Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Abril de 2014

¡Nde ikatu remboyke umi mbaʼe tieʼỹ!

¡Nde ikatu remboyke umi mbaʼe tieʼỹ!

“Che ndahechaséi vaʼekue pornografía, péro peteĩ día aiporu jave Internet, osẽ chéve peteĩ propagánda ha apensaʼỹre aikéma katu upépe.” (CARLOS) *

“Che travahohápe peteĩ kuñataĩ iporãitereíva onovillea cherehe. Upéi heʼíma katu chéve roho hag̃ua peteĩ otélpe rojedivertimi hag̃ua sapyʼaite. Upépe apilláma mbaʼépa la oipotáva.” (DYLAN)

HETA oĩ heʼíva: “Péva ningo peteĩ tentasión chéve g̃uarã”. Péicha ohechauka pe tentasión haʼeha peteĩ mbaʼe ogustáva chupekuéra. Péro oĩ avei oñehaʼãmbaitéva omboyke umi tentasión. ¿Ndépa mbaʼe ere? ¿Ñañehaʼã vaʼerãpa ñamboyke umi tentasión, térãpa ñañentregátantema?

Oĩ ningo añete umi tentasión ndahaʼéiva la ivaietereíva. Por ehémplo, nañanerundimoʼãi ningo jaʼu rasa haguére peteĩ tórta mbaʼe. Péro oĩ ótra tentasión ikatúva ogueru ñandéve heta provléma, por ehémplo, pe tekokyʼa térã tekovai. Proverbios 6:32, 33-pe la Biblia heʼi umi hekovaíva ivyroha ha ohundiha hína hekove.

¿Mbaʼépa ikatu rejapo oñepresentáramo ndéve peteĩ tentasión peichagua? La Biblia heʼi: “Kóva ningo Ñandejára rembipota: penemarangatu ha pemboyke vaʼerã tekovai. Káda uno ojejokokuaa vaʼerã oiko hag̃ua tekopotĩme ha tekomarangatúpe” (1 Tesalonicenses 4:3, 4). Upéicharõ, ¿mbaʼépa ikatu rejapo ani hag̃ua reʼa umi mbaʼe vaípe? Ikatu rejapo mbohapy mbaʼe:

1: Eñatende mbaʼépa rehecháta

Rehecháramo umi taʼanga tieʼỹ, katuete nemoakãrakúta. Jesús heʼi vaʼekue voi umi mbaʼe jahecháva ikatuha ñandegueraha hapykuéri. Haʼe heʼi: “Entéro osegíva omaña peteĩ kuñáre ha iñakãraku hese, upéva oikóma hendive ipyʼapýpe ha péicha oporomoakãratĩma hína. Upévare, peteĩ nde resa nemoñepysangáramo, eipeʼa ha emombo” (Mateo 5:28, 29). ¿Mbaʼépa ñanemboʼese Jesús ko téxto rupive? Ohechauka porã ñamboyke hag̃ua pe tekokyʼa tekotevẽha ñandedesidído ha nañamañái mbaʼeveichagua taʼanga ñanemoakãrakútavare.

Upeichahágui rehecháramo umi taʼanga nemoakãrakútava, remaña vaʼerã ótro ládo

Ñamoĩmína peteĩ ehémplo. Ñamoĩ chupe rehoha hína peteĩ tape iñypytũvare ha upeichahágui oĩ ohesapéva nde rovaitére peteĩ lintérna. ¿Mbaʼépa rejapóta?  ¿Repytátapa remaña upe lintérna rendýre? Nahániri ajépa. Katuete rejeréta remaña ótro ládo térã remoʼãta nde resa ani hag̃ua nenkandila. Upéicha avei rejapo vaʼerã rehecháramo rehechaseʼỹhágui peteĩ taʼanga tieʼỹ, tahaʼe télepe, rrevístape térã kállere. Ensegída remaña vaʼerã ótro ládo térã eipeʼa umi mbaʼe nde resa renondégui. ¡Aníkena remoinge ne akãme umi mbaʼe tieʼỹ! Juan, peteĩ kuimbaʼe ojepokuaámi vaʼekue ohecha pornografía, heʼi: “Ahechávo peteĩ kuñataĩ porã, amañase voi hese dos térã tres vése, péro añehaʼã ajejoko, amaña ótro ládo ha haʼe chejupe: ‘¡Eñemboʼe Jehovápe! ¡Koʼag̃aite voi eñemboʼe!’. Ha añemboʼepávo, ojehasavéma chehegui” (Mateo 6:9, 13; 1 Corintios 10:13).

Epensamínte avei heʼi vaʼekuére Ñandejára rembiguái Job: “Che añemoĩ peteĩ ñeʼẽme che resakuéra ndive, ani hag̃ua amaʼẽ kuñataĩ rehe aiko hag̃ua hendive” (Job 31:1, ÑÑB). Eñehaʼãkena nde avei ejapo upéicha.

Peteĩ konsého: Upeichahágui rehecháramo peteĩ taʼanga tieʼỹ, ensegída remaña vaʼerã ótro ládo. Ejapo pe salmísta ojapo haguéicha, haʼe ojerure vaʼekue Ñandejárape: ‘Ani reheja che resa omaña umi mbaʼe ndovaléivare’ (Salmo 119:37).

2: Eñatende mbaʼérehepa repensa hína

Enterove ningo ñaneimperfékto ha upéicha rupi sapyʼánte ñañehaʼã vaʼerã ani hag̃ua ñapensa térã jajapose umi mbaʼe noĩporãiva. La Biblia heʼi: “Káda uno ñañemoñuhã, jahejávo umi mbaʼe jajaposéva ñandestira ha ñanembotavy. Umi mbaʼe jajaposéva oñembohapóramo ñande pyʼapýpe, upéva omoheñói pekádo” (Santiago 1:14, 15). ¿Mbaʼépa ikatu jajapo ani hag̃ua jaʼa upe ñuhãme ha ñañehundi?

Repensáramo sapyʼánte umi mbaʼe tieʼỹre, upepete reñemboʼe vaʼerã

Sapyʼánte oúramo ndéve ne akãme umi mbaʼe noĩporãiva, nemanduʼa vaʼerã nde ikatuha redesidi mbaʼépa rejapóta, resegítapa repensa hese térãpa remboykéta. Eñehaʼãkena emboyke umi pensamiénto kyʼa. Ani voi rembojere ne akãme umi mbaʼe tieʼỹ. Tomás, peteĩ kuimbaʼe ojepokuaámi vaʼekue ohecha pornografía Internétpe, heʼi: “Añehaʼã apensa umi mbaʼe iporãvare, aipeʼa hag̃ua che akãgui umi mbaʼe kyʼa ahecha vaʼekue. Ijetuʼu chéve, ha heta vése haʼa jey vaʼekue upe vísiope, péro upéi chepuʼakáma hese. Koʼág̃a añatendevéma mbaʼérehepa apensáta”. Elsa heta oñehaʼã vaʼekue imitãkuñáme ani hag̃ua  hoʼa tekokyʼápe, ha koʼág̃a omombeʼu mbaʼépa oipytyvõ chupe: “Añehaʼã siémpre areko ajapo vaʼerã ha añemboʼe meme Jehovápe. Upéva chepytyvõ ani hag̃ua apensa umi mbaʼe ikyʼa térã itieʼỹvare”.

Peteĩ konsého: Pyaʼe reñemboʼe vaʼerã repensase jave umi mbaʼe tieʼỹre. Eñehaʼã epensa “opa mbaʼe añetévare, iñimportánteva, hekopeguáva, ipotĩva, ñanemomýiva japorohayhu hag̃ua, herakuã porãva, opa mbaʼe iporãvare ha opa mbaʼe ikatúvare ojeguerohory” (Filipenses 4:8).

3: Eñatende moõpa repyrũ hína

Ñapensaitereíramo peteĩ mbaʼe noĩporãivare, ha ñandegustáramo voi katu, oñepresentávo peteĩ oportunida katuete jaikéta provlémape (Proverbios 7:6-23). ¿Mbaʼépa ikatu rejapo ani hag̃ua reʼa umi mbaʼépe?

“Aiporu che komputadóra oĩ jave ótra persónante”

La Biblia omeʼẽ ko konsého: “Oikokuaáva ohecha yvykua ha ojere chugui, heko tarováva katu ohónte ha hoʼa pype” (Proverbios 22:3). Upévare reñatende vaʼerã moõpa repyrũ hína. Rehechakuaáramo peteĩ mbaʼe ikatuha ndegueraha vai, rejere vaʼerã chugui (Proverbios 7:25). Felipe yma ojepokuaa vaʼekue ohecha pornografía, péro upéi oheja upe vísio vaiete. Haʼe heʼi: “Amoĩ che komputadóra peteĩ lugár enterove ikatutahápe ohecha aiporu jave. Avei amoĩ chupe peteĩ prográma ovlokeáva umi taʼanga térã ñeʼẽ tieʼỹ, ha aiporu che komputadóra oĩ jave ótra persónante”. Tomás, ñañeʼẽma hague ko artíkulope, heʼi: “Ndahechái umi pelíkula ikatu vaʼerãichagua chemoakãraku ha ndajeheʼái umi hénte iñeʼẽ tieʼỹvare. Ndaʼasevéima upe ñuhãme”.

Peteĩ konsého: Rehecha vaʼerã mbaʼépepa nekangy ha epensáma voi mbaʼépa rejapóta oñepresentáramo ndéve peteĩ tentasión (Mateo 6:13).

¡ANI REÑENTREGA!

¿Mbaʼépa ikatu rejapo reʼa jeýramo peteĩ tentasiónpe? Reñehaʼã meme vaʼerã ha ani reñentrega. La Biblia heʼi: ‘Pe hekopotĩva hoʼáramo jepe siete vése, katuete opuʼã jeýta’ (Proverbios 24:16, ÑÑB). Upeichaite, nde Ru yvagapegua nepytyvõta repuʼã jey hag̃ua, péro upearã reheja vaʼerã chupe tanepytyvõ. Eñehaʼãkena emombarete nde jerovia restudia memévo la Biblia ha eñemboʼe Ñandejárape nde pyʼaite guive. Upearã tuichaiterei nepytyvõta umi rreunión ojejapóva kongregasiónpe. Avei Ñandejára opromete enterovépe: ‘Che romokyreʼỹ ha katuete roipytyvõta’ (Isaías 41:10).

Carlos, ñañeʼẽma hague iñepyrũme, heʼi: “Ijetuʼu vaʼekue chéve ahejaite hag̃ua pe pornografía. Heta vése haʼa jey ko mbaʼépe, péro Jehová chepytyvõ rupi ahejaite”. Dylan, ñanemanduʼa hague avei iñepyrũme, heʼi: “Ikatu kuri aha pe otélpe che kompañéra de traváhondi rojedivertimi hag̃ua sapyʼaite, péro ajedesidi ha haʼe chupe ndahamoʼãiha. Igustoiterei ningo ñane konsiénsia ipotĩramo, ha iñimportanteveha katu, aikuaa Jehová ovyʼaha chereheve”.

Jehová ovyʼaitereíta avei nendive reñehaʼãmbaitéramo nderekopotĩ ha regueropuʼaka umi tentasión oñepresentáva ndéve (Proverbios 27:11).

^ párr. 2 Oñekambia herakuéra.