Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Febrero de 2014

 KO RREVÍSTAPE OÑEHESAʼỸIJO | PETEĨ GÉRRA OMBYAÍVA KO MÚNDO

¿Máva kúlparepa añetehápe oiko pe gérra ha ojesufri?

¿Máva kúlparepa añetehápe oiko pe gérra ha ojesufri?

Pe primera gérra mundiál opa kuri 11 de noviembre de 1918. Upérõ umi hénte ovyʼaiterei, ombotypa inegosiokuéra ha osẽ ojeroky pe kállere. Péro upe riremínte opa jeýma la vyʼa. Oiko peteĩ mbaʼe ojukáva hetave héntepe pe gérragui.

Junio de 1918-pe, umi soldádo oĩ aja gueteri Fránciape, oñepyrũ ojagarra umi héntepe peteĩ mbaʼasy imbaretetereíva, oñehenóiva grípe españóla, ha ojuka hetaitereípe. Sapyʼaitérõ g̃uarã omanomba lénto umi soldádo estadounidénse, ni gerrahápe noñemanói vaʼekue peichaite peve. Umi soldádo hembýva oho jeývo hógape, ogueraha ko mbaʼasy vaiete ha oguerovapa umi héntere, ha upéicha upe mbaʼasy isarambi ko yvy tuichakuére.

Pe gérra rire avei, Európape hetaiterei oĩ omanóva ñembyahýigui ha hetaitereive oĩ imboriahúva. Áño 1923-pe, pe pláta oiporúva umi alemán ndovalevéi, ha seis áño haguépe oparupietéma saʼi la pláta. Amo ipahápe, áño 1939-pe oñepyrũ pe segunda gérra mundiál, ha jaʼe porãsérõ g̃uarã, ndopái voi kuri pe provléma omoñepyrũ vaʼekue pe primera gérra. ¿Mbaʼéicha rupípa oiko koʼã mbaʼe ojoapykueripa?

ÑAIMÉMA UMI ÁRA PAHÁPE

Ñantende hag̃ua mbaʼérepa hetaite mbaʼe vaíma oiko ko múndope, koʼýte pe primera gérra mundiál aja, iporã jaikuaa mbaʼépa heʼi umi profesía oĩva la Bíbliape. Jesucristo heʼi vaʼekue voi, peteĩ tiémpope umi tetã opuʼãtaha ojuehe ha avei ápe ha pépe oĩtaha mbaʼasy ha ñembyahýi (Mateo 24:3, 7; Lucas 21:10, 11). Avei heʼi idisipulokuérape koʼã mbaʼe vai oikóva ohechaukataha oñeĩmaha umi ára pahápe. Apocalipsis, pe último lívro oĩva la Bíbliape, omombeʼu oiko hague peteĩ gérra  yvágape ha mbaʼéicha rupípa upe guive oiko hetave mbaʼe vai ko yvy ape ári, ombohasa asýva yvyporakuérape. (Ehecha pe rrekuádro heʼihápe  “Gérra ko yvy ape ári ha yvágape”.)

Apocalípsispe oñeñeʼẽ cuatro kavaju ariguáre. Umívagui, mbohapy orrepresenta umi mbaʼe Jesús heʼi vaʼekue oikotaha: gérra, ñembyahýi ha mbaʼasy. (Ehecha pe rrekuádro heʼihápe  “Umi cuatro kavaju arigua oñeñeʼẽha Apocalípsispe”.) Pe primera gérra mundiál guive oñepyrũ oiko heta mbaʼe ombosufríva yvyporakuérape, ha koʼág̃a peve osegi upéva. La Biblia ohechauka porã ñandéve Satanás káusare oikoha koʼã mbaʼe (1 Juan 5:19). ¿Oĩnepa peteĩ ikatu vaʼerã ojoko chupe ha oipeʼapa umi mbaʼe ñanembosufríva?

La Biblia heʼi porã Satanásgui “mbykypaitemaha itiémpo” (Apocalipsis 12:12). Upévare haʼe orrenegaiterei ha oñehaʼã voi jasufrive hag̃ua. Umi mbaʼe vai oikóva og̃uahẽmbotaitéma huʼãme, ojeʼéva voi ningo “amáske ivai iporã ag̃ui”.

OÑEHUNDÍTA SATANÁS REMBIAPOKUE

Jahechaháicha, pe primera gérra mundiál guive oikóma hetaiterei mbaʼe vai: oñepyrũma oiko  hetave gérra, oñepuʼã umi goviérnore ha umi hénte ndojeroviavéi umi polítikore. Koʼã mbaʼe oikóva ohechauka porã añetehápe oñembou hague Satanáspe ko yvy ape ári (Apocalipsis 12:9). Satanás ojogua peteĩ diktadór ipyʼahatãvape ha ojahéiva umi héntere, oikuaágui mbykypaitemaha itiémpo. Og̃uahẽ vove pe ára ojepeʼa hag̃ua Satanáspe ipuéstogui, opáta umi mbaʼe vaieta oiko vaʼekue pe primera gérra mundiál guive.

Umi profesía oĩva la Bíbliape ohechauka porã ñandéve koʼẽrõitéma Jesucristo, pe Rréi oisãmbyhýva Ñandejára Rréinope, outaha “ohundi hag̃ua pe Aña rembiapokue” (1 Juan 3:8). Koʼag̃aite peve hetaiterei oĩ oñemboʼéva oúma hag̃ua upe Rréino. ¿Ndépa rejapo avei upéva? Upe goviérno rupive, umi hénte ivuénova ohecháta mbaʼéichapa ojejapo Ñandejára rembipota ko yvy ape ári, ha ndahaʼemoʼãvéima Satanás rembipota (Mateo 6:9, 10). Ñandejára Rréinope ndoikomoʼãvéima gérra mundiál, ni mbaʼeveichagua ñorairõ (Salmo 46:9). Eñehaʼãna eaprendeve Ñandejáragui ha péicha ikatúta rehecha avei ojeiko vove pyʼaguapýpe ko yvy ape ári (Isaías 9:6, 7).