Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Octubre de 2013

 KO RREVÍSTAPE OÑEHESAʼỸIJO: ¿MBAʼÉPA OMBOʼE LA BIBLIA?

¿Mbaʼéichapa oñepyrũ rakaʼe opa mbaʼe?

¿Mbaʼéichapa oñepyrũ rakaʼe opa mbaʼe?

Pe primer lívro oĩva la Bíbliape hérava Génesis omombeʼu mbaʼéichapa oñepyrũ rakaʼe opa mbaʼe: ‘Ñepyrũmbýpe Ñandejára ojapo yvága ha yvy’ (Génesis 1:1). Ñandejára ojapo raẽ umi plánta ha mymbakuéra, upéi ñande ru ha sy ypykuépe, Adán ha Eva. Haʼekuéra idiferénte vaʼekue umi mymbágui, Ñandejára ojapo rupi chupekuéra ijoguaháramo. Por ehémplo, Adán ha Eva ikatu odesidi ijeheguiete mbaʼépa ojapóta. Haʼekuéra oĩ vaʼekue rresponsávle umi mbaʼe ojapóvare. Iñeʼẽrendúramo Ijapoharépe, ifamiliakuéra perféktota ha oikóta pyʼaguapýpe opa árare ko yvy ape ári, Ñandejára oipota haguéicha.

Péro peteĩ ánhel ojapo peteĩ mbaʼe ivaietereíva ha ogueraha hapykuéri yvyporakuérape. Upéicha oiko chugui Satanás heʼiséva “Oñemoĩva”. Ko ánhel ojevale peteĩ mbóire ombotavy hag̃ua Évape ha heʼi oho porãvetaha chupe naiñeʼẽrendúiramo Ñandejárape. Upémarõ Adán ha Eva ojapo Satanás heʼíva ha oñemomombyry Ijapoharégui. Haʼekuéra odesidi vai rupi ndaikatuvéima oikove opa árare, ha ikausarekuéra enterovéva ñaneimperfékto, japeka ha ñamano.

Ñandejára pyaʼe voi heʼíma mbaʼépa ojapóta osolusiona hag̃ua la oiko vaʼekue, ikatu hag̃uáicha yvyporakuéra ohupyty jeikove opaʼỹva. Haʼe heʼi peteĩ “ñemoñare” térã peteĩ tapicha ohundietetaha Satanáspe. Avei oipeʼapataha opa mbaʼe vai oikóva Adán ha Eva ojapo haguére Satanás oipotáva (Génesis 3:15). ¿Mávatapa ko “ñemoñare”? Ohasávo pe tiémpo ojekuaáta kuri upéva.

Upe aja Satanás osegi ojapo opa ikatúva ani hag̃ua oñekumpli Ñandejára rembipota. Upéicha rupi hetave ohóvo umi hénte iñañáva ha ojapóva mbaʼe vai. Upévare Ñandejára ombou vaʼekue peteĩ ama guasu ohundipa hag̃ua umi hénte añáme. Péro upe mboyve heʼi Noépe ojapo hag̃ua peteĩ árka, térã peteĩ káha puku tuicháva ikatu vaʼerã ovevúi pe y ári, ikatu hag̃uáicha ojesalva haʼe, ifamiliakuéra ha avei heta mymba.

Un áño haguépe Noé ha ifamiliakuéra osẽ pe árkagui. Ndaiporivéima umi hénte aña, péro neʼĩra gueteri onase pe “ñemoñare” oñepromete vaʼekue.

(Oñeguenohẽ koʼã téxtogui: Génesis kapítulo 1 guive 11 peve, Judas 6, 14, 15 ha Revelación [Apocalipsis] 12:9.)