Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Agosto de 2013

 OJEKUAASÉVA JEPI

¿Mbaʼérepa oĩ kuimbaʼe ha kuña réra noñemoĩriva la Bíbliape?

¿Mbaʼérepa oĩ kuimbaʼe ha kuña réra noñemoĩriva la Bíbliape?

La Bíbliape, lívro de Rútpe, oñemombeʼu peteĩ kuimbaʼe nokumplíri hague peteĩ mandamiénto oĩva pe Léi mosáikape, péro noñemombeʼúi mbaʼéichapa héra upe kuimbaʼe, síno oñehenóinte chupe fuláno (Rut 4:1-12). ¿Heʼisépa upéva umi noñehenóiriva chupekuéra hérarupi iñaña térã naiñimportanteiha?

Nahániri. Jahechamína ótro ehémplo. Jesús ojapo mboyve pe última Páskua idisipulokuéra ndive, heʼi chupekuéra oho hag̃ua “karai fuláno rendápe” oprepara hag̃ua hógape pe Páskua (Mateo 26:18, NM). ¿Ikatúpa jaʼe upéicharõ ko kuimbaʼe iñañaha térã naiñimportanteiha? Ni mbaʼevéicharõ. Haʼe ningo Jesús disípulo avei, péro natekotevẽinte kuri oñemombeʼu upérõ mbaʼéichapa héra.

La Bíbliape oñemoĩ avei heta tapicha iñañáva réra. Por ehémplo, Eva. Jaikuaa porã péicha héra hague pe kuña ypykue, péro haʼe opensa ijehénte, naiñeʼẽrendúi ha ogueraha avei Adánpe hapykuéri, ha upe ojapóva hikuái ñandeperhudika enterovépe (Romanos 5:12). Péro heta ivuénova réra noñemoĩri la Bíbliape. Por ehémplo, nomombeʼúi mbaʼéichapa héra Noé rembireko, péro jaikuaa haʼe imbaʼeporã, iñeʼẽrendu ha oipytyvõ hague iménape okumpli hag̃ua pe tembiapo oñemeʼẽva chupe. Upéva ohechauka porã natekotevẽiha katuete oñemoĩ héra la Bíbliape ojekuaa hag̃ua iñimportanteha ha Ñandejára oguerohoryha chupe.

La Bíbliape oñeñeʼẽ avei Ñandejára siervokuéra oipytyvõ vaʼekuére oñekumpli hag̃ua hembipota, péro noñemombeʼúi mbaʼéichapa héra hikuái. Ñapensamínte pe mitãkuñaʼi isrraelíta oipytyvõ vaʼekuére Naamánpe, pe komandánte sírio. Ko mitãkuñaʼi ningo Naamán rembireko sirviénta, ha pyʼaguasúpe omombeʼu vaʼekue ipatrónape, oĩha Israélpe peteĩ proféta ikatútava oipytyvõ iménape okuera hag̃ua. Ko mitãkuñaʼi oñeʼẽ rupi, Ñandejára ojapo peteĩ milágro (2 Reyes 5:1-14). Ótro ehémplo iporãitereíva avei Jefté rajy. Itúva ningo hués vaʼekue Israélpe ha ojapo peteĩ promésa, ha haʼe okumpli hag̃ua itúva opromete vaʼekue, nomendái ni naifamíliai (Jueces 11:30-40). La Bíbliape oĩ avei cuarenta sálmo rasa ndojekuaáiva mávapa ohai rakaʼe. Oĩ avei proféta ojapo vaʼekue heta mbaʼe iñimportánteva Ñandejárape g̃uarã, péro ndajaikuaái mbaʼéichapa héra (1 Reyes 20:37-43).

Umi ánhel ehémplo katu iporãvéntema. Oĩramo jepe hetaiterei rasa, la Biblia ohenói hérarupi mokõimente: Gabriel ha Miguel (Daniel 7:10; Lucas 1:19; Judas 9). Umi ótro réra katu noñemombeʼúi. Peteĩ jey, Sansón túva hérava Manóah, oporandu peteĩ ánhelpe: ‘¿Mbaʼéicha piko nderéra, ikatu hag̃uáicha romombaʼe ág̃a oiko vove upe eréva?’. Pe ánhel ombohovái chupe: ‘¿Mbaʼupe piko reporandu chéve che réra?’. Ko ánhel iñumílde ha ndoipotaiete voi oñemombaʼeguasu chupe Jehovápe rangue (Jueces 13:17, 18).

La Biblia nomombeʼúi mbaʼérepa oĩ kuimbaʼe ha kuña réra noñemoĩriva Ñandejára Ñeʼẽme. Upéicharõ jepe, heta mbaʼe ikatu ñaaprende umi oservi vaʼekuégui Ñandejárape ipyʼaite guive ha umi ánhelgui, ndajaikuaáiramo jepe herakuéra.