Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Julio de 2013

 PETEĨ TESTÍGO DE JEHOVÁ OÑEMONGETA IVESÍNONDI

¿Ombyasýpa Ñandejára ohechávo jahasa asy?

¿Ombyasýpa Ñandejára ohechávo jahasa asy?

Koʼápe jahecháta mbaʼéichapa peteĩ testígo de Jehová oñemongeta ivesína ndive. Ñamoĩ chupe peteĩ Testígo hérava Miguela oñemongetaha peteĩ ogajára ndive, hérava Sofía.

¿MBAʼÉRE PIKO ÑANDEJÁRA OHEJA OIKO KOʼÃ MBAʼE?

Miguela: ¡Mbaʼéichapa! Ahejasemi ningo ndéve ko tratádo hérava: Ndépa reñeporandúmava koʼã mbaʼe?

Sofía: ¿Oñeʼẽ piko rrelihión rehe?

Miguela: Si. Koʼápe oñembohovái seis porandu. ¿Mávapa ndegustave...?

Sofía: Eh... chediskulpa, reperde reíta ne tiémpo chendive.

Miguela: ¿Mbaʼére piko ere upéicha?

Sofía: Chéve g̃uarã Ñandejára ndoexistíri voi.

Miguela: Grásiamante nesinséra haguére. Péro ¿siémprente voi piko repensáva upéicha?

Sofía: Nahániri, chemitãme aha vaʼekue tupaópe. Péro upéi ndahaveiete.

Miguela: ¡Ahh, piko! Chediskulpána, namombeʼúingo ndéve che réra. Che ningo Miguela. ¿Ha nde?

Sofía: Sofía.

Miguela: Múcho gústo Sofía.

Sofía: Igualménte.

Miguela: Ani rejepyʼapy, che ndorojopymoʼãi repensa hag̃ua che apensaháicha. Péro aporandusemi ndéve peteĩ mbaʼe: ¿mbaʼe piko oiko mbaʼe ajeve nderegueroviavéi Ñandejára oexistiha?

Sofía: Che sy ningo oñaksidenta kuri, ojapóma 17 áño.

Miguela: Ambyasyete piko nendive. ¿Ha mbaʼéichaiko opyta upe rire?

Sofía: Opyta anga paralítika la che sy.

Miguela: ¡Anichéne! Oiméne piko rembyasyete.

Sofía: Si, ambyasyetereíngo, upévare che apensa: “Oiméramo Ñandejára oexisti, ¿mbaʼére piko oheja oiko koʼã mbaʼe? ¿Maʼerãiko oheja peichaite rohasa asy?”.

¿OĨ VAÍPA ÑAPENSA UPÉICHA ÑANDEJÁRARE?

Miguela: Ndaivaíri ningo reñeñandu upéicha. Jahasa asýramo, sapyʼánte jaikuaase voi mbaʼérepa oiko umi mbaʼe. Ha naneañói repensa upéicha, la Biblia omombeʼu heta kuimbaʼe ha kuña oservi vaʼekue ipyʼaite guive Ñandejárape, oñeñandu hague avei ndéicha.

Sofía: ¡Añete piko ere!

Miguela: Si. Tahechaukamína ndéve peteĩ ehémplo.

Sofía: Vuéno.

Miguela: Emañamína mbaʼépa oporandu vaʼekue proféta Habacuc Ñandejárape. Jahechamína Habacuc kapítulo 1, versíkulo 2 ha 3. Koʼápe heʼi: “Che Jára, ¿arakaʼe peve piko asapukáita ndéve chepytyvõ hag̃ua ha nacherendumoʼãi? ¿Arakaʼe peve piko asapukáita oĩgui jejuka ha nderejumoʼãi orepeʼa jejopy vaígui? ¿Maʼerã piko rehechauka chéve jeiko asy ha ñaña?”. ¿Ndépa reñeporandu jepi avei koʼã mbaʼe?

Sofía: Si.

Miguela: Ha ndépa reikuaa Ñandejára ndokastigái hague Habacúcpe oporandu haguére koʼã mbaʼe, ni ndeʼíri chupe ojeroviave vaʼerãha.

Sofía: ¡Eʼána nde!

JEHOVÁPE NDOGUSTÁI JAHASA ASY

Miguela: La Biblia heʼi avei Ñandejára ohechaha mbaʼéichapa jasufri ha heʼi avei ojepyʼapyha ñanderehe.

Sofía: Mmm..., péro ndagueroviapáingo che upéva.

 Miguela: Tahechaukamína ndéve mbaʼépa heʼi Éxodo 3:7. ¿Ikatúpa ndete voi relee?

Sofía: Vuéno. ‘Jehová heʼi: “Ahecha oiko asyha che retãyguakuéra Egíptope. Ahendu ipyahẽ júgo pohýi guýpe, ahechapaite hembiasa asy”.’

Miguela: Grásiamante. ¿Mbaʼépa ohechauka ko téxto? ¿Ohechápa Ñandejára mbaʼéichapa jasufri?

Sofía: Heẽ, ha amalisiángo ohecha.

Miguela: Ndahaʼéi ningo noimportáiva chupe koʼã mbaʼe, síno heʼiháicha ko versíkulo opakuetévo, Ñandejára ‘ohechapaite’ mbaʼéichapa yvyporakuéra ohasa asy. ¿Mbaʼépa nde repensa? ¿Heʼíta piko Ñandejára péicha ndojepyʼapýiramo ñanderehe?

Sofía: Ha, nahániri.

Miguela: Oĩ ningo ohecháva mbaʼéichapa jahasa asy, péro noimportáiva chupe. Ótrope katu hasy asy ohechávo umi osufríva.

Sofía: Siérto upéva.

Miguela: Ha Ñandejárape ningo hasy avei ohechávo jasufri. Jahechamína ótro ehémplo ohechaukáva mbaʼéichapa Ñandejára oñeñandu ohechárõ guare ipuévlo ohasa asy. Jaleemína Isaías 63:9. Ko versíkulo oñepyrũvo heʼi: “Haʼekuéra ojejopy vaiete jave, Haʼe ojepyʼapy avei”. ¿Ombyasy piko upéicharõ Ñandejára ohechávo ipuévlo osufri?

Sofía: Heẽ, ha amalisiángo upéicha.

Miguela: Añetehápe ningo Sofía, Ñandejára ojepyʼapyeterei ñanderehe ha ndogustái chupe ohechávo mbaʼéichapa jahasa asy. Ñande jasufríramo, haʼe avei osufri ñanendive.

¿MBAʼÉRE PIKO UPÉICHARÕ NDOJAPÓI MBAʼEVE?

Miguela: Aha mboyve, ahechaukase ndéve ótro téxto heʼíva.

Sofía: Vuéno.

Miguela: Ko téxto ohechauka mbaʼeichaitépa Ñandejára ipoderóso. Eleemína koʼápe Jeremías 10:12 heʼíva.

Sofía: Si. Koʼápe heʼi: “Ñande Ruete ipuʼaka rupi ojapo vaʼekue ko yvy, ha iñarandu rupi omohenda porãmba ko yvy apére oĩva guive ha omyasãi umi yvága, iñakã porãite rupi”.

Miguela: Grásiamante. ¡Ajépa ipoderosoite Ñandejára! Upéicha rupínte ojapo ko univérso ha opa mbaʼe oĩva pype.

Sofía: ¡Ajépa nde!

Miguela: Ñandejára ojapóramo opa mbaʼe oĩva ñande jerére, ¿ndaikatumoʼãi piko avei upéicharõ osolusiona opa mbaʼe ñanembohasa asýva?

Sofía: Ha ikatu vaʼerã ningo.

Miguela: ¿Ajépa? Epensamínte nde sy rehe, ¿mbaʼérepa nde rembyasyete chupe rehechávo mbaʼéichapa osufri?

Sofía: Eʼa. Haʼe ningo che sy ha ahayhu chupe.

Miguela: Ha nde ikatútaramo remonguera chupe, ¿rejapónepa?

Sofía: Si... pyaʼetereíngo ajapóta.

Miguela: Ha ñande jahecháma kuri la Bíbliape Ñandejára ombyasyha ohechávo jahasa asy ha orekoha podér osolusiona hag̃ua koʼag̃aite voi umi mbaʼe ñanembohasa asýva. ¡Epensamíntena upéicharõ mbaʼeichaitépa Ñandejára ojejoko hína!

Sofía: Heẽ, che napensaimíva upévare.

Miguela: Péro, ¿mbaʼérepa koʼág̃ama voi nosolusionái opa mbaʼe? *

Sofía: Ha upéva che la aikuaaséva.

Miguela: Mbaʼépa ere aju jeýrõ ñañemongetave hag̃ua upévare. ¿Opyta porãtapa ndéve ajúrõ koʼã órape ótra semána?

Sofía: Oĩ porãta. Grásiamante. *

¿Oĩpa peteĩ mbaʼe reikuaaséva la Bíbliagui? ¿Nerentendeporãipa mbaʼérepa ojapo térã oguerovia peteĩ mbaʼe umi testígo de Jehová? Oimérõ upéicha, eporandúna ág̃a chupekuéra og̃uahẽ jey vove nde rógape. Vyʼápe omyesakãta ndéve hikuái umi mbaʼe reikuaaséva.

^ párr. 61 Rejuhuvéta informasión oñeʼẽva ko témare, kapítulo 11-pe lívro Mbaʼépa añetehápe omboʼe la Biblia?, ojapóva testígo de Jehová.

^ párr. 64 Osẽ jey vove koichagua artíkulo, omyesakãta mbaʼérepa Ñandejára oheja jahasa asy.