Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Abril de 2013

 ÑAÑEMOAG̃UÍKENA ÑANDEJÁRARE

“Pejerure jey jeýkena, ha oñemeʼẽta peẽme”

“Pejerure jey jeýkena, ha oñemeʼẽta peẽme”

Peteĩ hemimboʼe ojerure Jesúspe: “Che Ruvicha, oremboʼemína mbaʼéichapa roñemboʼe vaʼerã” (Lucas 11:1, NM). Jesús mokõi ehémplo rupive ohechauka mbaʼéichapa ñañemboʼe vaʼerã Ñandejára ñanerendu hag̃ua. ¿Ndépa repensámava ohendúpa Ñandejára ne ñemboʼe? Oiméramo upéicha, tuicha nepytyvõta Jesús heʼi vaʼekue. (Elee Lucas 11:5-13.)

Pe primer ehémplo Jesús omombeʼu oñeʼẽ hag̃ua pe tapicha oñemboʼévare (Lucas 11:5-8). Haʼe omombeʼu peteĩ kuimbaʼe rógape og̃uahẽ hague mbohupa pyhare rei, ha haʼe ndorekói mbaʼeve hoʼuka vaʼerã chupe. Pe ogajára tesaparápe ojecha ha tárderamo jepe, osẽ oho iñamígo rógape ha ojerure omeʼẽmi hag̃ua chupe mbohapy pan. Ñepyrũrã pe iñamígo nopuʼãséi hendápe nomombayséigui ifamiliakuérape, péro haʼe osegi ojerure. Upémarõ opuʼã ha omeʼẽ chupe oikotevẽva. *

¿Mbaʼépa ñanemboʼe ko ehémplo? Tekotevẽha jajerure jey jey, ñambota ha jaheka meme (Lucas 11:9, 10). ¿Heʼisépa raʼe Jesús upéicharõ Ñandejára nañanerenduseiha ha tekotevẽha jajerure jey jey chupe ñañemboʼe jave? Nahániri. Ñandejára ningo ndahaʼéi pe kuimbaʼe nopuʼãséi vaʼekuéicha iñamígo rendápe, Haʼe oipytyvõse umi ipyʼaite guive oñemboʼévape chupe ha oĩ porãma guive umi mbaʼe ojeruréva, omeʼẽta chupe. Jajerure jey jeýramo peteĩ mbaʼe jaipotáva, jahechauka ñaína añetehápe ñaikotevẽha upéva ha jajeroviaha Ñandejára omeʼẽtaha ñandéve (Marcos 11:24; 1 Juan 5:14).

Pe segundo ehémplo Jesús omombeʼu ohechauka hag̃ua mbaʼeichaguápa pe ‘ohendúva maymáva ñemboʼe’ (Salmo 65:2). Jesús oporandu: “¿Oĩne piko túva, itaʼýra ojeruréramo pira, omeʼẽtava chupe mbói, pira rangue? Térã ojerurérõ peteĩ ryguasu rupiʼa, ¿omeʼẽtapa chupe alakrán?”. Añetehápe ni peteĩ túva ohayhúva ifamíliape nomeʼẽmoʼãi asy chupe peteĩ mbaʼe ojapo vaítava hese. Upéi Jesús heʼi: “Peẽ pene imperféktoramo jepe pemeʼẽ rregálo iporãva pende raʼykuérape, ¡koʼytevéntema pende Ru yvagapegua omeʼẽta espíritu sánto [pe rregálo iporãvéva] umi ojerurévape chupe!” (Lucas 11:11-13, NM; Mateo 7:11). *

Ñandejára oipytyvõse umi oñemboʼévape chupe ipyʼaite guive

Ko ehémplo rupive, Jesús ñanemokyreʼỹ jahecha hag̃ua Jehovápe peteĩ Túva imbaʼeporãvaicha ha omeʼẽséva ifamíliape umi mbaʼe oikotevẽva. Haʼe ningo ‘ohendu maymáva ñemboʼe’, upévare umi oservíva chupe ikatu oimeha óra ojerure chupe umi mbaʼe oikotevẽva. Avei oikuaágui Ñandejára oipotaha iporãvante chupekuéra g̃uarã, oguerohory oñembohováivo chupekuéra iñemboʼe, ndahaʼéiramo jepe ohaʼarõ haguéicha. *

Ko méspe ikatu relee la Bíbliape

Lucas kapítulo 7 guive 21 peve

^ párr. 4 Jesús oiporu ehémploramo umi hénte ojepokuaáva ojapo upe tiémpope. Umi hudío ningo omombaʼeterei peteĩ tapicha ovisitáramo chupekuéra ha imbaʼeporã vaʼerã hendivekuéra. Yma káda família ojapómi pan oiporu vaʼerã upe árapente, ha opáramo chuguikuéra, oho ojerure ivesínope. Avei umi família imboriahúva okepa peteĩ kotýpente písope, ha oĩramo opuʼãva ikatu omombáy umi ótro okévape.

^ párr. 6 Ko téxtope Jesús heʼívo “koʼytevéntema” ohechauka hína Ñandejára Jehová imbaʼeporãveha oimeraẽ yvypóragui.

^ párr. 7 Pe lívro Mbaʼépa añetehápe omboʼe la Biblia?, ojapóva testígo de Jehová, kapítulo 17-pe omyesakãve mbaʼéichapa reñemboʼe vaʼerã Ñandejára nerendu hag̃ua.