Ehecha oĩva pype

Ehecha oĩva pype

 ÑAÑEMOAG̃UÍKENA ÑANDEJÁRARE

“¿Mávapa pe mandamiénto iñimportantevéva?”

“¿Mávapa pe mandamiénto iñimportantevéva?”

¿Mbaʼépa jajapo vaʼerã Ñandejára ñandeguerohory hag̃ua? ¿Jasegi vaʼerã piko heta léi? Javyʼaiterei ndahaʼéi haguére upéicha. Jesucristo, Ñandejára Raʼy heʼi mbaʼépa jajapo vaʼerã Ñandejára ñandeguerohory hag̃ua. (Elee Marcos 12:28-31.)

Ñepyrũrã jahechami mbaʼérõ guarépa Jesús heʼi upe téxtope oĩva. Upérõ 11 de nisán ha Jesús oporomboʼe hína pe témplope ha saʼipaitéma ofalta ojejuka hag̃ua chupe. Umi iñenemigokuéra oporandu Jesúspe heta mbaʼe ikatu hag̃uáicha heʼi peteĩ mbaʼe oiporu vaʼerã ikóntrape. Péro ndaikatúimarõ ojapo hikuái mbaʼeve, peteĩva osẽ oporandu chupe: “¿Mávapa pe mandamiénto iñimportantevéva?” (versíkulo 28).

Haʼekuéra ndahaʼéi oikuaaségui oporandúva upéva. Umi hudío ojodiskutijoa mávapa umi 600 rasa mandamiénto apytégui iñimportanteve, oĩ heʼíva enterovénte iñimportanteha umi léi oñemeʼẽ vaʼekue Moisés rupive. ¿Péro mbaʼéichapa Jesús ombohovái chupekuéra?

Haʼe imanduʼa mokõi mandamiénto rehe. Primero heʼi chupekuéra: “Rehayhu vaʼerã Jehová nde Járape nde pyʼaite guive, ne álma rugua guive ha opa ne arandu ha ne mbaretekue reheve” (versíkulo 30; Deuteronomio 6:5). Umi ñeʼẽ, pyʼa, álma, arandu ha mbaretekue oikepaite peteĩ mbaʼépente. * Upéva heʼise jahayhu vaʼerãha Jehovápe opaite mbaʼépe. Peteĩ rreferénsia vívlika heʼi: “Jahayhu vaʼerã Ñandejárape pyʼamokõiʼỹre”. Upéicha rupi, umi ohayhúva Ñandejárape ojapóta ikatúva guive Haʼe oguerohory hag̃ua chupekuéra (1 Juan 5:3).

Mokõiha, Jesús heʼi: “Rehayhu vaʼerã nde rapichápe nde rejehayhuháicha” (versíkulo 31; Levítico 19:18). Jahayhúramo Ñandejárape, jahayhúta avei ñande rapichakuérape (1 Juan 4:20, 21). Jahayhúramo ñande rapichakuérape ñande jajehayhuháicha, jatratáta chupekuéra jaipotaháicha haʼekuéra ñandetrata (Mateo 7:12). Jajapóramo upéicha, jahechauka ñaína jahayhuha Ñandejárape, haʼe ningo ñandeapo vaʼekue enterovépe ijoguaháramo (Génesis 1:26).

Opa mbaʼe Jehová ojeruréva isiervokuéragui oñemopyenda mborayhúpe

¿Iñimportánte piko pe mandamiénto heʼíva jahayhu vaʼerãha Ñandejárape ha ñande rapichakuérape? Jesús heʼi: “Ndaipóri ótro mandamiénto tuichavéva koʼãvagui” (versíkulo 31). Ambue hendápe Jesús heʼi avei koʼã mokõi mandamiénto omopyendaha umi ótro mandamiénto (Mateo 22:40).

Ndahasýi ñambopyʼarory hag̃ua Ñandejárape. Haʼe ningo opa mbaʼe ojeruréva ñandéve oñemopyenda mborayhúpe. Ha ymaite guive haʼe mborayhúpe oipota oñemombaʼeguasu chupe. Péro ndahaʼéi vaʼerã ñañandu térã jaʼénteva japorohayhuha, síno jahechauka vaʼerã opaite mbaʼe jajapóvape (1 Juan 3:18). Ñandejára Jehová ningo “haʼe mborayhu”. ¿Reikuaasépa mbaʼéichapa ikatu rehechauka rehayhuha Chupe? (1 Juan 4:8, NM.)

Ko méspe ikatu relee la Bíbliape

Marcos kapítulo 9-16 guive Lucas kapítulo 1-6 peve

^ párr. 6 Bíbliape, pe ñeʼẽ álma heʼise ñande rekove kompletoite; upévape oikepaitéma ñande pyʼapy, ñane arandu ha ñane mbaretekue.