Umi doktór heʼi ndahaʼeiha ñaneresãi haguérente javyʼátamava, síno heʼi ñaikotevẽha avei ambue mbaʼe. Upévare heta oĩ ohóva ovisita umi lugár iporãva, oipytyvõ oñeñangareko hag̃ua ko yvýre, oaprende músika térã opintakuaa hag̃ua, jahecha péichapa ndovyʼái. Péro amo ipahápe sapyʼaiténte ombovyʼa chupekuéra koʼã mbaʼe. ¿Mbaʼépa upéicharõ ohechakuaa vaʼerã yvyporakuéra ovyʼa añete hag̃ua?

Ñandejára oipota jaiko vyʼápe koʼág̃ama voi ha opa árare

Umi oleéva la Biblia ohechakuaa enterove ñaikotevẽha Ñandejárare ha upéva ñagueronaseha voi. Pe lívro de Génesis oñepyrũmírente omombeʼu Ñandejára ojapo hague Adán ha Évape, pyʼỹinte oñeʼẽ hague hendivekuéra ha oheja hague chupekuéra oiko iñamígoramo (Génesis 3:8-10). Ñandejára ndojapói vaʼekue voi yvypórape oiko hag̃ua heseʼỹ, upéicha rupi enterovénte ñaikotevẽ ñande Apohare rehe. La Bíbliape heta vése voi ojehechauka upeichaha.

Por ehémplo, Jesús heʼi vaʼekue: “Ovyʼa umi ohechakuaáva oikotevẽha Ñandejárare” (Mateo 5:3, NM). Upéicharõ, javyʼa añete hag̃ua tekotevẽ jaikuaa Ñandejárape ha ñañemoag̃ui hese. ¿Mbaʼéichapa ikatu jajapo upéva? Jesús heʼi: “Yvypóra noikotevẽi pan rehe añónte oikove hag̃ua, oikotevẽ guei opaite mbaʼe Jehová heʼívare” (Mateo 4:4, NM). Jasegíramo umi konsého Jehová omoĩva la Bíbliape, ikatúta javyʼa ha jaiko porãve. Ñahesaʼỹijomína mbohapy mbaʼe ohechaukáva añeteha upéva.

Ñaikotevẽ peteĩ ñanesãmbyhy porã vaʼerã

Koʼág̃arupi oĩ heta konsehéro matrimoniál térã heʼíva ikatuha oipytyvõ umi famíliape, umi ndovyʼáivape, oiko vaívape, iprovléma hetávape térã umi oikuaasévape mbaʼépa ojapo vaʼerã oho porã hag̃ua chupe hekovépe. Péro, ¿mávapa ikatu omeʼẽ ñandéve pe konsého iporãvéva ha añetehápe ñanepytyvõtava? Jehová añoite ikatu ojapo upéva, haʼe ningo ñande Apohare.

La Biblia haʼete peteĩ manuál ohechaukáva ñandéve mbaʼéichapa jaiko vaʼerã

 Por ehémplo, rejoguáramo peteĩ kámara térã peteĩ komputadóra, katuete ou hendive peteĩ manuál omombeʼúva mbaʼéichapa reiporu vaʼerã oiko porã hag̃ua ndéve. La Biblia avei haʼete peteĩ manuál ñande Apohare Jehová omeʼẽva ñandéve jaiporu porã hag̃ua ñande rekove. Ko “manuál” omombeʼu maʼerãpa Ñandejára ñandeapo ha mbaʼépa jajapo vaʼerã oho porã hag̃ua ñandéve.

Peteĩ manuál ningo siémpre omombeʼu avei mbaʼépa ndovaléi jajapo ani hag̃ua oñembyai ñandehegui térã ñahundiete pe aparáto. Upéicha avei la Biblia omombeʼu porã ñandéve mbaʼépa ikatu ñanembyai térã ñanerundi. Ikatu oĩ ótro omeʼẽva ñandéve konsého ndahasyivéva jajapo hag̃ua, péro katuete iporãvéta jajapóramo ñande Apohare heʼihaichaite ñandéve pe “manuálpe”.

‘Che hína [Jehová] nde Jára, nemboʼéva reiko hag̃ua hekoitépe, rohekomboʼe ha ahechauka hína ndéve nde raperã. Nde rejapysaka porãramo che léi rehe, nde pyʼaguapy okakuaáta ysyry guasúicha, ha nde hustísia ojehupíta umi oláda marpeguáicha.’ (Isaías 48:17, 18)

Ñandejára Ñeʼẽme ikatu jatopa umi konsého ñanepytyvõtava

Jehová omeʼẽ ñandéve konsého ha heʼi mbaʼéichapa iporãve jaiko, péro nañandeovligái jajapo hag̃ua upéva. Haʼe ñanderayhu ha ñanepytyvõsénte, upévare heʼi: ‘Che hína [Jehová] nde Jára, nemboʼéva reiko hag̃ua hekoitépe, rohekomboʼe ha ahechauka hína ndéve nde raperã. Nde rejapysaka porãramo che léi rehe, nde pyʼaguapy okakuaáta ysyry guasúicha, ha nde hustísia ojehupíta umi oláda marpeguáicha’ (Isaías 48:17, 18). Jahechaháicha, jajapóramo Ñandejára heʼíva, katuete jaiko porãvéta. Upévare jaʼekuaa ñaikotevẽha Ñandejárare javyʼa añete hag̃ua.

Ñaikotevẽ ñanepytyvõ vaʼerã ñasolusiona hag̃ua ñane provléma

Oĩ heta hénte heʼíva noikotevẽiha Ñandejárare térã ndojeroviái voi hese, pórke opensa Ñandejára añetehápe ñanderayhúramo, ndohejamoʼãiha kuri oiko hetaite mbaʼe vai. Upévare oñeporandu: “¿Mbaʼére piko Ñandejára oheja osufri umi ivuénova? ¿Mbaʼére piko umi mitã inosénte sapyʼánte onase defektuóso? ¿Mbaʼérepa oĩ hetaite inhustísia?”. Enterovépe ningo ñandepyʼapy koʼã mbaʼe, ha tuichaiterei ñanepytyvõta jaikuaáramo mbaʼéicha rupípa oiko. Péro jakulpántema rangue Ñandejárape koʼã mbaʼére, iporãvéta jahecháramo mbaʼépa heʼi Iñeʼẽ, la Biblia.

Génesis kapítulo tréspe heʼi Satanás, peteĩ mbói rupive, ombotavy hague pe paréha ypykuépe hoʼu hag̃ua pe “yva oikuaaukáva iporãva ha ivaíva”. Ñandejára heʼi porã vaʼekue chupekuéra ani hag̃ua hoʼu upéva, ha hoʼúramo omanotaha. Péro Satanás heʼi Évape: ‘Heʼi reíko peẽme, napemanomoʼãi. Ñandejára oikuaa porã peʼúramo upe yva pejehesapeʼataha ha Ñandejáraicha peikuaataha iporãva ha ivaíva’ (Génesis 2:16, 17; 3:4, 5).

Satanás ndahaʼéi heʼínteva Ñandejára ijapuha, síno ontendeka avei nogovernaporãiha. Haʼe heʼi oho porãvetaha yvyporakuérape ohendúramo chupe, Ñandejárape rangue. Péro Jehová nosolusionái kuri upepete upe provléma, síno omeʼẽ tiémpo ikatu hag̃uáicha yvypóra ijeheguiete  ohechakuaa añetépa Satanás heʼi vaʼekue térãpa nahániri. Jehová omeʼẽ oportunida Satanáspe ha entéro omoirũvape chupe, ohechauka hag̃ua añetehápepa yvyporakuéra oiko porãve Ñandejára reheʼỹ.

Mbaʼépa nde ere, ¿añetépa Satanás heʼi vaʼekue? ¿Oho porãvépa yvyporakuérape Ñandejára reheʼỹ ha oikóramo chupekuéra ogustaháichante? Ñapensamína umi mbaʼe oikóvare koʼág̃a: oĩ heta jehasa asy, inhustísia, mbaʼasy, mondaha, omanóva, gérra ha hetave mbaʼe vai. ¿Mbaʼépa ohechauka koʼã mbaʼe? ¿Añetehápepa oho porãve yvypórape Ñandejára reheʼỹ? La Biblia ndeʼiriete Ñandejára káusare oikoha umi mbaʼe vai ko múndope, upéva rangue heʼi porã: ‘Umi mburuvicha oiporu vai ipuʼaka ha operhudika hapichápe’ (Eclesiastés 8:9, ÑÑB).

Péicha jahecha tekotevẽha ñañemoag̃ui Ñandejárare ñantende hag̃ua mbaʼérepa oiko hetaite mbaʼe vai, ha jaikuaa hag̃ua mbaʼéichapa oñesolusionáta umíva.

Ñaikotevẽ Ñandejára ñanepytyvõ

Heta tiémporema yvyporakuéra ojapo opa ikatúva anive hag̃ua hasy, ig̃uaig̃ui térã ituja ha omano. Upévare heta hénte ojapo ehersísio, osegi tratamiénto ha oĩ voi katu ohóva espiritísta rendápe. Upéicharõ jepe, avave ndaikatúi ojesalva koʼã mbaʼégui.

Ñandejára ojapo vaʼekue yvypórape oiko porã ha ovyʼa hag̃ua. Ha haʼe ndahesaráiri upévagui, koʼág̃a peve oipota upéva ñandéve g̃uarã (Génesis 1:27, 28; Isaías 45:18). Ha javyʼa jaikuaávo Jehová katuete okumpliha hembipota (Isaías 55:10, 11). La Biblia omombeʼu ñandéve Ñandejára omoĩ jeytaha yvyporakuérape g̃uarã pe hardín neporãva, Adán ha Eva operde vaʼekue. Pe último lívro oĩva la Bíbliape omombeʼu mbaʼépa Ñandejára ojapóta: “Haʼe omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma” (Revelación [Apocalipsis] 21:4, NM). ¿Mbaʼépa ojapóta Ñandejára okumpli hag̃ua ko promésa? ¿Ha mbaʼépa jajapo vaʼerã ñande jahupyty hag̃ua upéva?

Ñandejára Raʼy Jesucristo omboʼe vaʼekue idisipulokuérape oñemboʼe jave ojerure hag̃ua Ñandejárape tojejapo hembipota. Ha heta hénte koʼag̃aite peve orrepeti upe ñemboʼe oñehenóiva padrenuéstro. Upérõ Jesús heʼi: “Ore Ru reiméva yvágape, toñemomarangatu nde réra. Tou ne Rréino, tojejapo ne rembipota yvy ape ári yvagapeguáicha” (Mateo 6:9, 10, NM). Jahechaháicha, Irréino rupive Jehová oipeʼapaitéta opa mbaʼe vai oikóva yvyporakuéra nogovernaporãi rupi, ha opromete haguéicha, omoĩta peteĩ múndo pyahu oĩtahápe hustísia (Daniel 2:44; 2 Pedro 3:13). * ¿Mbaʼépa jajapo vaʼerã jahupyty hag̃ua umi mbaʼe porãita Jehová oprometéva?

 Jesucristo heʼi vaʼekue: “Umi hénte ohupyty hag̃ua jeikove opaveʼỹva, tekotevẽ ndekuaa porãve ohóvo, nde Ñandejára teete ha peteĩetévape ha Jesucrístope, upe nde rembou vaʼekue” (Juan 17:3, NM). Ñandejára ñanepytyvõ rupi ikatúta jahupyty jeikove opaveʼỹva pe múndo pyahu haʼe oprometévape. Koʼã mbaʼe ohechauka avei ñandéve añetehápe ñaikotevẽha Ñandejárare.

Koʼág̃ama ñañemoag̃ui vaʼerã Ñandejárare

Ojapóma dos mil áñorupi, apóstol Pablo heʼi hague umi griégo iñarandúvape oĩva Aténaspe: “[Ñandejára] rupínte opavave oikove, orrespira ha oreko opa mbaʼe. Haʼe rupi ningo jaikove, jakuʼe ha jaiko. Heʼiháicha umi poéta oĩva pende apytépe: ‘Ñande ningo iñemoñare avei’” (Hechos 17:25, 28, NM).

Añetete Pablo heʼi vaʼekue umi Atenasguápe, Ñandejára ningo upe omeʼẽva ñandéve opa mbaʼe ñaikotevẽva jaikove hag̃ua, por ehémplo, tembiʼu, y ha áire jarrespiráva. Upéicharõ jaʼekuaa ndaikatumoʼãiha voínte jaikove Ñandejára reheʼỹ. Péro, ¿mbaʼérepa Ñandejára omeʼẽ enterovépe, tahaʼe ivuéno térã iñañávape, umi mbaʼe oikotevẽva oikove hag̃ua? Pablo heʼi: “Péicha haʼekuéra oheka hag̃ua Ñandejárape, sapyʼánte ohekárõ g̃uarã jepovyvyhápe ha añetehápe ojuhu chupe. Péro haʼe noĩri voi mombyry ñandehegui” (Hechos 17:27, NM).

¿Ndépa reikuaa porãseve Ñandejárape ha umi mbaʼe porã haʼe ojapótava? ¿Reikuaasépa umi konsého haʼe omeʼẽva ñandéve jaiko porã hag̃ua koʼág̃ama voi ha opa árare? Oiméramo upéicha, reñeʼẽ vaʼerã upe omeʼẽ vaʼekuéndi ndéve ko rrevísta térã umi ojapo vaʼekue ndive. Haʼekuéra vyʼápe nepytyvõta reikuaa hag̃ua umi mbaʼe.

^ párr. 20 Pe lívro Mbaʼépa añetehápe omboʼe la Biblia?, ojapóva testígo de Jehová, kapítulo 8-pe, omyesakãve mbaʼéichapa Irréino rupive Ñandejára ojapóta hembipota ko yvy ape ári. Ko lívro ikatu relee Internétpe térã remboguejy ko direksióngui: www.jw.org/gug.