Noelia ningo peteĩ mitãkuñaʼi ijukyetereíva odivuhasénteva voi. Peteĩ kaʼarúpe oho hóga kupépe, oñepysãnga ha hoʼa peteĩ pisína hypýva orekóvape hikuái. Ojahoga ha omano dos semána omboty mboyve cuatro áño.

Pe 14 de diciembre de 2012, peteĩ eskuéla oĩva Estados Unídospe ojejuka 20 mitãme. Koʼãva apytépe oĩ Charlotte, Daniel, Olivia, ha Josephine. Haʼekuéra oreko éntre 6 ha 7 áño. Upe díape ojejuka 26 persóna. Pe ñeñotyhápe, pe presidénte Barack Obama oñepyrũ olee umi omanóva réra, ha upéi heʼi umi hénte oñembyasývape: “Ndaikatuvéima oiko koʼãichagua mbaʼe vai”.

Peteĩ mitãkuña hérava Bano orekóva 18 áño ova vaʼekue ihentekuérandi áño 1996-pe Irákgui Noruégape. Pe 22 de julio de 2011 peteĩ kuimbaʼe ndochaʼéiva extranherokuérare ojuka 77 mitãrusu ha mitãkuñáme. Ha umíva apytépe oĩ vaʼekue Bano. Upéi ko kuimbaʼe heʼi: “Ambyasy katu [...] ndajukái haguére hetavépe”.

Opárupi ningo oiko koʼãichagua mbaʼe vai. Epensamíntena mbaʼeichaitépa heta hénte ohasa asy oĩ rupi terrorísta, mondaha, térã oiko jave umi aksidénte, gérra, yvyryrýi ha umícha. ¡Hetaite ñande rapicha inosénte omano jepi peteĩ tesapirĩme! ¡Hetaitéma ojehasa asy!

Oĩ opensáva Ñandejára ndojepyʼapyiha ñanderehe ha ikáusare oikoha koʼã mbaʼe. Ótro katu heʼi Haʼe ohechaha la jahasáva péro odesidi ndojapói mbaʼeve. Oĩ katu oimoʼãva koʼã mbaʼe oikónte vaʼerãha voi. Hetaiterei mbaʼéma ningo ojeʼe, péro ¿mbaʼéicha piko ikatu jaikuaa mbaʼérepa oiko koʼã mbaʼe? Ñandejára Ñeʼẽ ohechauka mbaʼérepa jahasa asy ha mbaʼéichapa oñesolusionáta koʼẽrõitéma umi provléma. Jahechamína upéva umi ótra páhinape.