Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Mayo de 2013

 ÑAÑEMOAG̃UÍKENA ÑANDEJÁRARE

¿Ojepyʼapýpa Ñandejára ñanderehe?

¿Ojepyʼapýpa Ñandejára ñanderehe?

“Che ningo ndavaléi voi mbaʼeverã.” Péicha heʼi peteĩ kuñakarai opensáva ndojapoiha mbaʼeve iporãva Jehová oñeinteresa hag̃ua hese. ¿Reñeñandúmavapa nde avei upéicha? Ikatu oime reñeporandu: “¿Ojepyʼapýpa Ñandejára cherehe?”. Katuete nembovyʼáta reikuaávo Jehová ojepyʼapyha nderehe, ha Jesús heʼi vaʼekue tuichaiterei nembopyʼaguapýta. (Elee Juan 6:44.)

Jesús ningo oikuaa Jehová rembipota ha mbaʼeichagua persónapa haʼe, ndaipóri ótro oikuaa porãvéva chugui (Lucas 10:22). Jesús heʼi: “Avave ndoúi che rendápe, ndoguerúiramo chupekuéra che Ru, chembou vaʼekue”. Upéicharõ, jaiko hag̃ua Jesús remimboʼéramo ha jaservi hag̃ua ñande Ru yvagapeguápe, Jehová voi ñandegueru vaʼerã (2 Tesalonicenses 2:13). Ñantende porãramo Jesús heʼi vaʼekue, jahechakuaáta añetehápe Ñandejára ojepyʼapyha peteĩteĩre.

¿Mbaʼépa heʼise Jehová ñandegueruha? ¿Heʼisépa upéva ñandeovligaha jajapo hag̃ua hembipota? Nahániri. Jehová ndojopýi avavépe oservi hag̃ua chupe, síno káda únope omeʼẽ liverta odesidi hag̃ua mbaʼépa ojapóta (Deuteronomio 30:19, 20). Ko yvy tuichakuére Jehová omaña hína mbaʼépa oreko káda uno ikorasõme, ha oheka umi tapicha ipyʼaporãvape ha oikuaaséva chupe (1 Crónicas 28:9). Ha ojuhúramo peteĩ oserviséva chupe ipyʼaite guive, oipytyvõ upe tapichápe.

Upéicha jave, Jehová mborayhúpe ohenói umi tapichápe ha ogueru chupe oñemoag̃ui hag̃ua Hese (Hechos 13:48). ¿Mbaʼéichapa ojapo upéva? Omombeʼúvo chupekuéra pe notísia porã oĩva la Bíbliape ha ijespíritu sánto rupive oipytyvõ chupekuéra ontende ha ojapo hag̃ua umi mbaʼe oaprendéva (1 Corintios 2:11, 12). Jehová nañanepytyvõirire, ndaikatúi vaʼerãmoʼã jaservi chupe ni jaiko Itaʼýra disípuloramo.

Jehová ndojopýi avavépe oservi hag̃ua chupe, síno káda únope omeʼẽ liverta odesidi hag̃ua mbaʼépa ojapóta

Upéicharõ, ¿mbaʼépa ñanemboʼe Jehovágui umi mbaʼe Jesús heʼi vaʼekue Juan 6:44-pe? Jehová ohechávo umi mbaʼe porã jarekóva ñande pyʼapýpe ñandegueruha ñañemoag̃ui hag̃ua hese. Haʼe ningo ojepyʼapy káda uno rehe. Pe kuñakarai ñañeʼẽ hague iñepyrũme, oikuaa rire upe téxto heʼíva, omombeʼu: “Tuichaiterei mbaʼe ningo chéve g̃uarã aservi Jehovápe. Haʼe cheporavo aservi hag̃ua chupe, ha upéva ohechauka chéve añetehápe ojepyʼapyha cherehe”. Hiʼãite oréve nde avei reikuaávo Ñandejára ojepyʼapyha nderehe, reheja chupe tandegueru reñemoag̃ui hag̃ua Hese.

Ko méspe ikatu relee la Bíbliape

Lucas kapítulo 22-24 guive Juan kapítulo 1-16 peve