Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Abril de 2014

 LA BIBLIA OKAMBIA CHUPEKUÉRA

Aporandúva guive, ombohovái chéve hikuái la Biblia rupive

Aporandúva guive, ombohovái chéve hikuái la Biblia rupive
  • ONASE: 1950-PE

  • HETÃ: ESPAÑA

  • AMBUE INFORMASIÓN: MÓNHA VAʼEKUE

CHE REMBIASAKUE:

Che tuvakuéra oreko vaʼekue peteĩ gránha, noroéste gotyo Espáñape, peteĩ puévlo héravape Galicia ha upépe che anase vaʼekue. Roime 8 ermáno ha che haʼe pe cuatroha. Chemanduʼa vyʼápe roikómi hague oñondivepa ógape. Upe tiémpope, enterove lénto umi hénte omondo peteĩ ifamília semináriope térã konvéntope. Ógagui katu ore mbohapy voi roho vaʼekue.

Arekórõ guare 13 áño, aha peteĩ konvéntope Madrídpe, upépe oĩma voi mokõi che ermána. Ensegída ahechakuaa upépe avave noñeʼẽguasuiha ojupe ha ndojeheʼaiha voi ojuehe. Ndaipóri orekóva peteĩ iñamíga, síno ílore roiko ha roñemboʼe tódo el día. Pyharevete roñembyatypámi pe kapíllape rojepyʼamongeta hag̃ua, péro che oimeraẽ mbaʼére apensa upéicha jave. Upéi ropurahéi músika rrelihiósa ha roho misahápe, opa koʼã mbaʼe ojejapo latínpe ha nantendéi mbaʼevete, upéicha rupi haʼete chéve káda día añemomombyryvéva Ñandejáragui. Akirirĩháre aiko tódo el día, ha ajotopa jave che ermánandi katu ndaikatúi ni roñeʼẽ, rojoasakuévonte roʼe ojupe: “Áve María purísima”. Rokarupa rire añoite oñemeʼẽ oréve média óra roñemongeta hag̃ua. ¡Tuichaiterei ningo okambia ore situasión! Yma vyʼápe roñemongetámi ógape opa mbaʼére ha koʼág̃a katu ni noroñeʼẽi ojupe, upéicha rupi añeñandu cheaño ha tódo el día cherasẽ.

Aime aja upépe, nañandúi vaʼekue añemoag̃uiveha Ñandejárare, upéicharõ jepe, arekórõ guare 17 áño oiko chehegui mónha, aikuaágui upéva oñehaʼarõha chehegui. Péro upe riremínte ahechakuaa che nanaséi hague upearã. Umi mónha heʼími oréve rokaitaha infiérnope rodudáramo, péro nachekonvenséi upéva. Che aikuaa Jesucristo ndoikói hague haʼeño rei, síno oiporupaite itiémpo omboʼe ha oipytyvõ hag̃ua umi héntepe (Mateo 4:23-25). Arekórõ guare 20 áño katu naimeseveietéma voi upépe, ha ni ndagueroviaséi pe mádre superióra heʼírõ guare chéve la asegítaramo aduda, ahántema hag̃ua upégui. Ha upéicha asẽ pe konvéntogui. Chéverõ g̃uarã chemondo hikuái upégui ani hag̃ua agueraha vaipa umi ótrape.

Aha jeývo ógape, che tuvakuéra cherresivi porãnte ha chentende hikuái. Péro upe puévlo roikohápe ndaiporiguasúi traváho,  upémarõ aha Alemániape oikohápe peteĩ che ermáno. Haʼe oĩ upépe peteĩ grúpo komunístape, oformáva umi españól oñemosẽ vaʼekue hetãgui. Che aike avei igrupopekuéra ha vyʼápe ambaʼapo hendivekuéra ojetrata hag̃ua peteĩchapa enterovépe ha oñemeʼẽ hag̃ua iderécho kuñanguérape. Tiémpo rire, amenda peteĩ kuimbaʼe komunístare. Arreparti vaʼekue umi propagánda komunísta ha amoirũ chupekuéra ojapo jave manifestasión. Che añeñandu porã vaʼekue apenságui upéicha ajapoha hína peteĩ mbaʼe iporãva.

Péro upéi añedesanima ahechávo umi komunísta ndojapoiha haʼekuéra voi ojeruréva ótrope. Chemanduʼa áño 1971-pe heta mitãrusu ore grupopegua oho hague ohapy pe konsuládo españól oĩva Fráncfortpe, ha upépe koʼýte aduda hesekuéra. Ojapo hikuái upéicha ohechauka hag̃ua ndogustaiha chupekuéra umi inhustísia ojejapóva Espáñape, péro chéve g̃uarã noĩporãi umi mbaʼe.

Onasérõ guare che memby ypykue, haʼe che ménape ndahaveseimaha umi rreunión ojapóvape hikuái. Upe rire umi che amigokuéra ndachevisitavéima chéve ni che membýpe, ha añeñandu cheaño peteĩ. Aimérõ guare upe situasiónpe, che añeporandu maʼerãpa jaikove ha ikatúnepa algún día jaiko porãve.

LA BIBLIA CHEPYTYVÕ AKAMBIA HAG̃UA:

Áño 1976-pe, peteĩ testígo de Jehová ha hembireko og̃uahẽ ógape, haʼekuéra Españagua ha oheja chéve umi puvlikasión vívlika alee hag̃ua. Upéi, peteĩ día ou jeývape chevisita, aporandu chupekuéra mbaʼérepa ndojetratái peteĩchapa enterovépe, mbaʼérepa ojesufri ha ojejapo heta inhustísia. Ni ndagueroviaséi ahechávo mbaʼéichapa aporandúva guive, ombohovái chéve hikuái la Biblia rupive. Ha upepete aasepta astudia la Biblia hendivekuéra.

Ñepyrũrã astudia aaprende hag̃uánte la Biblia omboʼéva, péro tuicha akambia roho rire che ména ndive testígo de Jehová rreunionhápe Salón del Réinope. Upérõ mokõima ore família, ha umi Testígo oúmi orereka roho hag̃ua hendivekuéra rreunionhápe ha orepytyvõ hikuái oñangarekóvo umi mitãre pe rreunión aja. Amo ipahápe añeñandu porãiterei hendivekuéra.

Upéicharõ jepe, ndahaʼéi gueteri la ajedesidipáva. Peteĩ jey, aha avisita che hentekuérape Espáñape ha peteĩ che tio oservíva saserdóteramo heʼi chéve noĩporãiha astudia la Biblia umi hénte ndive. Péro umi Testígo upe puevlopegua heta chepytyvõ. Opa mbaʼe aikuaasevéva, haʼekuéra ombohovái avei chéve la Biblia rupive, ojapo haguéicha umi Testígo Alemaniagua. Upévare adesidi astudia jeytaha la Biblia aha rire Alemániape, ha che ména ndostudiasevéiramo jepe, che asegi. Ha áño 1978-pe ajevautisa ha oikóma chehegui testígo de Jehová.

UMI MBAʼE PORÃ AHUPYTÝVA:

Antende rire la Biblia omboʼéva, aikuaa sapyʼa maʼerãpa jaikove. Ha umi mbaʼe aaprendéva chepytyvõ aiko porãve hag̃ua koʼág̃ama voi. Por ehémplo, 1 Pedro 3:1-4-pe heʼi tembirekokuéra orrespeta vaʼerãha iménape, oñemoĩ vaʼerãha ipoguýpe ha iñakãguapy vaʼerãha. Ha heʼi avei umíva ovaletereiha Ñandejára renondépe. Kóva ha heta ótro téxto tuichaiterei chepytyvõ atrata porã hag̃ua che ménape ha añangareko porã hag̃ua che famíliare.

Ojapóma 35 áño ajevautisa ha añemeʼẽ hague Jehovápe. Avyʼaiterei ningo aservi haguére Ñandejárape, aime haguére umi ermáno cherayhuetéva apytépe ha umi cinco che família apytégui, cuatro chemoirũ haguére aservi hag̃ua Jehovápe.