Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Abril de 2013

Jesús oiko vaʼekue vyʼápe

Jesús oiko vaʼekue vyʼápe

¿AÑETEHÁPE piko Jesús ovyʼa rakaʼe? Enterove ningo jaikuaa haʼe okakuaa hague peteĩ família iñumíldevape ha ndoguerekói vaʼekue heta mbaʼe, okakuaapa riréma haʼe heʼi vaʼekue ndorekoiha “moõpa oñenóta oke” (Lucas 9:57, 58, NM). Avei oĩ vaʼekue ndaʼijaʼéiva ha oñeʼẽ vaíva hese ha amo ipahápe ojuka chupe hikuái.

Péro ikatu oĩ heʼíva “mbaʼéicha piko péicha ikatúta jaiko vyʼápe”. Oĩ ningo ambue mbaʼe iñimportánteva Jesús ojapo vaʼekue. Ñahesaʼỹijomína cuatro umíva apytégui.

1. JESÚS OJAPO VAʼEKUE ÑANDEJÁRA REMBIPOTA.

“Che rembiʼu hína kóva: Ajapo upe chembou vaʼekue rembipota.” (Juan 4:34, NM.)

Jesús opa mbaʼe heʼíva ha ojapóvape oñehaʼã vaʼekue ohechauka iñeʼẽrenduha Itúva Jehovápe. * Jahechaháicha pe téxtope, Jesúspe g̃uarã haʼete okarúva hína ojapóramo Jehová rembipota ha ombovyʼaiterei chupe. Jahechamína mbaʼérõ guarépa haʼe heʼi rakaʼe upe téxtope oĩva.

Peteĩ asajépe, las 12 rupi Jesús heʼi vaʼekue upéva (Juan 4:6). Upe pyharevépe heta oguata Samaria rupi umi sérro paʼũre ha oime vaʼerã iñembyahýima raʼe. Umi idisípulo heʼíma voi chupe: “Mboʼehára, ekarúna” (Juan 4:31, NM). Upe ehémplo rupive Jesús ohechauka ojapóvo Ñandejára omanda vaʼekue chupe, omombarete ha ojapo porãha hese. ¿Rehechakuaápa Jesús ovyʼaha oikóvo péicha?

2. JESÚS OHAYHU VAʼEKUE ITÚVAPE IPYʼAITE GUIVE.

“Che ahayhu pe Túvape.” (Juan 14:31, NM.)

Jesús ojogueraha porãiterei vaʼekue Itúva ndive oikórõ guare hendive yvágape. Haʼe ohayhúgui Itúvape ipyʼaite guive, oikuaauka vaʼekue Itúva réra, mbaʼépa oreko ñandéve g̃uarã ha umi mbaʼe porã ohechaukáva. Oiko lájare ha opa mbaʼe heʼi ha ojapóvape Jesús ohechauka porãiterei mbaʼeichaguápa Jehová. Jaikuaa porãramo Jesúspe, haʼete voi jahecháva Itúvape. Upévare Felipe heʼírõ guare chupe: “Ehechaukamína oréve pe Túva”, Jesús heʼi: “Upe chéve cherecháva, ohecháma avei pe Túvape” (Juan 14:8, 9, NM).

Jesús ohayhuetereígui Itúvape, iñeʼẽrendu chupe omano meve (Filipenses 2:7, 8; 1 Juan 5:3).  Haʼe ohayhúgui Ñandejárape, oiko vaʼekue vyʼápe ha oikuaa maʼerãpa oikove.

3. JESÚS OHAYHU VAʼEKUE YVYPORAKUÉRAPE.

“Ndaipóri mborayhu tuichavéva kóvagui: ñameʼẽ ñande rekove ñane amigokuéra rehehápe.” (Juan 15:13, NM.)

Ñane imperfékto rupi, ndahaʼéi iporãmbáva ñane renonderã. La Biblia heʼi: “Peteĩ kuimbaʼe [Adán] rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi” (Romanos 5:12, NM). Jahechaháicha, ñandejehegui reínte ni mbaʼevéicharõ nañasẽmoʼãi pekádo ha ñemano poguýgui (Romanos 6:23).

Haʼetépe, Jehová ñanderayhu rupi ojapo tekotevẽva osolusiona hag̃ua upéva. Haʼe ombou Itaʼýra Jesúspe ohasa asy ha omano ñanderehehápe ikatu hag̃uáicha ñandepeʼa pekádo ha ñemano poguýgui. Jesús ningo perfékto ha arakaʼeve ndopekái vaʼekue, avei ohayhúgui Itúva ha yvyporakuérape, ipyʼaite guive ou ojapo ojejerure vaʼekue chupe ha omano ñanderehehápe (Romanos 5:6-8). Haʼe ovyʼa vaʼekue ojapógui umi mbaʼe porã yvyporakuéra rehehápe. *

4. JESÚS OIKUAA ITÚVA OHAYHU HA OGUEROHORYHA CHUPE.

“Kóva hína che Raʼy ahayhuetéva ha aguerohorýva.” (Mateo 3:17, NM.)

Péicha Jesús ojevautisárõ guare, yvága guive Jehová heʼi ohayhu ha oguerohoryha Itaʼýrape; upévare Jesús ikatu vaʼekue heʼi: “Pe Túva cherayhu” (Juan 10:17, NM). Haʼe oikuaágui upéva, pyʼaguasúpe ombohovái vaʼekue ojepersegi ha oñeñeʼẽ vaírõ guare hese. Ojejukátarõ guare jepe ndojapói vaʼekue mbaʼeve hendapeʼỹ ha pyʼaguapýpe porãnte ombohovái (Juan 10:18). Jesús oikuaa porãgui Itúva ohayhu ha oguerohoryha chupe, koʼýte oñeñandu porã ha oiko vaʼekue vyʼápe.

Umi mbaʼe ñahesaʼỹijo vaʼekuére jahechakuaa Jesús oiko hague vyʼápe ko yvy ape ári, ha heta mbaʼe ikatu ñaaprende chugui. Pe artíkulo oúvape jahecháta heta konsého haʼe omeʼẽ vaʼekue idisipulokuérape oiko hag̃ua vyʼápe.

^ párr. 6 La Biblia heʼi Ñandejára heraha Jehová.

^ párr. 15 Reikuaave hag̃ua mbaʼéichapa Jesús ñandesalva, ehecha kapítulo 5-pe lívro Mbaʼépa añetehápe omboʼe la Biblia?, ojapóva testígo de Jehová.