Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Septiembre de 2013

¿Oñepyrũpa rakaʼe umi idióma Babélpe?

¿Oñepyrũpa rakaʼe umi idióma Babélpe?

‘Ñandejára omosarambi opárupi chupekuéra ha nomopuʼãvéi hikuái pe táva. Upe táva oñembohéra Babel, Ñandejára ombojoavy haguére yvypóra ñeʼẽ upépe.’ (Génesis 11:8, 9.)

¿SIÉRTOPA ko mbaʼe omombeʼúva la Biblia? ¿Oñepyrũpa umi hénte upeichaháguinte peteĩ díape oñeʼẽ diferénte idiómape? Oĩ heta oñembohorýva la Biblia heʼívare ko mbaʼére. Peteĩ karai ohaíva lívro oskrivi vaʼekue: “Vyroreiete ningo pe istória oñeʼẽva tórre de Babel rehe”. Peteĩ rravíno heʼi avei: “Ko istória rupive oĩ omyesakãséva guaʼu mbaʼéicha rupípa oĩ heta idióma, péro tuicha ojavy hikuái”.

¿Mbaʼérepa hetápe ijetuʼu oguerovia hag̃ua la Biblia heʼíva tórre de Babel rehe? Ko istória ojoavy rupi umi mbaʼe ojeʼévare. Por ehémplo, oĩ ostudiáva moõguipa ou umi idióma ha heʼi noñepyrũi hague peteĩ díapente síno mbeguekatúpe, ha enterovéva ouha peteĩ idiómagui. Ambue katu heʼi yma umi hénte ongululupa reínte hague ha tiémpo rire ae oñeʼẽ, ha péicha oñepyrũ umi idióma. Ojeʼe rupi koʼã mbaʼe heta oĩ opensáva pe profesór W. T. Fitch opensaháicha, haʼe ohai ilívro héravape La evolución de los idiomas: “Koʼág̃a peve ndoroikuaaporãi gueteri mbaʼeichaitépa oñepyrũ rakaʼe umi idióma”.

¿Mbaʼépa otopáma umi arkeólogo ha umi oinvestigáva ko mbaʼe? ¿Ohechaukápa siertoha la Biblia heʼíva térãpa nahániri? Jahechami raẽna pe istória oñeʼẽva tórre de Babel rehe oĩva Ñandejára Ñeʼẽme.

MOÕ HA ARAKAʼÉPA OIKO RAʼE

La Biblia heʼi umi idióma ojoavy hague ‘Sinárpe’, oñehenóiva upéi Babilonia, ha upe lugárgui isarambi hague yvyporakuéra (Génesis 11:2). ¿Arakaʼépa oiko upéva? La Biblia omombeʼu umi hénte isarambipa hague Péleg tiémpope, haʼe onase vaʼekue 250 áño Abrahán onase mboyve. Upéicharõ ojapóma 4.200 áño la hénte oñepyrũ  hague oñeʼẽ heta idiómape (Génesis 10:25, nóta; Gé 11:18-26).

Oĩ heʼíva umi idióma koʼág̃a rupi oñeñeʼẽva oñepyrũ hague peteĩ idiómaguinte, ha ojapomaha haimete cien mil áño upéva oñeñeʼẽma hague. * Ótro katu heʼi ojapomaha seis mil áño rupi oñeñeʼẽma hague voi unos kuánto idiómape, ha umívagui ouha umi idióma koʼag̃agua. Péro ¿mbaʼéichapa ikatu oikuaa hikuái mbaʼeichaguápa raʼe umi idióma, noñeñeʼẽvéimarõ koʼág̃a? Peteĩ rrevísta heʼi umi viólogo orekoha umi kanguekue ha hetave mbaʼe ostudia hag̃ua hese, péro umi ostudiáva umi idióma ndorekói koʼãichagua pruéva. Heʼi avei peteĩ jey peteĩ investigadór okalkula vai vaínte hague heʼi hag̃ua arakaʼépa oñepyrũ umi idióma (The Economist).

Péro oĩ hína pruéva ohechaukáva mbaʼéichapa oñepyrũ rakaʼe umi idióma. ¿Mbaʼe mbaʼépa hína umíva ha mbaʼépa ohechauka? Peteĩ ensiklopédia heʼi: “Umi pruéva itujavéva ohechauka ojapomaha cuatro mil térã cinco mil áño yvyporakuéra oskrivíma hague” (The New Encyclopædia Britannica). Ha ¿moõpa ojetopa rakaʼe umíva? Peteĩ lugár héravape Baja Mesopotamia, yma oñehenói hague Sinar. * Upéicharõ umi pruéva ojetopáva ohechauka siertoha la Biblia heʼíva.

IDIFERÉNTE IÑIDIÓMA HA OPENSA LÁJA

La Biblia omombeʼu Ñandejára heʼi hague: ‘Ñambojopara [Babélpe] iñidiomakuéra, ani hag̃ua avave ontende iñirũ heʼíva’ (Génesis 11:7, ÑÑB). Upéicha rupi umi hénte ‘nomopuʼãvéi pe táva’ ha ‘isarambipa opárupi’ ko yvy tuichakuére (Génesis 11:8, 9). La Biblia ndeʼíri umi idióma koʼag̃agua oñepyrũ hague mbeguekatúpe peteĩ idiómagui añónte. Upéva rangue ohechauka peteĩ díapente oñepyrũ hague heta idióma, ha koʼãva orekopáma vaʼekue mbaʼéichapa oñemohendáta umi palávra oñeñeʼẽ ha ojeskrivi hag̃ua. Péicha umi hénte ikatu vaʼekue heʼi opa mbaʼe oñandúva ha opensáva.

Peteĩ eskritúra ojejapo vaʼekue Mesopotámiape tres mil áño Jesús ou mboyve

¿Ha mbaʼépa ikatu jaʼe umi idióma ojojoguávare? Peteĩ sientífika hérava Lera Boroditsky oskrivi: “Ojestudiavévo ohóvo umi idióma oñeñeʼẽva ko yvy tuichakuére (oĩ siete mil rupi, péro ndojestudiapái koʼãva), ojetopa idiferentetereiha ojuehegui”. Upéicharõ, oĩramo jepe umi idióma ojojoguáva (por ehémplo español ha portugés) koʼãva idiferentete voi ótrogui (por ehémplo coreano).

Umi idióma ndojojoguái rupi, ñande ndajahechái peteĩchapa peteĩ mbaʼe ha ñapensa diferénte ojuehegui. Por ehémplo, otyarõmba jave trigoty peteĩ idiómape ojeʼe: “Saʼyjupaitéma”. Péro ótro idiómape ojeʼe: “Morotĩmbaitéma”. Koʼã mbaʼe ohechauka ñandéve umi idióma idiferenteha ojuehegui. Ajeve voi umi omopuʼã vaʼekue pe tórre de Babel noñontendevéi ha oheja rei itraváho.

 ¿ONGULULUPA REÍNTEPA HIKUÁI TÉRÃ OÑEʼẼ OÑENTENDE HAG̃UÁICHA?

¿Mbaʼéichapa rakaʼe pe primer idióma? La Biblia heʼi pe kuimbaʼe ypykue hérava Adán omoñepyrũ hague heta palávra pyahu ombohéra hag̃ua umi mymbápe (Génesis 2:20). Avei ojapo vaʼekue peteĩ poesía heʼi hag̃ua ovyʼaitereiha hembireko Eva reheve. Ha Eva katu omombeʼu porãiterei vaʼekue mbaʼépa Ñandejára omanda chupekuéra, ha la oikótava naiñeʼẽrendúiramo (Génesis 2:23; 3:1-3). Upéicha jahecha pe primer idióma oreko hague palávra hesakã porãva, upéicha rupi umi hénte ikatu heʼi la oñandúva ha oñemongeta oñondive.

Oĩrõ guare peteĩ idiómante, ifasilve vaʼekue umi héntepe ombaʼapo oñondivepa. Péro oñepyrũrõ guare heta idióma ijetuʼuvéma kuri upéva. Upéicharamo jepe umi idióma pyahu orekopáma kuri umi palávra ikatu hag̃uáicha umi hénte oñemongeta. Upévare, ohasávo pe tiémpo oñemopuʼãma heta siuda tuicháva, oĩma umi ehérsito gerrarã, ha ojejapóma heta tape ojeviaha hag̃ua mombyrymbyry ikatu hag̃uáicha ojejapo negósio (Génesis 13:12; 14:1-11; 37:25). ¿Ikatúpa ojehupyty koʼã mbaʼe umi hénte ongululupa reínteramo oikóvo? Nahániri. Ohechaukaháicha la Biblia, pe idióma ypykue ha umi oñepyrũ vaʼekue Babélpe haʼéma vaʼekue voi idióma hesakã ha oñentende porãva.

Umi investigasión ojejapóva koʼág̃a rupi ohechauka siertoha upéva. Peteĩ lívro heʼi: “Oĩ puévlo ndorekóiva heta mbaʼe umi siuda tuichavéva orekóva, upéicharamo jepe iñidióma orekopaite umi palávra omyesakã hag̃ua la opensáva, orekoháicha avei umi ótro idióma ikonosidovéva” (The Cambridge Encyclopedia of Language). Pe profesór Steven Pinker ombaʼapóva universida de Hárvardpe heʼi avei ilívro héravape El instinto del lenguaje: “Ndaipóri ni peteĩ idióma naisentídoiva”.

¿MBAʼÉPA OIKÓTA UMI IDIÓMAGUI?

Jahecháma moõpa ojetopa raʼe umi pruéva itujavéva, avei umi idióma idiferenteha ojuehegui ha mbaʼéichapa umi idióma yma guare jepe orekopáma heta palávra oñeñeʼẽ ha ojeskrivi hag̃ua. ¿Mbaʼépa ohechauka koʼã mbaʼe? Ikatuha jaguerovia la Biblia heʼíva tórre de Babel rehe. Oĩma voi heta tapicha ogueroviáva upéva.

La Biblia ohechauka Jehová voi omoñepyrũ hague umi idióma yvyporakuéra omboyke haguére chupe (Génesis 11:4-7). Upéicharamo jepe, Haʼe opromete ‘omboʼetaha opa tetãme oñeʼẽ hag̃ua peteĩ ñeʼẽ ipotĩvape, ikatu hag̃uáicha oiporu héra ha oservi chupe oñondivepa’ (Sofonías 3:9, NM). Ko ‘ñeʼẽ ipotĩva’ haʼe hína umi mbaʼe omboʼéva la Biblia ha oipytyvõmava heta hénte opa tetãygua oiko hag̃ua peteĩ ñeʼẽme. Upévare ikatu jaʼe koʼẽrõitéma Jehová ikatuha omeʼẽ jey peteĩ idiómante, ojapo haguéicha tórre de Babel tiémpo mboyve.

^ párr. 8 Koʼãva oguerovia avei yvyporakuéra ou hague kaʼígui. Reikuaasevérõ ko mbaʼégui, ehecha pe folléto El origen de la vida. Cinco cuestiones dignas de análisis, páhina 27-29, ojapóva umi testígo de Jehová.

^ párr. 9 Umi arkeólogo otopa namombyryiete Sinárgui heta témplo imólde pirámideva. La Biblia heʼi umi omopuʼã vaʼekue tórre de Babel ndoipurúi hague ita síno ladríllo ha omboguapy hag̃ua ojoʼári oiporu vléke (Génesis 11:3, 4). Peteĩ ensiklopédia heʼi Mesopotámiape ‘saʼieterei oĩ hague umi ita ha ikatu ndaiporiete voi, péro pe vléke katu hetaiterei oĩ’ (The New Encyclopædia Britannica).