La Biblia heʼi porã mbaʼépa ojapóta Jehová ha Itaʼýra Jesucristo anivéma hag̃ua jasufri ko múndo añáme: “Upearã Ñandejára Raʼy ojehechauka vaʼekue: ohundi hag̃ua pe Aña rembiapokue” (1 Juan 3:8). Ko múndope ningo enterove lénto itaryrýi, ndochaʼéi hapicháre ha iñaña, péro umíva koʼẽrõitéma oñehundipáta. Jesús opromete voi “ko múndo ruvicha”, Satanás, ‘oñemosẽtaha’ térã oñehunditaha (Juan 12:31). Ko ánhel aña nodominamoʼãvéima umi héntepe, ha Ñandejára omoñepyrũta peteĩ múndo pyahu, entéronte jaikotahápe trankílo porã ha pyʼaguapýpe ko yvy ape ári (2 Pedro 3:13).

Péro, ¿mbaʼépa oikóta umi hénte nokambiaséivagui voi ha ogustáva chupekuéra ojapo umi mbaʼe vai? La Biblia heʼi porã: “Hekojojávamante oikóne ko yvy ape ári, ijoheipyrévamante hendáne ipype. Iñañáva katu oñehundipáne, ojehapoʼóne ko yvýgui” (Proverbios 2:21, 22). Upéicharõ, umi hénte aña nomboligamoʼãvéima avavépe ojapo hag̃ua ivaíva ha pyʼaguapýmante oĩta ko yvy ape ári. Ha péicha umi hénte ojapóva Ñandejára rembipota, mbeguekatúpe oñemomombyrýta ohóvo pe imperfeksióngui (Romanos 6:17, 18; 8:21).

Ñandejára ndahaʼéi ojapótava ñandehegui peteĩ rrovót pe múndo pyahúpe anivéma hag̃ua ñaneñaña. Síno ñanemboʼéta ha ñanepytyvõta anivéma hag̃ua ñapensa térã jajapo umi mbaʼe vai.

Ñandejára koʼẽrõitéma ohundipáta opa mbaʼe ñanembosufríva

¿Ha mbaʼépa ojapóta Ñandejára anivéma hag̃ua oiko umi desgrásia? Haʼe opromete koʼẽrõitéma osolusionataha upéva oguerúvo Irréino. Upépe ko múndo oĩta ipoguýpe ha ikatútama okontrola opa mbaʼe. Haʼe onombra Itaʼýra Jesucrístope ogoverna hag̃ua upe Rréinope ha haʼe oreko podér omonguera hag̃ua umi hasývape (Mateo 14:14). Avei Jesús ikatu ojoko umi desástre naturál, ojapóma haguéicha voi yma (Marcos 4:35-41). Ha iporãveha katu, ndajasufrimoʼãvéima “umi mbaʼe oñehaʼarõʼỹva” káusare (Eclesiastés 9:11). Irréino poguýpe, umi desgrásia nañandeperhudikamoʼãvéima (Proverbios 1:33).

¿Ha mbaʼépa oikopáta umi hénte inosénte omano vaʼekuégui? Haʼekuéra oreko peteĩ esperánsa iporãitereíva. Jesús omborresusita mboyve iñamígo Lázarope, heʼi vaʼekue: “Che hína pe ñemoingove jey ha che rupive oikove jey umi hénte” (Juan 11:25). Upeichaite ningo, Jesús oreko pe podér omoingove jey hag̃ua umi omano vaʼekuépe.

¿Ndépa reikose peteĩ múndo ndaiporimoʼãveimahápe hénte osufríva ni avave ojapóva mbaʼe vai? Oiméramo upéicha, restudia vaʼerã la Biblia reikuaave hag̃ua Ñandejárape ha hembipota. Umi testígo de Jehová ovyʼáta ikatu haguére nepytyvõ upearã. Eñemongetána hendivekuéra térã eskrivi umi ojapo vaʼekuépe ko rrevísta, ha haʼekuéra oñekomunikáta nendive.