Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Junio de 2014

¿Mbaʼépa oiko umi omanóvagui oikuaaʼỹre Ñandejárape?

¿Mbaʼépa oiko umi omanóvagui oikuaaʼỹre Ñandejárape?

PETEĨ jey, pe diário koreáno The Chosun Ilbo heʼi péicha: “Shim Cheong ningo peteĩ kuña ijojahaʼỹva, péro ndoikuaáiva mbaʼevete Jesúsgui. ¿Oiméne piko oho raʼe infiérnope?”.

Hetápe ndogustái kuri pe diário heʼíva, ¿mbaʼérepa? Coréape peteĩ istória omombeʼu Shim Cheong haʼe hague peteĩ mitãkuña imbaʼeporãitereíva, ha oĩ vaʼekue voi omano hag̃uáicha itúva siegomi rehehápe. Ymaite guive umi hénte oguerohory chupe upe ojapo vaʼekuére, ha heta mitãkuña koreána oñehaʼã voi osegi iñehémplo.

Heta héntepe ndogustái ha ipochy voi ojeʼe haguére Shim Cheong oimeneha osufri hína infiérnope ndojevautisái rupi oiko hag̃ua chugui kristiána. Péro haʼe ningo ndorekói voi kuri oportunida oikuaávo Jesúspe, pórke itiémpope noñemboʼéi vaʼekue voi ivállepe mbaʼevete Crístogui.

Upe artíkulope oñemoĩ avei peteĩ entrevísta ojejapo vaʼekue peteĩ paʼípe upe témare. Oñeporandúrõ guare chupe añetépa oho infiérnope umi omanóva guive orekoʼỹre oportunida oikuaa hag̃ua Jesúspe, haʼe ombohovái: “Ndoroikuaái upéva. Péro oiméne Ñandejára oikuaáma mbaʼépa ojapóta [umichagua héntegui]”.

¿JAJEVAUTISA VAʼERÃPA JAJESALVA HAG̃UA?

Peteĩ ensiklopédia heʼi: “Tekotevẽ jajevautisa jajesalva hag̃ua. Jesucristo heʼi vaʼekue voi pe nonaséi jeýva y ha Espíritu Sántogui, ndaikatumoʼãi oike Ñandejára Rréinope (Jn 3.5)” (The New Catholic Encyclopedia). Upévare heta hénte opensa umi omanóva guive ojevautisa mboyve, ohoha osufri infiérnope.

Péro oĩ avei opensáva naisentidoiha upe enseñánsa. Hetaiterei ningo oĩ omanóva oikuaaʼỹre la Biblia omboʼéva. ¿Omerese piko umichagua persóna ojekastiga opa árare tatarendýpe? ¿Mbaʼépa heʼi la Biblia?

LA BIBLIA OMEʼẼ PETEĨ ESPERÁNSA

La Biblia ohechauka porã Ñandejára nomboykeiha umi héntepe ndoikuaái haguérente umi mbaʼe Haʼe ojeruréva. Hechos 17:30 heʼi voi: “Ñandejára ohejánte vaʼekue ohasa pe tiémpo umi hénte ndoikuaái haguépe mbaʼeve”. Upéicharõ, ¿mbaʼe esperánsapa oreko umi hénte omano vaʼekue oikuaaʼỹre Ñandejárape?

¿Mbaʼépa heʼise raʼe Jesús oprometérõ guare pe mbaʼe vai apohápe: “Reiméta chendive pe paraísope”?

Jaikuaa hag̃ua upéva, jahechami mbaʼépa Jesús heʼi vaʼekue peteĩ mbaʼe vai apohápe omano mboyvemi ijykére pe yvyráre. Upe kuimbaʼe heʼi chupe: “Jesús, nemanduʼákena cherehe reike vove ne Rréinope”. Ha haʼe heʼi chupe: “Añetehápe haʼe ndéve koestedía: Reiméta chendive pe paraísope” (Lucas 23:39-43, nóta).

¿Oprometépa Jesús ko kuimbaʼépe oguerahataha chupe yvágape? Nahániri. La Biblia ningo heʼi pe “onase jeýva” añoite y ha espíritugui ikatutaha oike Ñandejára Rréinope yvágape (Juan 3:3-6). Jesús oprometénte kuri ko kuimbaʼépe oikove jeytaha pe “paraísope”. Upe kuimbaʼe ningo hudío, ha upéicha rupi ohendúmane voi oñeñeʼẽrõ pe paraísore, térã pe hardín de Edén oñeʼẽha pe primer lívro oĩva la Bíbliape (Génesis 2:8). Upéicharõ Jesús omeʼẽ kuri ko kuimbaʼépe peteĩ esperánsa iporãitereíva: omoingove jeýta chupe ojapo vove ko yvýgui peteĩ paraíso, térã peteĩ hardín neporãmba jepéva.

La Biblia opromete “oñemoingove jeytaha umi hekojojáva ha hekojojaʼỹva” (Hechos 24:15). Umi “hekojojaʼỹva” haʼe hína umi hénte omano vaʼekue oikuaaʼỹre Ñandejára Léi ha upéicha rupi ndoikói haʼe oipotaháicha. Jesús omoingove jeýta pe paraísope upe mbaʼe vai apohápe ha hetaitereive hénte omano vaʼekuépe oikuaaʼỹre Ñandejárape. Upépe oñemboʼéta chupekuéra Ñandejára rembipota ha orekóta oportunida ohechauka hag̃ua iñeʼẽrendu ha ohayhuha Ñandejárape.

 ¿MBAʼÉPA OIKÓTA OÑEMOINGOVE JEY VOVE UMI HEKOJOJAʼỸVAPE?

¿Ojehusgátapa umi hekojojaʼỹvape umi mbaʼe ojapo vaʼekuére omano mboyve? Nahániri. Romanos 6:7 heʼi: “Pe omanóva ningo opagapáma ipekádore”. Upéicharõ, umi hekojojaʼỹva omanóvo opagapáma umi mbaʼe vai ojapo vaʼekuére, ha ojehusgáta chupekuéra umi mbaʼe ojapóvare oñemoingove jey rire. ¿Mbaʼérepa iporãve voi ojejapo upéicha?

Ñandejára múndo pyahúpe ningo ojavríta peteĩ lívro oĩtahápe Ñandejára Léi ipyahúva ha umi oñemoingove jeýva orekóta oportunida oikuaávo umíva. Upépe ojehechátama iñeʼẽrendútapa hikuái térãpa nahániri, ha ‘káda únope ojehusgáta hembiapokuére” (Apocalipsis 20:12, 13). Umíva apytégui, hetaiterei oĩta primera ves ohendúva mbaʼépa Ñandejára ohaʼarõ chuguikuéra ha mbaʼépa ojapo vaʼerã oikove hag̃ua opa árare ko yvy ape ári.

Heta oĩ ojerovia jeýva Ñandejárare oikuaa rire mbaʼépa añetehápe omboʼe la Biblia ko témare. Umíva apytépe, peteĩ kuñakarai hérava Yeong Sug. Ihentekuéra ningo katóliko hatã vaʼekue ha haʼe avei. Oĩ voi ipariénte apytégui haʼéva saserdóte. Upéicha rupi avei, haʼe oho peteĩ konvéntope oiko hag̃ua chugui mónha, péro ensegidamínte osẽ jeýma upégui. ¿Mbaʼérepa? Ndogustáigui chupe umi mbaʼe ojejapóva upépe. Avei naisentídoi chupe pe enseñánsa heʼíva ojetorturaha umi héntepe infiérnope; haʼe heʼi avave nomereseiha upéva.

Tiémpo rire, peteĩ testígo de Jehová ohechauka chupe peteĩ téxto oĩva la Bíbliape: “Umi oikovéva oikuaa porã omanotaha; umi omano vaʼekue katu ndoikuaái mbaʼeve” (Eclesiastés 9:5, ÑÑB). Upéi omombeʼu chupe ihentekuéra omano vaʼekue ndosufririha pe infiérnope, síno opytuʼunteha hína ohaʼarõ aja oñemopuʼã jey chupekuéra.

Yeong Sug ohechakuaa heta hénte ndoikuaaiha la Biblia omboʼéva, upévare kyreʼỹme koʼág̃a oipytyvõ oñekumpli hag̃ua Jesús heʼi vaʼekue Mateo 24:14-pe: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite”. Koʼág̃a haʼe opredika umi héntepe ha omombeʼu chupekuéra pe esperánsa porãite oaprende vaʼekue la Bíbliape.

‘ÑANDEJÁRA OTRATA ENTEROVÉPE PETEĨCHANTE’

La Biblia heʼi “Ñandejára otrataha enterovépe peteĩchante, haʼe oguerohory entéro umi hembiapo porãva ha okyhyjéva chugui, tahaʼe haʼéva tetãygua” (Hechos 10:34, 35). Péicha jahechakuaa mbaʼeichaitépa Ñandejára ihústo. La Biblia ningo heʼi voi haʼe ohayhuha pe ‘hustísia ha tekojoja’ (Salmo 33:5, ÑÑB).