Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Septiembre de 2014

 TEMBIASAKUE

Ni michĩmi nambyasýi aservi haguére Ñandejárape

Ni michĩmi nambyasýi aservi haguére Ñandejárape

Chemitãme heta oĩ vaʼekue oñembohorýva cherehe; che katu cheotĩ ha akyhyjeterei vaʼekue asẽ vaírõ g̃uarã oimeraẽ mbaʼépe. Che apensámi la Biblia ikatuha chepytyvõ ha chekonsola, upévare aha peteĩ iglésia katólikape ikatu hag̃uáicha antende la Biblia heʼíva. Péro amo ipahápe ndoikói ahaʼarõ haguéicha, upémarõ apraktikántema umi depórte.

Añepyrũ ajapo ehersísio ha oiko chehegui fisikokulturísta. Kon el tiémpo aavri peteĩ gimnasio San Leándrope (California, Estados Unidos). Ha ambaʼapo heta fisikokulturístandi, umíva apytépe peteĩ osẽ vaʼekuéndi kampeón de fisikokulturísmo Américape. Péro ni umíva umi mbaʼe nachembovyʼái vaʼekue.

ATOPA UPE AHEKA VAʼEKUE

Peteĩ che amígo pe gimnasiopegua oikuaávo che antendeseha la Biblia, heʼi chéve añeʼẽ hag̃ua peteĩ ikonosídondi. Upe koʼẽme og̃uahẽ che rógape peteĩ testígo de Jehová, ha cuatro órare ombohovái chéve la Biblia rupive aporandúva guive chupe. Upéi haʼe chupe ikatúpa ou jey kaʼaru, haʼe ou jey ha rosegi roñemongeta la Bíbliare las 12 de la nóche peve. Opa mbaʼe ahendúva ningo chegustaiterei, upévare aporandu chupe ikatúpa aha hendive al ótro día opredikáta jave umi héntepe. Legálmente chesorprende ahechávo mbaʼéichapa oipuru la Biblia ombohovái hag̃ua oñeporandúva guive chupe. Upe guive adesidi che ajaposeha avei upéva.

Upéi avende che gimnasio ha aha apredika ko prekursór ndive, upéicha ningo umi testígo de Jehová ohenói umi oipurupa léntova itiémpo opredika hag̃ua. Ajevautisa mayo de 1948-pe, Estadio Cow Palace de San Francíscope (California), ha un áño haguépe oiko avei chehegui prekursór.

Upéi ajerure umi Testígope ovisitami hag̃ua avei che sýpe. Haʼe orresivi porã chupekuéra ha tiémpo riremínte ojevautisáma. Ihentekuérape ndogustaiete upéva, péro mama lomímonte osegi oservi Ñandejárape omano meve. Ore família apytégui, che sy ha che añoite roservi vaʼekue Jehovápe.

AIKUAA CHE REMBIREKORÃME

Áño 1950-pe ava Colorádope, peteĩ siuda héravape Grand Junction, ha upépe aikuaa Bílliepe. Haʼe onase vaʼekue áño 1928-pe, ha okakuaa peteĩ tiémpo ijetuʼuetereívape, oñehenói voi upe tiémpope la Gran Depresión. Káda pyhare, isy Minnie oleémi chupe la Biblia peteĩ lámpara hendy kangymíva guýpe. Billie orekórõ guare 4 áño ja oleekuaáma vaʼekue ha oikuaáma de memória heta istória oĩva la Bíbliape. Áño 1940 opakuévo, isy oñepyrũ ostudia la Biblia umi testígo de Jehovándi ha oaprende pe infiérno ndahaʼeiha peteĩ lugár jahahápe jasufri opa árare, síno orrepresentaha pe lugár ohohápe opytuʼu umi omanóva (Eclesiastés 9:5, 10). Billie sy ha itúva ojevautisa ha oiko chuguikuéra testígo de Jehová.

Billie ostudia hína kuri peteĩ universidápe Bóstonpe, péro upéi áño 1949-pe oho jey hógape ha oñepyrũ ostudia la Biblia. Oiko rangue chugui profesóra, odesidi oservitaha Ñandejárape. Haʼe ojevautisa áño 1950-pe, peteĩ asambléa internasionálpe ojejapóva  Estadio de los Yánkeespe, Nueva York. Upe riremínte rojokuaa, romenda ha roservi oñondive Ñandejárape de tiémpo kompléto.

Roñepyrũ ore servísio peteĩ siuda héravape Eugene, opytáva Oregónpe. Ha upépe rojuhu heta oreamigorã. Áño 1953-pe rova Grants Pásspe, roipytyvõ hag̃ua umi ermáno oĩvape peteĩ kongregasión michĩvape. Upe áñope roñeinvita roho hag̃ua Escuela de Galaádpe, kláse número 23. Upéva ningo peteĩ kúrso ojapóva umi testígo de Jehová ombokatupyry hag̃ua umi oservisévape de misionéro, ha ojejapo South Lánsingpe, opytáva 400 kilómetrorupi noroéste gotyo Nueva Yórkgui.

ROHO KÓMO MISIONÉRO BRASÍLPE

Cinco mése rojegradua rire, diciembre de 1954-pe, Billie ha che roho Brasílpe peteĩ avionéta orekóvape dos motór. Upéi, una óra roviaha haguépe, oñembyai peteĩ imotór ha roaterrisámante Bermúdaspe. Ha rosẽ rire upégui, roho jey roaterrisa Cúbape. ¡Norog̃uahẽmoʼãi voi la Brasílpe! Péro upéi, 36 óra haguépe, hasýpe rog̃uahẽ umi testígo de Jehová sukursálpe, opytáva Río de Janéirope (Brasil).

Pe primer Salón del Reino oĩ vaʼekue Baurúpe, áño 1955-pe. Upe lugár ojealkilánte vaʼekue ha che apinta pe letréro

Ropyta sapyʼami upépe ha upéi rohóma Billie ha mokõi misionérandi Baurúpe (São Paulo). Ko siuda ningo oreko 50.000 avitánte, ha ore katu éntre cuátronte roime.

Roñepyrũ rovisita umi héntepe hogaitépe, péro peteĩ paʼi ndaorerejamoʼãi voi. Rohohápente oresegi ha heʼi umi héntepe ani hag̃ua orerendu. Péro lomímonte rombostudia la Biblia peteĩ famíliape oĩháme éntre heta, ha unas kuántas semána haguépe odesidíma hikuái oserviseha Jehovápe. Tiémpo rire, ojevautisa hikuái ha upe riremínte hetavéma oĩ ostudiáva la Biblia orendive.

Pe família ojevautisa vaʼekue oreko peteĩ ihénte haʼéva presidénte peteĩ club sosiál ikonosídovape. Roñepyrũ roplanea hendive rojapo hag̃ua upépe peteĩ asambléa. Péro pe paʼi oikuaárõ guare upéva, oñehaʼãmbaite okansela pe kontráto. Upémarõ pe presidénte oñembyaty pe club sosiokuérandi ha heʼi porã chupekuéra: “Pekanseláramo ko asambléa, che arrenunsiáta”. Ipahápe rojapo upépe la asambléa.

Áño 1956-pe, roho peteĩ asambléape ojejapóva Sántospe (São Paulo), ha éntre 40 Testígorupi roho che kongregasióngui peteĩ trénpe. Rog̃uahẽ rire pe asambleahágui, atopa peteĩ kárta heʼihápe aservitaha kómo superintendénte viahánte, upéva heʼise aha vaʼerãha avisita umi kongregasiónpe. Ha ajapo upéva 25 áñorupi, ha arrekorrepaite lénto vaʼekue Brasil.

Un áño haguépente oĩma vaʼekue peteĩ grúpo kyreʼỹme opredikáva Baurúpe

UMI MBAʼE AHASÁVA ASERVI AJA KÓMO SUPERINTENDÉNTE

Upe tiémpope ijetuʼueterei vaʼekue ojeviaha hag̃ua. Rojapo vaʼerã upéva míkrope, trénpe, karrétape, visiklétape térã yvýrupi. Pe siuda rovisita ypy vaʼekue haʼe Jaú (São Paulo), ha pe paʼi upepegua orejokosemoʼã.

Heʼi oréve: “¡Peẽ ndaikatúi pepredika che ovechakuérape!”.

Upémarõ roʼe chupe: “Koʼã ndahaʼéi nde ovecha, Ñandejára mbaʼe hikuái”.

Rojapo arréglo ropresenta hag̃ua peteĩ pelíkula ohechaukáva mbaʼéichapa umi testígo de Jehová opredika, hérava La Sociedad del Nuevo Mundo en acción. Péro pe paʼi oho jeýma oréve ha ogueraha unos kuántope oreataka hag̃uáicha. Roikuaávo upéva, pyaʼe rohenói la polisíape. Ha umi henteita og̃uahẽrõ guare upépe, umi polisía oĩmbaitéma pe entrádape ha oapunta hesekuéra ipistóla. Amo ipahápe entéronte ovyʼajoa ohecha rire pe pelíkula.

Rohohápente umi ótro rrelihionpegua oñemoĩ umi testígo de Jehováre. Por ehémplo Brúsquepe, Blumenau ypýpe (Santa Catarina), roikuaa mokõi prekursórape ohasáva koʼãichagua situasión.  Haʼekuéra ningo opredika umi lugár avave nohenduseihápe Testigokuérape, upéicharõ jepe heta mbaʼe porã ohupyty hikuái. Koʼág̃a, 50 áño haguépe, Brúsquepe oĩma mas de 60 kongregasión. Ha upe siuda ypyetépe, Itajaípe, oĩma peteĩ Salón de Asamblea iporãitereíva.

Chemanduʼa heta rovyʼa hague rombaʼapórõ guare umi ermanokuérandi roorganisa hag̃ua umi asambléa, upéva la chegustave vaʼekue aserviha tiémpope de superintendénte. Áño 1975 guive 1977 peve, aservi kómo superintendénte de asambléa Estadio Morumbípe. Peteĩ jey, ojejerure 100 kongregasión hiʼag̃uivévape oñemondo hag̃ua 10 ermáno káda kongregasióngui, omopotĩ hag̃ua pe estádio tuichaite, pe pyhare ojejapo mboyve pe asambléa.

Upe pyharépe, umi futbolísta osẽva ohóvo pe kánchagui oñembohory orerehe ha heʼi: “Emañamína mbaʼéichapa oitypei umíva, ñaimoʼã kuña mbaʼe hikuái”. Ore noropenáinte hesekuéra ha rosegi romopotĩ, ha las 12 de la nóche mboyve, potĩ asy opyta la estádio. Pe karai oñenkargáva pe estádiore oñesorprende ha heʼi: “La ore romopotĩrire rotarda vaʼerãmoʼã una semánarupi, péro peẽ unas kuánta órapente potĩ veráma peheja”.

ROHO JEY ESTADOS UNÍDOSPE

Áño 1980-pe omano che túva, ha upe riremínte roho jey Estados Unídospe roñangareko hag̃ua che sýre Frémontpe (California). Roñemantene hag̃ua roñepyrũ romopotĩ umi edifísio pyharekue, péicha rosegi ore prekursorádo ha roipytyvõ umi persóna oñeʼẽvape portugués. Tiémpo rire rova valle de San Joaquínpe, Fremont ypýpe. Upépe roheka avei umi hénte oñeʼẽvape portugués roipytyvõ hag̃ua chupekuéra, péro ore território tuichavéma, oñepyrũ Sacraméntope ha opa Bákersfieldpe. Koʼág̃a Califórniape oĩma 10 kongregasión upe idiómape.

Áño 1995-pe omano che sy, ha upémarõ roho roiko Florídape, roñangareko hag̃ua Billie túvare omano meve. Isy ja omanóma vaʼekue 1975-pe. Upéi áño 2000-pe rova suroéste gotyo Colorádope. Roipurupa lénto ore tiémpo romboʼe hag̃ua la Biblia umi indíhena amerikánope Navajo ha Ute, oikóva umi sérro perõre. Che koʼág̃a peve aiko upépe, péro lastimósamente che rembireko Billie omano febrero de 2014-pe.

Ojapóma ningo mas de 65 áño peteĩ testígo de Jehová ombohovái hague chéve la Biblia rupive aporandúva guive chupe. ¡Avyʼaiterei ningo ahendu haguére chupe ha akomprova haguére siertoha opa mbaʼe heʼíva guive chéve! Upéicha rupiete añemeʼẽmbaite Ñandejára servísiope ha ni michĩmi nambyasýi ajapo haguére upéva.