénte, síno siémpre omotenonde Itúvape.

Ajepyʼamongetávo Jesús rembiasakuére, ahechakuaa ndaikatuiha ameʼẽ Ñandejárape pe tiémpo hembývante chéve. Síno amotenonde vaʼerãha Ñandejára Rréino añoite, ha upéva haʼe vaʼerãha upe iñimportantevéva chéve g̃uarã (Mateo 6:33). Upévare rog̃uahẽvo Estados Unídospe, Laurie ha che rodesidi ropytataha upépe ikatu hag̃uáicha roservi porãve Ñandejárape.

UMI MBAʼE PORÃ AHUPYTÝVA:

Yma che apensámi chejehénte, ha ndaikuaái vaʼekue osẽ porãnepa chéve umi mbaʼe adesidíva. Koʼág̃a katu aheja rupi Ñandejára chegia, chearanduve adesidi hag̃ua (Isaías 48:17, 18). Avei isentidove chéve che rekove, pórke aadora Ñandejárape ha aipytyvõ umi héntepe oikuaa hag̃ua chupe.

Umi konsého oĩva la Bíbliape chepytyvõ ajogueraha porãiteve hag̃ua che rembirekóndi. Avei Jehová tuichaiterei orevendesi omeʼẽvo oréve ore familiarã, peteĩ mitãkuña iporãitereíva, oservi ha ohayhúva avei Ñandejárape.

Heta mbaʼe ijetuʼúva ningo añete rohasa roservi aja Jehovápe, péro haʼe siémpre oĩ ore ykére. Upévare ore avei rojedesidi roservitaha chupe ha siémpre rojeroviataha hese, toiko la oikóva (Proverbios 3:5, 6).