Ehecha oĩva pype

Ehecha menú secundario

Ehecha oĩva pype

Testígo de Jehová

guarani

Ñemañaha  |  Marzo de 2013

 OJEKUAASÉVA JEPI

¿Opromete piko Jesús pe mbaʼe vai apohápe ohotaha yvágape?

¿Opromete piko Jesús pe mbaʼe vai apohápe ohotaha yvágape?

Heta oĩ oñeporandúva ko mbaʼe Jesús heʼi rupi pe mbaʼe vai apoha oĩvape ijykére: “Añetehápe haʼe ndéve koestedía: Reiméta chendive pe hardín neporãvape” (Lucas 23:43, NM). Jesús ndeʼíri moõpa oĩ upe hardín. ¿Heʼisépa upéicharõ pe kuimbaʼe ohotaha hendive yvágape?

Jahechamína ojapópa raʼe tekotevẽva ko kuimbaʼe oho hag̃ua yvágape. Umi kristiáno orekóva esperánsa ohóvo yvágape ningo ojevautisa vaʼerã y ha espíritu sántope, ha upéicha oiko chuguikuéra Jesús disípulo ojeporavóva espíritu sánto rupive (Juan 3:3, 5). Avei oiko vaʼerã Ñandejára heʼiháicha ha ohechauka iñonrrádo, hekojoja ha oporoporiahuverekoha (1 Corintios 6:9-11). Omano meve iñeʼẽrendu vaʼerã ipyʼaite guive Jehová ha Jesucrístope (Lucas 22:28-30; 2 Timoteo 2:12). Ojapóramo añoite koʼã mbaʼe, ikatúta oñemoingove jey ha oho yvágape oservi hag̃ua rréi ha saserdóteramo Jesucristo ndive, ha oipytyvõ yvyporakuérape mil áñore (Revelación [Apocalipsis] 20:6).

Péro ko kuimbaʼe oĩ vaʼekue Jesús ykére, hembiapo vaieterei ha omano peteĩ mbaʼe vai apoháicha (Lucas 23:32, 39-41). Añetehápe ningo haʼe ojerure asy Jesúspe: “Nemanduʼákena cherehe reike vove ne Rréinope” (Lucas 23:42, NM). Péro haʼe ndojevautisái, ndojeporavói chupe espíritu sánto rupive omoirũ hag̃ua Jesúspe ha oikove aja ndohechaukái hekoporã ha ikatuha ojejerovia hese. ¿Ikatu piko upéicharõ jaʼe Jesús opromete hague chupe oisãmbyhytaha umi ambue hemimboʼe iñeʼẽrenduetévandi? (Romanos 2:6, 7.)

Ñambojojami ko mbaʼére. Ñamoĩ chupe peteĩ kuimbaʼe nemondapaiteha, péro upéi oñearrepenti ha ojerure ndéve perdón. Ikatu upévare redesidi neredemandái chupe, upéicharamo jepe, ¿rehejátapa oñangareko ne negósio térã ne famíliare? Ni mbaʼevéicharõ. Umi tembiapo ningo remeʼẽta umi ndejeroviahápe añoite. Upéicha avei umi ohótava yvágape ohechauka vaʼerã ikatuha ojejerovia hesekuéra ha ojapotaha Ñandejára heʼiháicha oisãmbyhy vove yvyporakuérape (Revelación 2:10). Pe mbaʼe vai apoha oñembyasýramo jepe, ndohechaukajepéi ikatuha ojejerovia hese.

Péro ¿ndeʼíri piko Jesús pe mbaʼe vai apohápe oĩtaha hendive yvágape upe árape? Nahániri. Jesús ningo ndaikatúi oprometévo upéva, haʼe ndohói kuri upe árape yvágape, síno “oĩ pe sepultúrape tres día” (Mateo 12:40, NM; Marcos 10:34). Avei oñemoingove jey rire chupe ohaʼarõ kuri 40 día oho hag̃ua yvágape (Hechos 1:3, 9).

¿Moõpa upéicharõ Jesús opromete pe mbaʼe vai apohápe oikotaha? Oñemoingove jey rire chupe, oikóta peteĩ hardín neporãvape ko yvy ape ári Jesús goviérno poguýpe (Hechos 24:15; Revelación 21:3, 4). Reikuaasevéramo ko mbaʼégui ha mbaʼépa rejapokuaa reime hag̃ua Jesús goviérno poguýpe, ikatu reñeʼẽ peteĩ testígo de Jehová ndive.