Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Julio de 2013

 KONSÉHO OGAPÝPE G̃UARÃ

Mbaʼéichapa ikatu ojogueraha porã umi omenda jeýva

Mbaʼéichapa ikatu ojogueraha porã umi omenda jeýva

HERNÁN: * “Treinta y cuatro áño amenda haguépe, che rembireko omano kánsergui, péro upe rire amenda jey. Che rembireko pyahu héra Linda, ha haʼe heʼi pyʼỹinte akomparaha chupe che rembireko ypykuére. Ha hiʼarive, che amigokuéra oñeʼẽ porã jepi avei hese, ha upéva oguapyeterei Linda rehe”.

LINDA: “Haʼetévaicha chéve che ména Hernán ha iñamigokuéra ndacherayhumoʼãiva arakaʼeve. Hernán rembireko ypykue ningo ivuenaiterei vaʼekue voi ha ijuky. Entéronte ohayhu chupe. Sapyʼánte añeporandu cherayhúnepa Hernán ohayhu haguéicha chupe”.

Hernán ha Linda ovyʼa omenda haguére ojuehe. Hernán ningo viúdo vaʼekue ha Linda katu divorsiáda. Linda ohayhueterei iménape ha heʼi voi chupe “che mborayhu jára”. Upéicharõ jepe, haʼekuéra ohechakuaa ohasaha heta mbaʼe ijetuʼúva ndohasái vaʼekue imatrimónio ypykuépe. *

Oiméramo nde avei remenda jey raʼe, ¿mbaʼéichapa reñeñandu ne matrimóniope? Tamara, peteĩ kuñakarai omenda jey vaʼekue tres áño ojedivorsia haguépe, heʼi: “Primera ves remendávape, reñeñandu porãiterei ha repensa voi reimetaha opa árare ne mborayhu jára ndive. Péro remenda jeývo, ndahaʼevéima upéicha; reikuaáma ne matrimónio ikatuha osẽ vai”.

Upéicharõ jepe, heta omenda jey vaʼekue ovyʼánte avei imatrimóniope. ¡Nde avei ikatu revyʼa! ¿Mbaʼéichapa? Jahechamína mbohapy provléma  ikatúva rehasa remenda jeývo ha mbaʼéichapa la Biblia ikatu nepytyvõ rembohovái porã hag̃ua. *

PROVLÉMA 1: NE MATRIMÓNIO YPYKUE IKATU OMBYAI KOʼAG̃AGUÁPE.

Ellen, peteĩ kuñakarai Sudafricagua, heʼi: “Ndaikatúi cheresarái umi mbaʼe porã ahasa vaʼekuégui che ména ypykue ndive, koʼýte chemanduʼa hese roho jave umi lugár yma roho haguépe de vakasión. Sapyʼánte katu akompara voi che ména koʼag̃aguápe, che ména ypykuére”. Péro epensamína, ¿mbaʼéichapa nde reñeñandúta ojejapóramo nderehe upéicha? Katuete ningo nemoñeñandu vaíta ne ména térã ne rembireko pyʼỹinte imanduʼáramo imatrimónio ypykuére.

Pejapo oñondive umi mbaʼe penemoag̃uivétava ojuehe.

MBAʼÉPA IKATU REJAPO: Rentende vaʼerã hasytanteha voi ne ména térã ne rembirekópe hesarái hag̃ua imatrimónio ypykuégui, koʼýte oiméramo heta áño oiko raʼe hikuái oñondive. ¡Oĩ voi katu oimoʼãʼỹhágui ohenóiva hembireko pyahúpe, hembireko ypykue rérarupi! ¿Mbaʼépa ikatu rejapo péicha jave? La Biblia heʼi porã ñañehaʼã vaʼerãha ñañontende ha jajoayhu oñoermánoicha (1 Pedro 3:8).

Aníkena ndeselóso ha reproivi voi ne rembirekógui oñeʼẽ imatrimónio ypykuére. Oiméramo sapyʼánte oñeʼẽse ndéve hese, nembaʼerechakuaánte vaʼerã ha rehendu chupe. Ani repensáma voi nekomparaha hína hese. Juan, peteĩ karai opyta vaʼekue viúdo ha ojapómava diez áño omenda jey hague, heʼi: “Kathy arakaʼeve ndoproivíriva chehegui añeʼẽ che rembireko ypykuére. Upéva rangue, cherendu porãnte ha chentende, upéicha chekuaa porãve”. Peẽ avei peñemongetáramo upéicha, penepytyvõta peñemoag̃uive hag̃ua ojuehe.

Repensa vaʼerã umi mbaʼe porã ojapo ha ohechaukávare ne rembireko koʼag̃agua. Katuete ningo idiferénteta ne rembireko ypykuégui, péro oime vaʼerã katuete oreko avei heta mbaʼe ijojahaʼỹva. Remombarete hag̃ua ne matrimónio, repensa vaʼerã umi mbaʼe ojapóvare ne rembireko pyahu, péro ani rekompara chupe avavére (Gálatas 6:4). Edmond, omendámava dos vése, heʼi: “Ñane amigokuéra jepe idiferénte ojuehegui, ha káda matrimónio idiferéntente avei”.

¿Mbaʼépa ikatu rejapo ani hag̃ua remoñeñandu vai ne rembireko koʼag̃aguápe nemanduʼa rupi umi mbaʼe porã rehasa vaʼekuére ne rembireko ypykuéndi? Jared omombeʼu sapyʼánte imanduʼaha umi mbaʼe porã ohasa vaʼekuére hembireko ypykuéndi. Upéicharõ jepe oiko vyʼápe hembireko koʼag̃aguándi.

EJAPÓNA KOʼÃ MBAʼE: Eporandu ne ména térã ne rembireko pyahúpe omolestápa chupe oñeñeʼẽ jave ne matrimónio ypykuére, ha ehecha mbaʼéicha javépa iporãvéta nereñeʼẽinte hese.

PROVLÉMA 2: NE AMIGOKUÉRA NDOIKUAÁI MBAʼÉICHAPA OTRATÁTA NE MÉNA TÉRÃ NE REMBIREKO PYAHÚPE.

Javier, omenda jeýva seis áño ojedivorsia haguépe, heʼi: “Romenda ramóme, che rembirekópe haʼetévaicha che amigokuéra okontrolaitereíva chupe”. Leo katu heʼi: “Oĩ voi heʼíva che rembirekópe ohechagaʼuha imenakuépe ha ohayhueterei hague chupe hikuái..., ¡hiʼarive che rovake heʼi hikuái upéicha!”.

MBAʼÉPA IKATU REJAPO: Eñemoĩ ne amigokuéra lugárpe. La Biblia heʼi voi tekotevẽha ‘ñandepyʼaporã opavavéndi ha ñaneumílde’ (Tito 3:2, ÑÑB). Juan omombeʼu: “Che ahechakuaa amenda jey rire ijetuʼuha che amigokuérape chetrata hag̃ua jepiveguáicha ha ojeheʼa hag̃ua che rembireko koʼag̃aguáre. Chupekuéra g̃uarã haʼete cherechapáva gueteri che rembireko ypykuéndi”. Reikuaa vaʼerã ne hénte ha ne amigokuéra oikotevẽtanteha voi tiémpo ojepokuaa jey hag̃ua penderehe. Ne matrimónio ningo okambiáma, ha ne amigokuéra ikatúnte avei okambia. Javier omombeʼu haʼe ha hembireko mbeguekatúpe ojepokuaa jey hague iñamigokuéra yma guarére. Upéi heʼive: “Koʼág̃a oñondive roñehaʼã rokonsegi ore amigorã, ha upéva tuicha orepytyvõ”.

 Reime jave ne amigokuéra ndive, reñatende vaʼerã ani hag̃ua remoñeñandu vai ne rembirekópe. Por ehémplo, peñemongeta jave osẽramo peteĩ ne amígo oñeʼẽ ne matrimónio ypykuére, reñatende vaʼerã mbaʼépa eréta ani hag̃ua ne rembireko opensa oñemboykeha chupe. La Biblia heʼi porã: “Oñeʼẽmba reíva oporokutu kysepeguáicha, ha iñarandúva oporomonguera pohãmeguáicha” (Proverbios 12:18).

EJAPÓNA KOʼÃ MBAʼE: Peñembyatýta jave pene amigokuérandi, rehecháma vaʼerã mbaʼépa rejapóta heʼíramo hikuái peteĩ mbaʼe omoñeñandu vaítava ne rembirekópe térã oñeʼẽramo hikuái ne matrimónio ypykuére.

PROVLÉMA 3: REÑEMOAKÃRATĨ RUPI, IJETUʼU NDÉVE REJEROVIA HAG̃UA NE REMBIREKO KOʼAG̃AGUÁRE.

Andréspe oheja vaʼekue hembireko ypykue ótrore, ha upévare heʼi: “Akyhyjeterei oiko jeýrõ g̃uarã cherehe upéva”. Upéicharõ jepe, omenda jey upe rire peteĩ viúdare hérava Rita. Andrés heʼive: “Siémpre añeporandu ikatúnepa ahupyty Rita ména ypykuépe, haʼe ningo ivuenoiterei vaʼekue. Akyhyje Rita opensárõ g̃uarã cherehe ndavaleiha chupe g̃uarã ha chekambia mbaʼe ótrore”.

MBAʼÉPA IKATU REJAPO: Remombeʼu vaʼerã ne rembirekópe umi mbaʼe ndepyʼapýva. La Biblia heʼi: “Ndaiporihápe ñemongeta, mbaʼeve nosẽporãi” (Proverbios 15:22). Andrés ha Rita oñemongeta porã rupi ojogueraha porãve. Andrés heʼi: “Che apromete Rítape arakaʼeve ndajedivorsiamoʼãiha chugui oreprovléma haguérente, ha haʼe opromete avei chéve upéva. Upéicha rupi koʼág̃a akonfia hese che pyʼaite guive”.

Oiméramo ne ména térã ne rembirekópe oñemoakãratĩ raʼe, ejapo ikatúva guive haʼe okonfia hag̃ua nderehe. Por ehémplo, Miguel ha Sabrina divorsiádo vaʼekue ha omenda ojuehe. Ha Miguel opromete Sabrínape oñeʼẽtaramo hembirekokuéndi, omombeʼutaha chupe. Ha Sabrina opromete avei chupe upéva. Sabrina heʼi: “Rojapo rupi upéicha, roiko porãve ha rojerovia ojuehe” (Efesios 4:25).

EJAPÓNA KOʼÃ MBAʼE: Reñatende vaʼerã ani reñeʼẽ neañoháme umi ndahaʼéivandi ne ména térã ne rembireko, tahaʼe teléfono térã Internet rupive.

Oĩ ningo heta omenda jey vaʼekue ha oikóva vyʼápe. ¡Nde avei ikatu reiko upéicha! Ha katuete koʼág̃a remenda jeývape reikuaa porãvéma umi mbaʼe ndegustáva ha tekotevẽhápe rekambia, rejogueraha porãve hag̃ua ne ména térã ne rembireko pyahu ndive. Andrés heʼi: “Rita tuicha chepytyvõ. Ojapóma trece áño romenda hague ha rojoayhuverei koʼág̃a; nahiʼãiete ningo chéve aperde upéva”.

^ párr. 3 Oñekambia herakuéra.

^ párr. 5 Heta ningo oĩ omenda jeýva ojedivorsia térã omanógui peteĩva. Idiferénteramo jepe káda uno isituasión térã umi mbaʼe oñandúva, umi konsého oñemeʼẽva ko artíkulope oipytyvõtava mokõivévape oiko hag̃ua vyʼápe. Ha oñeñeʼẽvéramo jepe kuimbaʼekuérape, umi konsého oipytyvõkuaa avei kuñanguérape.

^ párr. 7 Rejuhuvéta informasión oipytyvõtava umi orekóvape familianga, pe artíkulo héravape “Claves para el éxito de las familias con hijastros”, osẽ vaʼekue ¡Despertad! abril 2012-pe, ojapóva testígo de Jehová.

REJEPYʼAMONGETA HAG̃UA

  • ¿Mbaʼépa aguerohoryve che rembiayhu koʼag̃aguáre?

  • Oĩramo imanduʼáva che matrimónio ypykuére, ¿mbaʼépa ikatu ajapo ani hag̃ua che rembiayhu koʼag̃agua oñeñandu vai térã otĩ?