Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Marzo de 2014

 KO RREVÍSTAPE OÑEHESAʼỸIJO

¿Mbaʼépa ojapo Ñandejára nderehehápe?

¿Mbaʼépa ojapo Ñandejára nderehehápe?

“Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva.” (Juan 3:16)

Kóva ko téxto enterove lénto oikuaa ha oiporu. Ojeʼe voi ndaiporiha ótro téxto “ohechauka porãvéva mbaʼéichapa Ñandejára ñanderayhu ha mbaʼépa jajapo vaʼerã jajesalva hag̃ua”. Heta tetãrupi ko téxto ojeskrivi pare rehe, ojejapo chugui afíche ha oñemboja áutore, térã ojehai kartulínare ha ojegueraha ojehechauka hag̃ua partidohápe.

Umi ojapóva koʼã mbaʼe, oikuaa Ñandejára ohayhuha chupekuéra ha ikatuha omeʼẽ chupekuéra jeikove opaveʼỹva. Ha nde, ¿rehechakuaápa Ñandejára nderayhuha?

‘ÑANDEJÁRA OHAYHUETEREI PE MÚNDO’

Heta oĩ ogueroviáva Ñandejára ojapo hague ko univérso, opa mbaʼe oĩva pype ha yvyporakuérape avei. Enterovénte ningo jahechakuaa mbaʼéichapa ojejapo porã ha ndaijojahái opa mbaʼe oikovéva oĩva ko univérsope, ha upévare jaʼekuaa oĩmante vaʼerãha peteĩ iñaranduetereíva ojapo vaʼekue opaite mbaʼe. Upéicha rupi heta oĩ káda día oagradeséva Ñandejárape hekovére, ha ohechakuaa oikotevẽha hese osegi hag̃ua oikove. Haʼe ningo omeʼẽ ñandéve opaite mbaʼe ñaikotevẽva: y, hiʼupy, áire jarrespira hag̃ua ha hetave mbaʼe.

Iporãite vaʼerã enterove jaagradeséramo Ñandejárape koʼã mbaʼére. Haʼe ningo ñande Apohare ha haʼe rupi jaikove (Salmo 104:10-28; 145:15, 16; Hechos 4:24). Upéicha Haʼe ohechauka ñandéve ñanderayhuha. Apóstol  Pablo heʼi vaʼekue voi: “[Ñandejára] rupínte opavave oikove, orrespira ha oreko opa mbaʼe. Haʼe rupi ningo jaikove, jakuʼe ha jaiko” (Hechos 17:25, 28).

Péro haʼe ndahaʼéi oñangarekónteva ñanderehe jaikove hag̃ua. Síno ñanderayhúgui avei ñandeapo diferénte umi animálgui, ñande ikatu jahechakuaa ñaikotevẽha hese ha ñamombaʼeguasu chupe (Mateo 5:3). Upéicha rupi ñande ikatu ñaime ifamília apytépe; ñaneñeʼẽrendúma guive, ikatu jaiko itaʼýraramo (Romanos 8:19-21).

Heʼiháicha Juan 3:16, Ñandejára ohechauka ñanderayhuetereiha omboúvo Itaʼýra Jesúspe ko yvy ape ári. Haʼe ou vaʼekue oipytyvõ yvyporakuérape oikuaa hag̃ua Ñandejárape ha avei omano hag̃ua ñanderehehápe. Péro heta oĩ nontendéiva mbaʼérepa Jesús tekotevẽ vaʼekue omano ha mbaʼéichapa haʼe omano haguére ojeʼe Ñandejára ohechaukaha ñandéve imborayhu. Jahechamína mbaʼépa heʼi la Biblia.

“OMEʼẼ ITAʼÝRA PETEĨETE”

Ñande yvypóra ningo ñanderasy, ñandetuja ha upéi ñamano, péro Ñandejára nañandeapói vaʼekue jaiko hag̃ua upéicha. Haʼe ojapo vaʼekue Adán ha Évape oiko hag̃ua opa árare peteĩ lugár neporãvape. Péro heʼi avei chupekuéra iñeʼẽrendu vaʼerãha, ha ndojapóiramo upéicha omanotaha (Génesis 2:17). Oikuaáramo jepe upéva, Adán opuʼã Ñandejárare ha upévare haʼe ha ifamiliare omano. Apóstol Pablo heʼi: “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi” (Romanos 5:12).

Péro Ñandejára hekojoja ha ohayhu pe hustísia (Salmo 37:28). Upéicha rupi Haʼe ndohejareíri chupekuéra upe ojapo vaʼekue, péro ndahaʼéi avei upévare ñanekondenáva enterovetépe jaiko hag̃ua jasufri ha upéi ñamano opa ára g̃uarã. Upéva rangue, haʼe hekojoja rupi okumpli pe léi heʼíva: “vida por vida”, ha upévare ñaneñeʼẽrendúramo jareko jey esperánsa jaikóvo opa árare (Éxodo 21:23, nóta NM). Péro, ¿mbaʼéichapa ikatu ojerrekupera jey Adán operde vaʼekue? Peteĩ kuimbaʼe perféktomante omeʼẽ vaʼerã hekove perfékto ojerrekupera jey hag̃ua upéva.

Jesús omeʼẽ hekove ñanderehehápe, ñandepeʼa hag̃ua pekádo ha ñemano poguýgui

Ni peteĩ kuimbaʼe oúva Adán familiarégui ndaikatúi ojapo upéva, péro Jesús si ikatu (Salmo 49:6-9). Haʼe onase vaʼekue perfékto ha Adán upéicha vaʼekue avei opeka mboyve. Upéicharõ, Jesús omeʼẽvo hekove ñanderehehápe, ñandepeʼa pekádo ha ñemano poguýgui, ha omeʼẽ jey ñandéve peteĩ oportunida jaiko hag̃ua Adán ha Eva oiko haguéicha iñepyrũme (Romanos 3:23, 24; 6:23). ¿Mbaʼépa ñande ikatu jajapo jahupyty hag̃ua koʼã mbaʼe porãita Ñandejára omeʼẽtava ñandéve ñanderayhúgui?

 “OPAITE UMI HESE OJEROVIÁVA”

Juan 3:16 heʼive: “Ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva”. Upéicharõ, jaikoséramo opa ára g̃uarã, tekotevẽ jajerovia Jesús rehe ha ñaneñeʼẽrendu chupe.

Péro ikatu oĩ heʼíva: “Upe téxto ningo heʼi ‘jajerovia vaʼerãha Jesús rehe’ jaiko hag̃ua opa árare, ndeʼíri ñaneñeʼẽrendu vaʼerãha chupe”. Ha añete upéva, péro tekotevẽ jajapove ótra kósa. Jahechauka hag̃ua jajeroviaha Jesús rehe, ndahaʼéi jaʼénte vaʼerã haʼe ñande Salvadorha ha opáma upépe. Tekotevẽ avei ñañehaʼã ñakumpli umi mbaʼe haʼe omboʼe vaʼekue, upéicharõmante Ñandejára ñandeguerohorýta. Ndajajapóiramo upéva, jaʼe reietéta jajeroviaha hese. La Biblia heʼi voi: “Ñande jerovia omano hína ndajajapóiramo tembiapo iporãva” (Santiago 2:26). Upéicharõ, jajeroviáramo Jesús rehe, jaiko vaʼerã haʼe heʼiháicha, ndahaʼéi jaʼénteva jajeroviaha hese.

Pablo heʼi vaʼekue: ‘Cristo mborayhu ñandeovliga jajapo hag̃ua ko mbaʼe. Ñande ningo jahechakuaa enterove umi kuimbaʼe omanóma hague, upévare oñekotevẽ kuri peteĩ kuimbaʼe omano enterove rehehápe. [...] Ikatu hag̃uáicha umi oikovéva ndojapovéima haʼekuéra oipotávante, ojapo hag̃ua guei Cristo oipotáva’ (2 Corintios 5:14, 15). Añetehápe, jaagradeséramo Jesús omano hague ñande rehehápe, ñañehaʼãta ñakambia jaiko hag̃ua haʼe oipotaháicha. Nañapensamoʼãvéima ñandejehénte, síno ñamotenondétama Cristo rembipota. Ha upéva ojekuaa vaʼerã jaiko lájare, umi mbaʼe jadesidívare ha jajapóvare. ¿Mbaʼépa jahupytýta jahechaukáramo jajeroviaha Jesús rehe?

“ANI HAG̃UA OÑEHUNDI [...], OHUPYTY HAG̃UA GUEI JEIKOVE OPAVEʼỸVA”

Juan 3:16 opakuetévo omombeʼu mbaʼépa Ñandejára opromete: opavave umi ohechaukáva ojeroviaha Jesús sakrifísiore ha ojapóva haʼe heʼíva, nomanomoʼãi, síno ohupytýta pe jeikove opaveʼỹva. Ñandejára oipota umi iñeʼẽrendúva oikove opa árare, péro ndahaʼéi ko yvy ape ári añónte.

Oĩta peteĩ grúpo ohóva yvágape ha oikótava upépe opa árare. ¿Mbaʼérepa jaʼe upéva? Jesús voi heʼi vaʼekue idisipulokuérape ohotaha oprepara chupekuéra hendag̃ua yvágape ogoverna hag̃ua hikuái hendive (Juan 14:2, 3; Filipenses 3:20, 21). Umi oikove jeýva oho hag̃ua yvágape, “oikóta chuguikuéra Ñandejára ha Cristo saserdóte, ha ogovernáta hendive mil áñore” (Apocalipsis 20:6).

Péro ndahetái umi ohótava yvágape ogoverna hag̃ua Cristo ndive. Jesús hei vaʼekue: “Ani pekyhyje, peẽ che ovechakuéra mbovymi, pende Ru odesidíma omeʼẽtaha peẽme pe Rréino” (Lucas 12:32). ¿Mboýpa oĩ umi ohótava yvágape? Apocalipsis 14:1, 4 heʼi: “Ha ¡péina!, ahecha pe Ovecharaʼy oñemboʼyha pe Sérro Sión ári, ha hendive ciento cuarenta y cuatro mil orekóva isyváre héra ha avei Itúva réra. [...] Chupekuéra ojejogua vaʼekue yvyporakuéra apytégui, ha haʼekuéra hína pe kosécha tenondegua Ñandejára ha pe Ovecharaʼýpe g̃uarã”. Umi ohótava yvágape ningo 144.000 tapichánte, ha ñambojojátaramo umi millones tapicha oikóvare ko yvy ape ári, mbovymínte hikuái. Ha heʼiháicha la Biblia, umi “ovechakuéra mbovymi” ogovernáta Jesús ndive. Péro, ¿mávapepa ogovernáta hikuái?

Jesús omombeʼu oĩha avei ótro grúpo ohupytýtava heta mbaʼe porã igoviérno rupive. Haʼe heʼi: “Areko ambue ovechakuéra, oĩva ótro korápe, umívape avei aguerúta ha ohendúta che ñeʼẽ, péicha oikóta chuguikuéra peteĩ ovecha aty ha peteĩ ovecharerekua” (Juan 10:16). Koʼã “ovechakuéra”, térã tapicha ipyʼaporãva, ikatúta oikove opa árare ko yvy ape ári, Adán ha Eva  oikomoʼã haguéicha. ¿Mbaʼérepa jaʼekuaa Ñandejára omeʼẽ jeytaha ñandéve upéva?

La Biblia voi heta vése heʼi ko yvýgui oikotaha peteĩ hardín neporãva. Ikatu rehecha nde Bibliaitépe voi koʼã téxto ohechaukáva upéva: Salmo 37:9-11; 46:8, 9; 72:7, 8, 16; Isaías 35:5, 6; 65:21-23; Mateo 5:5; Juan 5:28, 29 ha Apocalipsis 21:4. Koʼã téxto ohechauka koʼẽrõitéma opataha umi gérra, ñembyahýi, mbaʼasy ha ñemano. Omombeʼu avei umi tapicha ivuénova omopuʼãtaha hogarã, omonoʼõta hemitỹngue ha omongakuaáta ifamília peteĩ múndo oĩháme pyʼaguapy. * ¿Reikosépa peteĩ lugár upeichaguápe? Ikatu jajerovia koʼã promésa katuete oñekumplitaha.

HETA MBAʼÉMA ÑANDEJÁRA OJAPO NDEREHEHÁPE

Relee rire ko artíkulo, ¿rehechakuaápa mbaʼeichaitépa Ñandejára ñanderayhu káda únope? Haʼe rupínte ningo jaikove, ñanearandu, ñaneresãi ha jareko opa mbaʼe ñaikotevẽva jasegi hag̃ua jaikove. Péro pe iñimportantevéva, haʼe ombou itaýra omano ñanderehehápe, ikatu hag̃uáicha jahupyty heta mbaʼe porã, jahecha haguéicha Juan 3:16-pe.

Mbaʼeichaitéiko javyʼáta jaikóvo pyʼaguapýpe opa árare peteĩ múndo ndaiporiveimahápe mbaʼasy, gérra, ñembyahýi ha ñemano. Ñanderehéntema odepende jahupyty hag̃ua umi mbaʼe porãite. Péro iporã jajepyʼamongetami ko porandu rehe: ¿Mbaʼépa che ajapo hína Ñandejára rehehápe?

^ párr. 24 Reikuaasevéramo umi mbaʼe porã Ñandejára oprometéva, ikatu rehecha kapítulo 3-pe, lívro Mbaʼépa añetehápe omboʼe la Biblia?, ojapóva testígo de Jehová.