Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Agosto de 2013

 LA BIBLIA OKAMBIA CHUPEKUÉRA

“Ahechakuaa tekotevẽha akambia”

“Ahechakuaa tekotevẽha akambia”
  • ONASE: 1941-PE

  • HETÃ: AUSTRALIA

  • AMBUE INFORMASIÓN: IKAʼU, OPITA HA IJURUTIEʼỸ VAʼEKUE

CHE REMBIASAKUE:

Akakuaa vaʼekue Warialda, Nueva Gales del Súrpe. Upe puevlíto ningo itrankílo, ipotĩ ha ndaiporiguasúi upépe ni mondaha. Umi hénte oreko ikokue, oñemitỹ ha oreko heta ovecha ha vaka.

Ógape roime 10 ermáno, ha che la ijypykue. Arekópe 13 áño añepyrũma ambaʼapo aipytyvõ hag̃ua che tuvakuérape. Che ningo che eskuelaʼi, ha upévare ambaʼapónte peteĩ estánsiape. Upéi, arekórõ guare 15 áño, añangarekóma umi animál rehe ha adoma umi kavaju saite.

Igústo ningo ñambaʼapo umi estansiaháre. Iporã porãiterei umi lugár ha avyʼa che travahohápe. Pyharekue, ajatapými vaʼerã okápe ha aguapy amaña pe jasy ha umi estrélla ojajaipávare yvágape. Avei ipiroʼy asy ha hyakuãvu rei ou pe yvytúre umi yvoty ryakuã. Umícha jave apensámi oĩmante vaʼerãha ojapo vaʼekue umi mbaʼe porãite. Péro heta mbaʼe ijetuʼu avei umichahárupi. Umi ombaʼapóva chendive ijurutieʼỹ ha opita, ha pyaʼeterei ova cherehe ilajakuéra.

Arekópe 18 áño, ava Sýdneype aha hag̃ua kuartélpe, péro che estudioʼi rupi ndachejagarrái hikuái. Upémarõ aheka che travahorã ha apyta un áño upe siudápe. Upe tiémpope opredika chéve umi testígo de Jehová ha cheinvita aha hag̃ua irreunionpekuéra, ha aha. Upépe ahechakuaáma voi haʼekuéra omboʼeha la Biblia heʼihaichaite.

Upe riremínte aha jey kampáñare, ha aiko Goondiwíndipe (Queensland). Upépe akonsegi che travahorã ha amenda. Péro upéi añepyrũ chekaʼu.

Che rembireko ha che, roguereko mokõi mitã, upéva chemopensa umi mbaʼe ajapóvare aikóvo ha ahechakuaa tekotevẽha akambia. Upéi chemanduʼa umi mbaʼe ahendu vaʼekuére umi testígo de Jehová rreunionhápe  ha adesidi ahejataha umi mbaʼe vai ajapóva.

Atopa peteĩ rrevísta Ñemañaha itujáva. Upépe oĩ umi Testígo Australiapegua sukursál direksión, ha askrivi chupekuéra chepytyvõ hag̃ua. Upe riremínte chevisita peteĩ Testígo ikalidaitereíva, ha añepyrũ astudia hendive la Biblia.

LA BIBLIA CHEPYTYVÕ AKAMBIA HAG̃UA:

Astudiavévo ahávo la Biblia, ahechakuaa akambia vaʼerãha heta mbaʼépe. Por ehémplo, 2 Corintios 7:1 heʼi: “Ñamopotĩkena ñande rete ha ñane korasõ opa mbaʼe kyʼágui” (NM).

Upémarõ aheja pe sigarríllo ha vevída. Ijetuʼu chéve, péro ajedesidíma aservitaha Ñandejárape che pyʼaite guive. Tuichaiterei chepytyvõ pe konsého oĩva Romanos 12:2-pe: “Anive pehaʼanga umi hénte oĩva ko múndope, pekambia guei pepensa lája” (NM). Ahechakuaa tekotevẽha aheja umi mbaʼe vai ajapóva, ha apensa Ñandejára opensaháicha. Upéicha, haʼe chepytyvõ rupi, ahejaite pe sigarríllo ha vevída.

“Ahechakuaa tekotevẽha aheja umi mbaʼe vai ajapóva, ha apensa Ñandejára opensaháicha”

Péro ijetuʼuetereive vaʼekue chéve aheja hag̃ua umi ñeʼẽ tieʼỹ aiporúva. Che aikuaa porã Efesios 4:29-pe heʼiha: “Aníkena osẽ pende jurúgui mbaʼeveichagua ñeʼẽ kyʼa” (NM). Upéicharõ jepe, heta aiko ahejaite hag̃ua upéva. Tuicha chepytyvõ ajepyʼamongetávo Isaías 40:26 heʼívare: ‘Pejesaupi ha pemaʼẽ mbyja atykuérare. ¿Máva piko umi mbaʼe apohare? Pe heʼíva peteĩteĩme hembiaporã ha hérarupi ohenóiva chupekuéra. Haʼe ipoderóso ha ipuʼaka mbarete rupi ndofaltái mbaʼevete ijapytepekuéra’. Che ajesarekómi ko univérsore ha haʼe chejupe: Ñandejára ningo oreko podér ojapo hag̃ua koʼã mbaʼe, ¿mbaʼégui piko upéicharõ nachepytyvõmoʼãi akambia hag̃ua ha aiko haʼe oipotaháicha? Upévare siémpre añemboʼe chupe che pyʼaite guive, upéicha rupi koʼág̃a akambia ha ndaiporuvéima umi ñeʼẽ kyʼa.

UMI MBAʼE PORÃ AHUPYTÝVA:

Ambaʼapo rupi estánsiape, saʼi añeʼẽ umi hénte ndive, ndahetái voi roime rombaʼapóva upe lugárpe. Péro umi testígo de Jehová oreko peteĩ rreunión ombokatupyrýva enterovépe ikatu hag̃uáicha oñemongeta hekopete umi hénte ndive, ha upéva tuichaiterei chepytyvõ. Upéicha rupi koʼág̃a natĩri añeʼẽ hag̃ua che rapichakuérandi pe marandu porãre (Mateo 6:9, 10; 24:14).

Ndaʼareiete añenombra hague ansiáno kongregasiónpe. Avyʼaiterei ningo koʼág̃a ikatu haguére aipytyvõ porãve che ermanokuérape. Ha avyʼaveha katu, che rembireko ha che familiakuéra oservi avei chendive Jehovápe.

Che pyʼaite guive aagradese Ñandejárape chepytyvõ haguére aikuaa hag̃ua chupe, che estudioʼíramo jepe (Isaías 54:13). Che korasõ mbytete guive haʼe Proverbios 10:22 heʼiháicha: ‘Jehová vendisión ñanemoakãrapuʼã’ (NM). Upévare, che rembireko ha che familiakuéra ndive rosegíta roikuaave Jehovápe ha romombaʼeguasu chupe opa árare.