Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Septiembre de 2013

 TUVAKUÉRA OMBOʼE HAG̃UA IFAMÍLIAPE

Ñandejára ikatu oñeñandu vai. ¿Mbaʼéichapa ikatu ñambovyʼa chupe?

Ñandejára ikatu oñeñandu vai. ¿Mbaʼéichapa ikatu ñambovyʼa chupe?

¿Ojehúmapa ndéve peteĩ mbaʼe vai nemyasẽva?... * Enterovévante voi sapyʼánte ñañeñandu vai ha ñanerasẽ, ikatu oime oĩ raʼe oñeʼẽ vaíva ñanderehe. Péicha jave ñañeñandu vaieterei, ¿ajépa?... Ñandejára avei oñeñandu vai oĩramo oñeʼẽ reíva hese. Koʼág̃a jahecháta mbaʼépa ikatu omoñeñandu vai chupe, ha mbaʼépa ñande jajapokuaa ñambovyʼa hag̃ua Ñandejárape.

La Biblia omombeʼu oĩ hague hénte heʼíva ohayhuha Ñandejárape, péro ‘omombaʼembyasy chupe’, koʼã persóna káusare haʼe ‘oñeñandu vai’. Jahechamína mbaʼéichapa oñeñandu Jehová ndajajapóiramo haʼe heʼíva.

Pe kuimbaʼe ha kuña ypykue ojapo vaʼekue peteĩ mbaʼe omoñeñandu vaietereíva Ñandejárape. Haʼekuéra oiko vaʼekue peteĩ hardín neporãvape hérava ‘Edén’. ¿Mávapa rakaʼe koʼã mokõi persóna?... Upeichaite, Adán ha Eva. Jahechamína mbaʼépa ojapo raʼe hikuái.

Jehová heʼi chupekuéra oñangareko hag̃ua pe hardín rehe ha ifamília hag̃ua. Haʼekuéra ikatúta kuri oiko opa árare pe lugár porãitépe. Péro Adán ha Eva ifamília mboyve oiko peteĩ mbaʼe ivaietereíva. ¿Reikuaápa mbaʼépa la oiko vaʼekue?... Peteĩ ánhel omboliga Adán ha Évape opuʼã hag̃ua Jehová kóntrape. Jahechami mbaʼeichaitépa oiko vaʼekue upéva.

Pe ánhel ojevale peteĩ mbói rehe oñeʼẽ hag̃ua Évape. Pe mbói heʼi chupe ‘oikotaha Ñandejáraicha’, ha upéva ogustaitéma voi Évape. Upévare ojapo pe mbói heʼíva. ¿Reikuaápa mbaʼépa ojapo?...

 Eva hoʼu pe yva Jehová oproivi vaʼekue. Ojapo mboyve Évape, Ñandejára heʼi Adánpe: ‘Ikatu reʼu opaichagua yva oĩva ko hardínpe; upe yvyramátagui oikuaaukáva iporã ha ivaíva katu nahániri. Cháke reʼuha ára upévagui, remanóta’.

Eva oikuaa porã mbaʼépa Ñandejára omanda vaʼekue. Péro haʼe osegi omaña pe yvyramátare ha ‘ohecha iporãha hoʼu hag̃ua, upémarõ oipoʼo hiʼa ha hoʼu’. Upéi omeʼẽ Adánpe ha ‘haʼe avei hoʼu’. ¿Mbaʼérepa ndéverõ g̃uarã hoʼu avei?... Ohayhuve rupi Évape Jehovápe rangue. Adán omboy ke Ñandejárape opyta porãse rupi hembirekóndi. Péro ñande jaikuaa iñimportanteveha ñahendu Jehovápe ótrope rangue.

Oiméne nemanduʼa peteĩ mbói oñeʼẽ hague, ¿mbaʼéicha ikatu oiko upéva? Koʼág̃a rupi oĩ heta artísta omoĩva muñéko ipóre ha ojapo upe muñéko oñeʼẽramoguáicha. Upéicharõ, ¿mávapa la oñeʼẽ vaʼekue Évape?... “Pe mbói ypykue oñehenóiva Diablo ha Satanás”.

¿Ndépa reikuaa mbaʼépa rejapo vaʼerã rembovyʼa hag̃ua Jehovápe?... Reñehaʼãmbaite vaʼerã siémpre neñeʼẽrendu chupe. Satanás ningo heʼi avave ndojaposeiha Ñandejára oipotáva. Upévare Jehová ojerure ñandéve: ‘Nearandúke che raʼy [térã che rajy], upéva chembovyʼáta, ha ikatúta ambohovái cherehe oñembohorývape’. Satanás ningo oñembohory Jehováre ha heʼi ikatuha omomombyry oimeraẽvape Ñandejáragui. Upévare neñeʼẽrendúkena Jehovápe rembovyʼa hag̃ua chupe. ¿Reñehaʼãtapa rejapo upéva?...

Relee hag̃ua la Bíbliape

  • Salmo 78:40, 41

  • Génesis 1:26-28; 2:15-17; 3:1-6

  • Revelación [Apocalipsis] 12:9; Proverbios 27:11

^ párr. 3 Oimérõ relee reína peteĩ mitãndi, epytaʼimi oĩ jave mbohapy púnto ha ehaʼarõ tombohovái umi porandu.