Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Septiembre de 2013

 TEMBIASAKUE

Oremboriahúrõ jepe rohupyty heta mbaʼe Jehová servísiope

Oremboriahúrõ jepe rohupyty heta mbaʼe Jehová servísiope

Anase vaʼekue diciembre de 1939, peteĩ puévlo michĩvape hérava Cotiujeni opytáva Moldáviape, nórte gotyo. Che túva ha che avuélo oiko vaʼekue upépe peteĩ óga noñetermináivape. Áño 1930 rupi mokõivévagui oiko testígo de Jehová. Che sy ohechakuaa che avuélo oikuaaha heta mbaʼe la Bíbliagui, ha pe paʼi ore puevlopegua katu nahániri, upémarõ oiko avei chugui testígo de Jehová.

Arekópe tres áño, che túva, che tio ha che avuélope ojegueraha préso ombaʼapo pohýi hag̃ua campo de concentraciónpe ndojeheʼái rupi polítikare ha ndohóigui gerrahápe. Che túva añoite nomanói ha áño 1947-pe, opa rire pe Segunda Guerra Mundial ou jey ógape. Haʼe heta ohasa asy ha ojegolpea vaieterei ikolúmnape, péro ni mbaʼevéicharõ nomboykéi ijerovia.

ROMBOHOVÁI HETA MBAʼE

Arekópe nueve áño hetaiterei Testígo roñemosẽ Moldáviagui ha rojegueraha Sibériape. Pe 6 de julio de 1949, orerupi hikuái peteĩ tren ojeguerojahápe jepi vaka ha roviaha 6.400 kilómetro, doce día kontinuádo, roguahẽ meve pe siúda héravape Lebyazhe. Pe tren parádape oreraʼarõma umi mburuvicha upepegua. Oremoĩ en grúpo ha pyaʼe voi oremondo la roikotahápe. Ore ropyta peteĩ eskuelaʼi nandípe. Orekaneʼõiterei ha rojepyʼapy. Upéinte peteĩ ermána ijedámava oñepyrũ opurahéi mbeguemi peteĩ músika ojapo vaʼekue testígo de Jehová pe Segunda Guerra Mundial aja. Upéi enterove rosegi chupe péicha:

“Hetaite ermánope ojegueraha mombyrymbyry.

Ape ha pépe oñemosarambi chupekuéra.

Ñandejárape iñeʼẽrendu rupi ohasa asyeterei ha oĩ omanóva avei.”

Tiémpo rire ikatúma roho domingokue rreunionhápe, ojejapóva 13 kilómetro ógagui. Rosẽmi vaʼerã koʼẽ mboyve, heta vése pe niévepe roike ore kuʼa peve ha roʼy 40 grados bajo cero. Roñembyaty éntre cincuenta térã hetave peteĩ koty michĩvape ha ropurahéi peteĩ, mokõi térã mbohapy kántiko, upe rire roñemboʼe ha roñepyrũ rostudia la Biblia una óra térã areve. Upéi ropuraheive ha rosegi rostudia. ¡Koʼã mbaʼe ningo tuicha omombarete ore jerovia!

OKAMBIA CHE SITUASIÓN

Áño 1974 rupi, tren paráda oĩva Dzhankóype

Áño 1960-pe g̃uarã pe goviérno ndopersegiguasuvéima Testigokuérape ha roiko trankilomiéma. Chemboriahúramo jepe ikatu kuri aviaha Moldáviape, upépe aikuaa Nínape, ijavuélo ha itúva ningo  Testígo avei. Tiémpo riremi romenda ha roho roiko Sibériape, upépe áño 1964-pe onase che rajy Dina, ha 1966-pe katu che raʼy Viktor. Dos áño haguépe rova Ucrániape. Roiko peteĩ óga michĩvape pe siuda héravape Dzhankoy, opytáva 160 kilómetro Yáltagui, oĩva península de Criméape.

Criméape ha kompléto pe Unión Soviéticape ojeproivi Testigokuéragui opredika. Péro pe goviérno ndoikói oñemoĩ mbarete orerehe ni orepersegi, upévare oĩ kuri Testígo oñetrankilisa ha noñehaʼãvéi omombarete ijerovia. Enterove rohasa asy Sibériape, ha upévare oĩ opensáva iporãha koʼág̃a oaprovecha ombaʼapo jejopy ojogua hag̃ua umi mbaʼe oipotáva.

ROHASA HETA MBAʼE OREMBOVYʼÁVA

Pe 27 de marzo de 1991 guive, pe Unión Soviética ndoproivivéima mbaʼeve testígo de Jehovágui. Upe riremínte pe tetã tuichakuére oñepyrũma ojeprepara siete asambléa dos diagua. Oréve otoka roho Odésape (Ucrania), upépe pe aty guasu oñepyrũ 24 de agosto. Che aha un mes oñepyrũ mboyve aipytyvõ hag̃ua umi traváho ojejapótava pe estádiope.

Rombaʼapo ningo tódo el día, ha sapyʼánte katu pyharekue roke pe graderíape. Umi ermána omopotĩ pe párke oĩva pe estádio jerére. Rombyaty setenta mil kílo yty. Ko asamblearã oñehaʼarõ 15.000 persóna rupi, ha oĩ oñenkargáva oheka chupekuéra moõpa opytáta. Upeichaháguinte oñemombeʼu oréve peteĩ notísia vai.

Pe 19 de agosto, cinco día oñepyrũ mboyve ore aty guasu ojejagarra pe presidénte Unión Sovieticapegua, Mijaíl Gorbachov, oĩ aja de vakasión namombyrýi Yáltagui. Ha ojeproivi orehegui rojapo ore asambléa. Umi mombyrýgui oútava kuri oñepyrũ ohenói joa oikuaaségui mbaʼépa ojapóta pórke orekopáma hikuái ipasáhe. Heta oñemboʼe rire umi omoakãva ko aty guasu, heʼi umi ohenóivape: “¡Lomímonte peju!”.

Entéronte osegi ojeprepara ha oñemboʼe. Pe Unión Soviética tuichakuégui ningo ojeju pe asamblearã. Oĩ ermáno oñenkargáva oho oheka umi og̃uahẽvape. Umi omoakãva pe aty guasu oho umi mburuvicha rendápe, péro káda día ou hikuái notísia vai reheve.

OÑEHENDU ORE ÑEMBOʼE

Ofaltávo dos díantema oñepyrũ hag̃ua pe asambléa umi ermáno omoakãva pe aty guasu ogueru notísia iporãitereíva: ¡okonsegimi ningo hikuái la permíso!. Pe asambléa díape oreresay pororopa ropurahéi aja pe primer kántiko. ¡Rovyʼaiterei kuri! Opávo pe aty ropyta pyhare peve roñemongeta umi ore amígo aréma ndorohechavéivandi. Romañahápente rohecha umi ermáno oaguantámava heta mbaʼe ijetuʼuetereíva.

Aty guasu ojejapóva Odésape (1991)

Ojapóma ningo veintidós áño rasa oiko hague upe asambléa. Koʼág̃a oĩ hetaitereive testígo de Jehová Ucrániape. Áño 1991-pe oĩ kuri 25.000 ha koʼág̃a g̃uarã oĩma 150.000 rasa. Avei oñemopuʼãma Salón del Reino ko tetã tuichakuére.

ROHUPYTY HETA MBAʼE JEHOVÁ SERVÍSIOPE

Che família oiko koʼag̃aite peve ore róga oĩva pe puévlo héravape Dzhankoy. Upe siudápe oĩ koʼág̃a 40.000 persóna. Rog̃uahẽrõ guare 1968-pe mbovymi vaʼekue umi Testígo, péro koʼág̃a oĩma seis kongregasión.

Che famíliape avei oreretavéma. Oĩ che rajy, che raʼy, umi ore niéto ha ifamiliakuéra. Ha enterovénte roservi Jehovápe.